عيوب ومشاكل السكن فى الدور الأخير ؟

أيه مشكلة السكن فى الدور الأخير ؟
كل الشقق اللى معروض عليا أشتريها أما دور أرضى وأما دور أخير !
أنا متعقد أصلاً من الدور الأرضى ، مع أنى ساكن فى الدور التانى يعنى أول بلكونة ولكن تحس أنك قاعد فى الشارع وكل المارين فى الشارع والأولاد اللى بيلعبوا كأنهم معزومين عندك فى الشقة !!!:crying2::crying2:
يتبقى الدور الأخير حاسس أنه مشكلة بس أيه هية مش عارف !
ياريت الناس يقولوللى أيه عيوب ومشاكل السكن فى الدور الأخير ؟
وربنا يبارك لكم

مشاكل الدور الاخير بإختصار:

1- عدم وجود اسانسير ..... ولو في اسانسير مشاكل اعطاله وصيانته

2- أكيد أكيد العزل الحراري والعزل ضد المياه يا إما معدوم او معمول اي كلام .... ففي الامطار نشع من السقف ... والشمس بتضرب في سقف حضرتك من الشروق للغروب يعني فرن وهاتحتاج تكييف بمواصفات اعلى من الفي الدور التحتيك لنفس المساحة.

3- صعود المياه .... ويا سلام لو موتور المياه عطل.

4- كل ما حضرتك بتطلع في الادوار لفوق ...... اسعار رفع الخامات او الاثاث بتزيد.

هي ديه العيوب الاساسية

صدقني الاول احسن بكتيير

تكلفة طلوع مواد التشطيب زى الرمل والاسمنت وهكذا ...بتكون اغلى من الادوار اللى تحت ...

الحرارة طبعا هتحس بيها جدا فى الصيف خصوصا لو السقف غير معزول ويمكن حلها بتركيب تكيفات لو الميزانيه تسمح ...

دائما الادوار الاخيرة بتكون غير مرخصة ...

فى حالة ضعف المياه او وجود مشاكل فى الماتور الناس اللى فى الادوار الاخيرة اول ناس بتحس بيها ...

عموما انصحك بالدور الثالث ...

مشكله الشمس فى الصيف+مشكله المياه فى الصيف و الشتا+لو مفيش اسانسير مشكله +الحوائط بتريح وتشقق لآنه احيانا بيكون الدور الاخير من غير اعمده+ تطليع مواد التشطيب والاثاث
*الميزه الوحيده انك بتكون معزول عن اى حاجه بتحصل فى الشارع

ربنا يباركلكم جميعاً
أنا دلوقتى فهمت ليه كل الناس عمالة تبيع فى الدور الأخير !!
جزاكم الله عنا خير الجزاء

اقتباس:

---

المشاركة الأصلية كتبت بواسطة م.احمد زكريا

مشاكل الدور الاخير بإختصار:

1- عدم وجود اسانسير ..... ولو في اسانسير مشاكل اعطاله وصيانته

2- أكيد أكيد العزل الحراري والعزل ضد المياه يا إما معدوم او معمول اي كلام .... ففي الامطار نشع من السقف ... والشمس بتضرب في سقف حضرتك من الشروق للغروب يعني فرن وهاتحتاج تكييف بمواصفات اعلى من الفي الدور التحتيك لنفس المساحة.

3- صعود المياه .... ويا سلام لو موتور المياه عطل.

4- كل ما حضرتك بتطلع في الادوار لفوق ...... اسعار رفع الخامات او الاثاث بتزيد.

هي ديه العيوب الاساسية

صدقني الاول احسن بكتيير

---

+11111111

كلام سليم تماماً, و ده اللي كنت داخل اقولهولك بالظبط...

انا طووول عمري ساكن في الدور الأخير للأسف, في شقة اهلي لاني غير متزوج حتى الآن...

اقدر اقولك انه مشكله حقيقيه في كل شئ بجد, و نصيحتي لاي حد بلاش الأخير...

و بردو بلاش الأرضي لانه من الأدوار السيئه جدااا من وجهة نظري و ده بسبب
الازعااااااج الغير طبيعي, و التراب اللي بيردم البيت, و الحشرات الكتيييير بكل انواعها
و مشاكل الصرف و البلاعات (ان وجدت)..... الأرضي سئ حتى في المصايف والله !!

رأي ببساطه... خير الامور الوسط, يعني الدور الثالث او الرابع الأفضل لو العماره 5 ادوار

الثاني و الثالث لو العماره 4 ادوار... دي الادوار الافضل و اللي مشاكلها اقل ما يمكن...

ربنا يوفقك للخير ان شاء الله...

بما اني ساكنة في الدور الاخير من 15 سنة احب اقول لك خلاصة العيوب والمزايا
مكانش في اسانسير و طبعا بتبقى مشكلة لما تبقى شاري حاجات تقيلة
السطح مكانش وكانت الخزانات مبهدلة السقف لحد ما عملوا خزانات جديدة وعزلوا السطح
بتحتفظ بالسخونة طول الصيف والبرودة طول الشتا
اللي هيجيلك هيتقطع نفسه فبالتالي مش هيجيلك تاني
ممكن ييجوا يقولولك هنركب شبكة محمول وتبص تلاقيها فوق دماغك
كل شوية حد يطلع يركب دش ولا يوصل نت وتلاقي دقدقة فوق دماغك
ولما ييجي العيد الكبير كله يجيب خرفانه وعجوله تدبدب فوقك طول الليل لحد ما ربنا يفتكرهم

المزايا بأة
لو العمارات اللي قدامك اوطى من عمارتك هتبقى مش مكشوف والدنيا خلا قدامك
لو جيرانك رزلين هتبقى فوق بعيد عن اي جيران كفاية جيران الدور بتاعك
بعيد عن اي خناقة تحصل بين الجيران
محدش هينقط على غسيلك انت بس اللي هتنقط عالجيران
لو عندك اسانسير مش هيبقى في مشكلة الا لو عطل
بالنسبة لي
عشان الدنيا خلا قدامي وشقتي هوا كل الشقق اللي تحتي مكشوفة والعمارات اللي قدامي سادة عليها الهواومشاكل منها ات
كل المشاكل اللي بامر بيها تعايشت معاها اتحلت
لو الشقة لقطة ما تسيبهاش

علي حسب الدور الاخير ده رقم كام.

انا فالاخير السادس ولا مشكلة مية ولا اي حاجة.

سعر طلوع المونة ( حتي لو غالي ماهو انتا مش هتطلع مونة مدي الحياة يعني ).

العزل الحراري لو مفيش انتا ممكن تعمله فالجزء من السطع اللي فوقيك بس يعني مش لازم سطح العمارة كله.

فالصيف ممكن حر شوية فالنهار بسبب ضرب الشمس فالحيطان بس ده عالكل الاخير بيبقي بزيادة بسبب السقف كمان فلو عزلته خلاص لاء مية مطر ولا سخونة شمس.

بالليل فالصيف جو بديييييييييييييييييع ومنظر رهييييييييييييييب احسن من الادوار الاولي اللي بتبقي محبوسة.

ده تجربتي مع السادس لمدة 20 سنة.

اكبر من مشكلة من واحد كان ساكن فى الاخير الحر انا شقتى كانت حر فظيع لان الشمس طول النهار ضاربة فى الشقف والحيطان حتى مع التكييف يعنى فى العادى مكنش يقدر يجيب اقل من 27 درجة لو اقل مش هيفصل لكن لحس حظى الدور اللى فوقى اتبنى وسكن الدنيا اتغيرت خالص الحمد لله

اول شقى الحرامى اللى جاى من السطح بيشوفها

اكتر عيوب الشقه فى الدور الاخير هيه الحراره فى الصيف ومياه المطر فى الصيف الحاجات التانيه ديه مش بتبقى مشكله ولو عاوز النصيحه اشترى فى الدور قبل الاخير

اقتباس:

---

المشاركة الأصلية كتبت بواسطة a.saad

اول شقى الحرامى اللى جاى من السطح بيشوفها

---

ايه يابو حميد ده بقي من الغيبيات لو مكتوبلنا تحصل هتحصل لو كانت مطوقة بكردون دبابات. طب مانقول بقي ان ساكني الدور الاخير اول ناس بيتم انقاذهم في حالة ( لا قدر الله ) لو العمارة وقعت.

أعتقد كل مشكلة وليها حل يعني :

- الدور الأول مشكلته الأزعاج لو في منطقة مزدحمة الحل ممكن نركب الشبابيك والبلكونات كلها ألوميتال دبل جلاس عازل للصوت وأتحلت المشكلة .

- الدور الأخير مشكلته الحرارة وتسرب المياه من الأمطار أو الخزانات والمشاكل التانية الأسانسير ومواتير مياه والحل عزل السطح بالكامل مع تهوية الشقة تهوية جيدة ونفتح على قد ما نقدر شبابيك قبل ما نشغل المكيف وقت الذروة وبالنسبة للأسانسير نتأكد أن الماكينة اللي راكبة حاجة نظيفة ماركة أعتمادية وقدرة الأحصنة بتاعتها عالية نفس الحال مع ماتور المياه تكون حاجة نظيفة .

اقتباس:

---

المشاركة الأصلية كتبت بواسطة AshTurbo

أعتقد كل مشكلة وليها حل يعني :

- الدور الأول مشكلته الأزعاج لو في منطقة مزدحمة الحل ممكن نركب الشبابيك والبلكونات كلها ألوميتال دبل جلاس عازل للصوت وأتحلت المشكلة .

- الدور الأخير مشكلته الحرارة وتسرب المياه من الأمطار أو الخزانات والمشاكل التانية الأسانسير ومواتير مياه والحل عزل السطح بالكامل مع تهوية الشقة تهوية جيدة ونفتح على قد ما نقدر شبابيك قبل ما نشغل المكيف وقت الذروة وبالنسبة للأسانسير نتأكد أن الماكينة اللي راكبة حاجة نظيفة ماركة أعتمادية وقدرة الأحصنة بتاعتها عالية نفس الحال مع ماتور المياه تكون حاجة نظيفة .

---

الله ينور عليك

انا ملاحظ ان فيه ناس بتتكلم وخلاص مع احترامي ليهم
زي الناس اللى قالت الدور الاخير مش بيبقى مبني على اساس ازاي يعني!! هو عشة ؟
والامطار بتتسرب وبتنشع السقف !!
انا في الدور التاسع اخر دور ولا ده حصل نهائي ايام السيول

اما بالنسبة للحر في الصيف فعلا بتبقى حر بس مع التكييف مش بتحس بحاجة وباليل لما تفتح الشبابيك منظر رائع وجو جميل
وبالنسبة للاسانسير برده فعلا لازم يكون شغال على طول واستمرار الصيانة ليه

دي العيوب اللى انا شايفها ومميزات زي ما قالوا الاعضاء

اقتباس:

---

المشاركة الأصلية كتبت بواسطة ashturbo

أعتقد كل مشكلة وليها حل يعني :

- الدور الأول مشكلته الأزعاج لو في منطقة مزدحمة الحل ممكن نركب الشبابيك والبلكونات كلها ألوميتال دبل جلاس عازل للصوت وأتحلت المشكلة .

- الدور الأخير مشكلته الحرارة وتسرب المياه من الأمطار أو الخزانات والمشاكل التانية الأسانسير ومواتير مياه والحل عزل السطح بالكامل مع تهوية الشقة تهوية جيدة ونفتح على قد ما نقدر شبابيك قبل ما نشغل المكيف وقت الذروة وبالنسبة للأسانسير نتأكد أن الماكينة اللي راكبة حاجة نظيفة ماركة أعتمادية وقدرة الأحصنة بتاعتها عالية نفس الحال مع ماتور المياه تكون حاجة نظيفة .

---

والله يا باشا صعب جدااا, حلول الاول و الاخير مش بالبساطه دي, و هقولك ليه
بحكم اني ساكن في الدور السادس من 15 سنه, و جربت الادوار الارضيه بردو في اكتر من مكان...

1- لو دور اول او ارضي, و هتركب دبل جلاس و قطاع عازل للصوت تمام.. ماشي
طيب في الشتاء مثلاً و انت عايز تدخل هواء للشقه, هتضطر تفتح الشباك اكيد,
يبقى مافيش حل للدوشه... و حتى لو صيف ممكن الجو يكون حلو و عايز تفتح الشباك, هيبقى صعب...

2- الدور الاخير مشكلته في العزل فعلاً, سواء حرارة او رطوبة و مياه...
هتعمل عزل فوق السطوح و هتدفع فيه مبلغ محترم لو مش هتعمل حاجه اي كلام طبعاً,
و انت اساساً دافع في الشقه مبلغ محترم, هتستحرم المبلغ في العزل, التشطيب هيكون اولى بيه اكيد...

بالنسبة للتكيفات... الشقه مش هتتهوى بالشكل البسيط ده اطلاقاً في الصيف خصوصاً,
و الادوار الاخيره بتتعامل معامله خاصه في التكيفات و تركيبها, يعني لو في مساحه
تكفيها 1.5 حصان... يقولك لأ تركب 2.25 حصان... ليه !!! علشان الدور الاخير,
و كفائة التبريد بتقل نظراً لزيادة درجة الحرارة الداخليه... و بالتالي تكاليف اكتر بردو

الاسانسير... والله العظيم مهما كان الكوالتي بتاع الاسانسير بكل اجزائه, بيعطل بردو

احنا عندنا في العماره مثلا شيندلر, اظن من افضل انوا الاسانسيرات في العالم حسب خبرتي المتواضعه كمهندس
اقسملك بعد 10 سنين بقى بيعطل كل اسبوع او 10 ايام لااااااازم, و اطلع 6 ادوار على السلم...

تخيل بقى لو مثلاُ مراتك حامل !!!! او والدتك و والدك جايين يزوروك !!!! او انت شايل حاجات كتير !!!

عايز اقولك ان الاسانسير لما بيعطل احنا اللي بنبقى خايفين عليه و عايزيين نصلحه
و نجري نتصل بفلان و علان, و الجيران ولاااااا هما هنا, علشان مش فارق معاهم كتير !!!

كان عندنا خزانات فوق السطوح مبهدلة الدنيا و الشقة عندنا و المياة مبهدلة السقف,
قفلنا الخزانات و شيلناها خالص و كسرنا البلاط كله في السطوح و عزلنا فوق الشقه و بلطنا تاني,
طبعاً كل ده على حسابنا الخاص, و تخيل كم المصاريف اللي دفعناه علشان ساكنيين في الدور الاخير !!!

والله عن تجربة لمدة 15 سنة في الدور الأخير... نصيحة اخوية, بلاااااااااااااااش والله

نصيحة لوجة الله
لو هيدوك علية فلوس اوعي تسكن في الدور الاخير
حرارة الشمش قاتلة هتحس انك قاعد في سونة وهتكرة المكان الي انت ساكن فية
مشكلة الحرارة حتي لو عملت عوازل ملهاش حل لازم يكون اعلي منك دور عشان درجات الحرارة

اقتباس:

---

المشاركة الأصلية كتبت بواسطة ghazy12

والله يا باشا صعب جدااا, حلول الاول و الاخير مش بالبساطه دي, و هقولك ليه
بحكم اني ساكن في الدور السادس من 15 سنه, و جربت الادوار الارضيه بردو في اكتر من مكان...

1- لو دور اول او ارضي, و هتركب دبل جلاس و قطاع عازل للصوت تمام.. ماشي
طيب في الشتاء مثلاً و انت عايز تدخل هواء للشقه, هتضطر تفتح الشباك اكيد,
يبقى مافيش حل للدوشه... و حتى لو صيف ممكن الجو يكون حلو و عايز تفتح الشباك, هيبقى صعب...

ماهو في الصيف غالبية الوقت مكيفات فممكن التهوية تبقى الصبح ساعة مثلاً والعصر ساعة وبليل ساعة كذلك في الشتاء الجو بيبقى بارد مش بنفتح الشباك مدة كبيرة يكفي نهوي الشقة ونشمسها بنفس الطريقة فمش هتبقى نسبة الأزعاج كبيرة زي الأول ويبقى أتغلبنا عالمشكلة بنسبة 70% مثلاً .

2- الدور الاخير مشكلته في العزل فعلاً, سواء حرارة او رطوبة و مياه...
هتعمل عزل فوق السطوح و هتدفع فيه مبلغ محترم لو مش هتعمل حاجه اي كلام طبعاً,
و انت اساساً دافع في الشقه مبلغ محترم, هتستحرم المبلغ في العزل, التشطيب هيكون اولى بيه اكيد...

لازم قبل ماحد يشتري دور أخير يتأكد أنه معزول ليه أشتري دور أخير وأعزله أنا وأتحمل التكاليف وأعتقد الغالبية دلوقتي في العمارات الجديدة بيعزلوا السطح .

بالنسبة للتكيفات... الشقه مش هتتهوى بالشكل البسيط ده اطلاقاً في الصيف خصوصاً,
و الادوار الاخيره بتتعامل معامله خاصه في التكيفات و تركيبها, يعني لو في مساحه
تكفيها 1.5 حصان... يقولك لأ تركب 2.25 حصان... ليه !!! علشان الدور الاخير,
و كفائة التبريد بتقل نظراً لزيادة درجة الحرارة الداخليه... و بالتالي تكاليف اكتر بردو

أرتفاع درجة الحرارة في الأدوار العليا مفيش فيها أختلاف في نفس الوقت الأرتفاع مش بنسبة كبيرة عشان محدش يخاف فممكن التهوية قبل فتح التكييف تنزل درجة الحرارة ولو بنسبة بسيطة والتكييف هيتكفل بالباقي مع الألتزام بالخطوات الصحيحة للتبريد زي توجيه الريش للسقف أول ما يشتغل التكييف لمدة خمس دقائق وتشغيل التربو اللي هيسرع المدة اللازمة للتبريد .

الاسانسير... والله العظيم مهما كان الكوالتي بتاع الاسانسير بكل اجزائه, بيعطل بردو

احنا عندنا في العماره مثلا شيندلر, اظن من افضل انوا الاسانسيرات في العالم حسب خبرتي المتواضعه كمهندس
اقسملك بعد 10 سنين بقى بيعطل كل اسبوع او 10 ايام لااااااازم, و اطلع 6 ادوار على السلم...

تخيل بقى لو مثلاُ مراتك حامل !!!! او والدتك و والدك جايين يزوروك !!!! او انت شايل حاجات كتير !!!

عايز اقولك ان الاسانسير لما بيعطل احنا اللي بنبقى خايفين عليه و عايزيين نصلحه
و نجري نتصل بفلان و علان, و الجيران ولاااااا هما هنا, علشان مش فارق معاهم كتير !!!

شيندلر بيعطل بعد 10 سنين ! يانهار ملوش معالم طيب بما أن حضرتك عندك خبرة في الأيسانسيرات أية رأيك في الماركات الأيطالية عموماً زي السيكور والفاير ومين أحسن ولو واحد ساكن في الدور ال 12 الأيسانسير الأيطالي هيبقى كويس معاه وكام القدرة الحصانية اللازمة لتحمل الأدوار دي علماً بأن الدور بأكمله شقة واحدة يعني عدد العائلات 12 مثلاً .

كان عندنا خزانات فوق السطوح مبهدلة الدنيا و الشقة عندنا و المياة مبهدلة السقف,
قفلنا الخزانات و شيلناها خالص و كسرنا البلاط كله في السطوح و عزلنا فوق الشقه و بلطنا تاني,
طبعاً كل ده على حسابنا الخاص, و تخيل كم المصاريف اللي دفعناه علشان ساكنيين في الدور الاخير !!!

والله عن تجربة لمدة 15 سنة في الدور الأخير... نصيحة اخوية, بلاااااااااااااااش والله

---

كل النقاط اللي ذكرتها صحيحة طبعاً بس الحكاية مش مسألة عيوب المسألة هي أزاي نتأقلم مع العيوب الموجودة طبعاً بجانب ده التمتع بالسعر المنخفض نسبياً للدور الأخير .

اقتباس:

---

المشاركة الأصلية كتبت بواسطة mohamedbook

نصيحة لوجة الله
لو هيدوك علية فلوس اوعي تسكن في الدور الاخير
حرارة الشمش قاتلة هتحس انك قاعد في سونة وهتكرة المكان الي انت ساكن فية
مشكلة الحرارة حتي لو عملت عوازل ملهاش حل لازم يكون اعلي منك دور عشان درجات الحرارة

---

ربنا يباركلك :16::16::16:
والله أنتوا على راسى من فوق ونعم الناس والأخوة
آراء وخبرات رائعة
جزاكم الله عنا خير الجزاء

بالتوفيق وأن شاء الله تلاقي الشقة المناسبة وتملاها بركة ويكون وشها حلو عليك .

انا كل ما بطلع السلم
اقول لوالدي ولوالدتي .... الله يسامحكم
حسبي الله ونعم الوكيل :))))
ساكنين في السابع ... من غير اسانسير .. غير ان صاحب العمارة مسكن السطح وعاملها قوض (ربنا كبيــــــر) ومسكنها طلبه ... وهما عاملينها زريبة الا ما رحم ربي ... ميه ويدلقوا وزرع ويسقوا .. وووكل ده تلاقية نازلك في الشفة
وسقف المطبخ باظ ... وسقف الصالة اللي تحت الزرع والجنينة اللي عاملينها
ده غير الشتا لو مطرت ... تلاقي الشقة عندنا بقيت حمام سباحة من السقف
وياماااا عملنا حلول وعزلنا السقف وخلافه بس مفيش فايده
كلمة اخيرة يابني ... وسمعتها من ستي وهي بتقولها لوالدتي
البني أدم بيكبر والسلم مابيكبرش
ده غير ان محدش بقي يزورنا علشان السلم الملعون ده
7 ادوااااااار ... والله كل ما اطلع عليه بعيط
لو حد يبدل يدينا شقة في البدروم وياخد شقتنا هههههههههههه
طولت عليكم .... واقعدو بالعافية :)))

@AshTurbo

كتجربة فعلية للماركات الايطاليه, انا ماجربتهاش بصراحه, لكن اللي اعرفه انها بجوده عاليه و كويسه جدا,
و سعرها ارخص شويه من الماركات العاليه زي شيندلر, بس الكفائه كويسه... و اظن سيكور أفضل...

بالنسبة لعندك, 12 شقه مش ضغط اطلاقاً على الاسانسير مهما حصل و هي مش بتتحسب بقوة الموتور,
هي بتتحسب بعدد الاشخاص داخل الاسانسير و طبيعة الاستخدام و عدد ادوار العمارة, و بالتالي ممكن
لو افترضنا انك محتاج اسانسير يساع 4 افراد, و متوسط وزن الفرد 80-100 كجم, يبقى انت محتاج
اسانسير يشيل في حدود 400 كجم... هتلاقي موجود واحد بيشيل 430 او 450 مثلاً
طبعاً الزيادة مهمه علشان لسه وزن الكابينه (في حدود 40 كجم تقريباً) و ممكن الاوزان تختلف...

عموماً... سواء ايطالي ألماني امريكي, اي شئ فيه ميكانيكا لازم الاجزاء بتاعته يحصل فيها اعطال
بس هي الفكره في الجوده انه يستحمل شغل شاق لوقت اطول من الماركات التانيه الأقل جوده و اعطال اقل,
و لازم صيانة دورية من شركة محترمه و إلا هتلاقي الاسانسير ده خرده في ظرف 10-12 سنه...

ربنا يوفقك للخير ان شاء الله...

تحيــاتي...

اقتباس:

---

المشاركة الأصلية كتبت بواسطة ghazy12

@ashturbo

كتجربة فعلية للماركات الايطاليه, انا ماجربتهاش بصراحه, لكن اللي اعرفه انها بجوده عاليه و كويسه جدا,
و سعرها ارخص شويه من الماركات العاليه زي شيندلر, بس الكفائه كويسه... و اظن سيكور أفضل...

بالنسبة لعندك, 12 شقه مش ضغط اطلاقاً على الاسانسير مهما حصل و هي مش بتتحسب بقوة الموتور,
هي بتتحسب بعدد الاشخاص داخل الاسانسير و طبيعة الاستخدام و عدد ادوار العمارة, و بالتالي ممكن
لو افترضنا انك محتاج اسانسير يساع 4 افراد, و متوسط وزن الفرد 80-100 كجم, يبقى انت محتاج
اسانسير يشيل في حدود 400 كجم... هتلاقي موجود واحد بيشيل 430 او 450 مثلاً
طبعاً الزيادة مهمه علشان لسه وزن الكابينه (في حدود 40 كجم تقريباً) و ممكن الاوزان تختلف...

عموماً... سواء ايطالي ألماني امريكي, اي شئ فيه ميكانيكا لازم الاجزاء بتاعته يحصل فيها اعطال
بس هي الفكره في الجوده انه يستحمل شغل شاق لوقت اطول من الماركات التانيه الأقل جوده و اعطال اقل,
و لازم صيانة دورية من شركة محترمه و إلا هتلاقي الاسانسير ده خرده في ظرف 10-12 سنه...

ربنا يوفقك للخير ان شاء الله...

تحيــاتي...

---

متشكر جداً باشمهندس غازي على الرد الوافي بارك الله فيك وتحياتي لحضرتك .

يا جماعة بلاش مبالغة
الدور الاخير مش بشع للدرجة دي
على حسب العمارة والمنطقة
وبعدين هيا ادوار مخالفة لا سمح الله
ابقى اتأكد وشوف رخصة العمارة عشان تتأكد انك تمام

انا طول عمري ساكن في الدور الأخير بس التاني هههههههه وكان فعلا فرن وكان طبعا بيت العيله وكنا اول مالدنيا تليل نطلع فوق السطح ويبقي مننا للسما عدل وكان بيبقي المنظر تحفه لحد مانسقع وننزل كنا اول مانفتح الباب نلاقي الحر مقابلنا كاننا داخلين النار

دلوقتي انا ساكن في اول علوي ومساوئه اني مش بعرف افتح شبابيك عشا الجيران ولو سبت الشقه اسبوع بلاقيها مردومه تراب واي صوت ليك بيبقي واصل الشارع والعكس ده غير ان الشمس مش بيتدخل لشقه

انا لو هشتري هدور من اول التاني علوي لحد الرابع

بلاش الاخييير هتكره الشقه انا اللى مصبرنى انها ايجار وان شاء الله ماشى قريب
اولا الشمس مخليه الشقه نااار بمعنى الكلمه يعنى ساعات اجلس على كرسى فى الغرفه الاقيه سخن !!!!!
الشتاء برد لان الشمس اصلا ضعيفه فى الشتاء
المياه بتصعد فى الوقت اللى على مزاجها
لو مفيش اسانسير هيطلع نفسك خصوصا لو شايل طفلك او طلبات وغيره كتيييير