هل نحن مستعدون ان نقود

**aymanmaly** · 02-07-2011 01:56 PM

جلست اليوم مع نفسي افكر بصورة منطقية

بعد مناقشات طويلة مع الاهل و الاصدقاء من يوم 25 يناير الى يومنا هذا
و كلنا فجأة اصبحنا خبراء سياسين و فاهمين و نحلل و نحط البدائل

انا على مدي عمرى 44 عام تربيت على عدم الاكتراث بالحالة السياسية فى مصر
و اظن ان معظم جيلى تربي على هذا

طيب اية الى خلانى فجأة افهم سياسة و اناقش و ادى الاختراعات لحل المشكلة

طيب مش المفروض ادى نفسي وقت اتعلم و افهم ؟

طيب انا تخرجت من الجامعة بعد اربع سنين و 12 سنة مدرسة و لم اخرج بالكثير

و عندما دخلت للحياة العملية فوجئت بانى احمل ورقة اسمها المؤهل الدراسي و محتاج اتعلم من اول و جديد من خلال الخبرة العملية و دة اخذ مني سنين طويلة علشان اتعلم و انجح فى عملى

و تذكرت بعد تخرجى و عملى بعد كام شهر قلت انى احسن واحد فى شغلى و اصبحت ذو خبرة و علقت على مديرى و قلت انا فاهم اكثر منة و هو بيعمل حاجات غلط

و اكتشفت مع الوقت ان امامى الكثير لاتعلمة و الخبرة محتاجة وقت و مجهود و علم و انى هافضل اتعلم الجديد كل يوم حتى مع سنى هذا هافضل اتعلم و اشوف جديد

و طبعا تم الربط بين موقفى فى العمل مع بداية تخرجى و موقفى السياسى الان

و طبعا وصلت لنتيجة

ان امامى الكثير من الوقت لاتعلم

ولكن السؤال

هل انا مستعد لان اقود
ولا
لازلت محتاج وقت
فاقاد حاليا حتى يأتى الوقت الى اقود فية

هل انا فى فترة فاكر نفسي فاهم و انا لازلت فى مرحلة التعلم

هل لو حدثت انتخابات مجلس شعب هاعرف اختار من يمثلنى ولا انا محتاج وقت اعرف الشارع السياسي لكى احسن الاختيار

بجد ارهقنى التفكير

دى جلسة مع نفسي

هل انتم مثلى ؟

**HOSSAM99** · 02-07-2011 03:41 PM

أنا عن نفسي صورة طبق الأصل من اللي عند حضرتك
اللي شاغل بالي سؤال : أنا هاختار ممثل دائرتي و رئيس الجمهوريه علي أي أساس

إحنا ببساطه معشناش الحاله اللي عايشنها دي قبل كده ...بالإضافه إلي إننا بقينا شكاكشن جدا جدا جدا ممكن شنك في نفسنا و نحكم عليها بالفشل في الإختيار و قلة الخبرة .. و ده بسبب اللي شوفناه إن كل البهوات اللميع طلعوا حراميه و بيزيدوا كل يوم واحد و كل يوم واحد بمصيبه جديده

هانعاني شويه لكن بعد كده هانعرف نشيل سنه ديبرياج و ندوس سنه بنزين و سنه سنه و بعد كده نتعلم ننقل الغيارات و بعد كده المشي و هكذا لغاية أما نتعلم نعمل صيانه للعربيه و نفكها حته حته
و وقتها سنشارك و بكل إجابه و نبدي الآراء دون خوف و نختار من تراه خبرتنا أنه الأصلح

**Bassem Raafat** · 03-07-2011 10:59 AM

الظاهر كده يا عمده إن حضرتك وأستاذ حسام وأنا بس إللى مش عارفين حاجه وباقى المنتدى وربنا يباركلنا فى أعضاءه عارفين يقودوا الحمد لله .

**hobiko** · 03-07-2011 11:07 AM

كلنا هذا الرجل ...... الديموقراطية و الأنتخابات و الحرية ..... كل دى حاجات جديدة علينا

الحل هو الممارسة ..... الممارسة المنتظمة ...... الممارسة باستمرار

مش من أول مرة حنختار صح ..... مش من أول مرة حيبقى مجلس الشعب مثلا فى أحسن صوره ..... مش من أول مرة حنختار احسن رئيس جمهورية

و هنا بتظهر أهمية استمرارية الممارسة الديموقراطية و تداول السلطة ...... عشان لما نغلط المرة دى ..... نتعلم من غلطنا .... و نصلح الغلط المرة اللى جاية

**aymanmaly** · 03-07-2011 11:22 AM

الخوف اننا ندفن رؤوسنا فى الرمال
ولا نواجة انفسنا
بل نفتى بالذى لانعلمة لمجرد الفتوي
او لمجرد السمع
ممكن نفتى فى عرية
ممكن نفتى فى موبايل
لكن ان نفتى فى مصير وطن ..................

**Bassem Raafat** · 03-07-2011 11:28 AM

المشاركة الأصلية كتبت بواسطة aymanmaly

الخوف اننا ندفن رؤوسنا فى الرمال
ولا نواجة انفسنا
بل نفتى بالذى لانعلمة لمجرد الفتوي
او لمجرد السمع
ممكن نفتى فى عرية
ممكن نفتى فى موبايل
لكن ان نفتى فى مصير وطن ..................

وللأسف فى كتير مننا بيعمل كده .