الموضوع: يعني لما اخبط حد اطلع اجري احسن ؟ ؟

المشاركة الأصلية كتبت بواسطة romio4lovee

انا مرة خبطت اوكتافيا وانا كنت بتعلم سواقة و خدشت له الاكصدام اللي ورا و الراجل كان محترم وقالي خد بالك بعد كدا عشان العربية في ستين داهية بس لو كان بني ادم !!

دي ست محدثة نعمة فعلا و كان ممكن تاخد الي هي عايزاه بهدوء وانت كنت محترم معاها للاخر ومش غلطان اني موقفتش لان انا لو مكانك هنزل واعتذر برضة

مش كل الناس زي بعضها فيه ناس تقولك فداك والحمد لله انك كويس وناس تقولك لاء

وناس لمجرد انك تكسر عليهم تلاقيهم جايين يشتمو ويزعقو طب بتزعق ليه ماهو ماحصلش حاجة اساسا ماتبقاش فاهم ! !

المشاركة الأصلية كتبت بواسطة ahmed2y

انت صح وعداك العيب وموقفك بيدل ان الدنيا فيها خير وفى ناس بتبقى اعوذ بالله بتموت فى الفلوس وميعرفوش اننا كلنا معرضين للخطا عشان كدة لو الواحد اتخبط او حصلو اى حاجة فى العربية بيقول عوضى على الله عشان لما يجى عاليا الدور واغلط فى حد ربنا يوقفلة ابن الحلال


فكرتنى سنة 2005 كنت راكب عربية 127 بتاعت الشركة وكنت رايح بعمل كام مشوار ودخلت البنك الاهلى وخرجت ومشيت فى اتجاة الكوربة فى يوترن داخلة وخبطت وسبحان الله خبطت ومش عارف انا اصلا خبط فى اية عربية ولا رصيف ولا اتوبيس ولا ميكروباص مش عارف طلعلى الراجل منين ونزلت من العربية متعور والاقى نفسى خابط مرسيدس 200 فى القايم بالظبط واتعورت الراجل كان قمة فى الزوق شافنى متعور قالى فيك حاجة قولتة لا الحمد لله قولتلة تامر باية وانا اعملهولك قالى ولا حاجة بقيت اتحايل عالية واشد فية وهو يقولى مش عاوز حاجة الحمد لله على كل حاجة

ربنا يخليك ومش انا لوحدي اللى بتصرف كدة صدقني ناس كتير كدة

الواحد طالما معترف انه غلطان سعتها هيبقبل اي حاجة

المشكلة الاكبر انه لما يبقى شايف انه مش غلط وانه ماعملش حاجة ويجيب الغلط عليك

هي دي الكارثة ! !

المشاركة الأصلية كتبت بواسطة Ashraf_Ibrahim

من ضمن الناس المحترمة برده اللي قابلتها كنت في صلاح سالم الساعة 5 الفجر وماشي فيه على 120 تقريبا وكان قدامي لانسر كريستالة وقدامه اوكتافيا وقدامه تاكسي
انا في العادة بكون كاشف الطريق كله ومش ببص للعربية اللي قدامي بس ولكن ببص لبعديها بعربيتين تلاتة عشان اقدر اتفادى اي موقف
بتاع التاكسي فجأة فرمل جامد جدا
بتاع الاكوتافيا لحق نفسه ووقف وبتاع اللانسر كذلك وتبقا العبد لله بالفيرنا العظيمة
المهم حاولت قدر الامكان اني اقف بس متحاولش
ههههههههههههههههه
فرملت على قد ما قدرت وقلت بدل مادخل فيه وش في ضهر كامل لا اخد جنب في جنب المهم لما قربت منه حاولت افاديه فخبطت اكصدامه الخلفي اليمين باكصدامي الامامي شمال
النتيجة كانت ان الاكصدام بتاع اتكسر نتيجة الضغط المفاجيء عليه من عربيتي
والعجيب ان عربيتي طلعت منها زي السكينة من الحلاوة بدون اي شيء
المهم وقفت كالعادة مانا مبخبطش حد واجري
وقفت على جنب ونزلت طبعا هو نازل شبه متنرفز ودا حقه
روحت وسلمت عليه وقلتله انت عامل ايه قلي الحمد لله
قلتله انت فيك حاجة قلي لا الحمد لله
كان معايا اخويا نازل يتخانق بقا ويقله ازاي تفرمل كدة ومش ازاي وبتاع المهم شخطت فيه وقلتله اسكت خالص
قلتله حضرتك مش غلطان ولا انا غلطان الغلط من التاكسي اللي كان العربية اللي قدام اللي قدامك
بس من حقك اني اعملك عربيتك
شوف انت تؤمرني بايه وانا تحت امرك
المهم بص لعربيته شوية وقلي هقلك ايه يعني
الحمد لله اتوكل على الله
قلتله انا بكرر تاني انا تحت امرك في عربيتك دا حقك مش حاجة مني دا حقك !
فقلي لا الحمد لله اتفضل انت ومشينا على كدة
الموقف دا علمني ان لما تخبط حد او كدة انزل اطمن عليه الاول واتأكد انه هو كويس وان مفيش حد متعور او ما شابه والعربيات تولع في داهية هييجي غيرها بس البني آدم عمره ما يتعوض أبدا !
ربنا يحمينا جميعا من الطريق وشره يا رب !

المعاملة الكويسة عمرها مابضيع حق الواحد بالعكس يمكن لو كنت جريت وجري وراك وجابك كان الوضع اختلف

فالواحد بيعمل الخير ويرميه في البحر وماتبقاش منتظر من اللى بتعامله كويس انه يردلك المعاملة دي بالمثل

بالعكس انت اعمل اللى عليك والباقي على ربنا وزي مانت هتغلط وهتنزل تعتذر اكيد لما حد يخبطك بدون قصد هتلاقيه نزل اعتذر

المشاركة الأصلية كتبت بواسطة kogak1987

والله كل اللي صعبان عليا في الموضوع ده سواق السوت هانوم اتأخر على العيال و غير كده ازاي مستحمل الست دي على ودنه طول الطريق ؟!! ده انت ساعة ولا ساعتين و مخلصتش منها .. تخيل ده اللي عايش معاها .. الحمد لله انها جت سليمة و الظابط طلع محترم المهم سلامتك

اكيد هو متعود عليها xD

هههههههههههههه

المشاركة الأصلية كتبت بواسطة l0new0lf

بص انا مش هاطبطب عليك زى ما كل اللى كتب قبلى عمل لان سيادتك غلطت و اكتر من مره
اولا الحمد لله على السلامه

الله يسلمك ربنا يخليك

ثانيا: واحد بيجرى و كسر عليك و الحمد لله محدش اتخبط ولا حد اتعور يبقى تحمد ربنا انه سلم مش تطلع تجرى وراه
جريت وراه و جبته هتعمل له ايه يعنى هتكسر عليه؟ يبقى انت فرقت ايه عنه؟

انا معاك في النقطة دي واني ماكنش المفروض اني اتنرفز من حاجة اتعودنا عليها بس بجد سعات ناس بتخليك تفقد اعصابك وتلاقيها بتعمل حجات غريبة اكنها اشترت الشارع باسمها ومش فارقة معاها اي حاجة

ثالثا: طريق المريوطيه ده مش طريق سريع و فيه اصلاحات كتيره و شغل و المهم ان كله مداخل و مخارج من اليمين و الشمال يعنى ايه تجرى فى طريق زى ده؟

انا اقصد شارع الهرم من عند منطقة المريوطية وفي جميع الاحوال الشارعين مايسمحوش بالجري كل الفكرة ان صاحب الفيرنا خلاني اخرج عن شعوري وافقد اعصابي وانا اعترف ان ده اكبر غلطة في الموضوع

رابعا: سيادتك بتتخطى واحد من على يمينه و المفروض التخطى من على الشمال

والله يا باشا ده كلام 10/10 وانا مع حضرتك في النقطة دي بس ده يتطبق لو كل الناس ماشية بطبق تعليمات المرور زي مالكتاب بيقول لكن لما تلاقي مثلا واحد ماسك الشمال ومدي انتظار وبيتكلم في الموبايل وماشي على مهله ده هتعمل معاه ايه ! لما تلاقي سواق مكروباص واقف في نص الطريق !

فيه مواقف كتييير اوي في شوارع المحروسة بتبين ان مافيش اي حد بيتلزم باداب المرور مطلقا

والمفروض الصح اني لو ماشي شمال ارعش نور للي قدامي يوسعلي عشان اعدي لكن ده مابيحصلش تماما ! بالتالي مابيكونش فيه حل غير انك تتجاوز من اليمين بس طبعا تكون كاشف الرؤية قبلها

خامسا: واحد يمينك رمى عليك و شمالك مش فاضى يبقى الصح انك تخبط الغلطان اللى على يمينك لان الغلبان الى على شمالك ملهوش زنب انك تعاقبه بانك تخبطه عشان غلطة واحد تانى
سادسا:بتاع الموتسيكل لو كنت خبطته (مع ان هو الغلطان) و كان اتعور كنت هتدخل فى متاهات جامده, و لو كان مات كنت هاتخش فى حوار القتل الخطا

ماهو ردة الفعل دي بتطلع بشكل تلقائي حاول تتخيل انك تكون ماشي وفجاة واحد يرمي عليك هتلاقي نفسك بشكل تلقائي رحت حادف عكس ولو سنة بسيطة عشان تتفادى ! مش هيجي في بالك سعتها انه غلطان وانك تخبط الغلطان كل اللى هتبقى بتفكر فيه انك تتفاداه ودي ردة فعل تلقائية بتطلع بدون تدخلك

شفت كام غلطه اتعملوا بسبب انك سخنت ان واحد عمل حاجه غلط و طلعت جريت وراه؟
لكن
وقوفك بعد ما خبطت العربيه و عرضك للتصليح ده يبين انك محترم و ابن ناس محترمين
و هو ده اللى خلى ربنا يبعت لك ضابط محترم و وقف معاك
ياريت بس نفكر قبل ما نعمل اى حاجه و بلاش شغل الافلام الاكشن بتاعة ال ام بى سى
و ربنا يهدى

ربنا يخليك والواحد والله على قد مابيقدر انه في الشوارع الزحمة والسكنية انه يكون ماشي على مهله لو ماكنش عشان العربيات علشان الناس اللى بتعدي السكة مش اكتر من كدة وربنا يسترها معانا كلنا

المشاركة الأصلية كتبت بواسطة Axel

اولا : متزعلش مني بس اكبر غلط انك اتنرفزت و طلعت ورا الواد ده
الاشخاص اللي زي دول المفروض تكبر دماغك منهم و تخليك هادي يا راجل ده انت ع وش ليسانس ...احم قصدي ... بكالريوس اظاهر اني اتعديت من الست ديه ههههه

ثانيا : نيجي للموقف بتاع اللانسر و النيسان ههههه
هي الست ديه عمرها ما ركبت عربيات زيرو قبل كده و لا ايه قولها ابقي اغسليها و اكويها و كيسيها و شيليها في الدولاب ؟؟
و طبعا انت معملتش اي حاجة غلط بالعكس ده اللي عملته بيدل انك شخصية محترمة انما اللي زي ديه مش لاقي حاجة اقولها ههههههه
و الواحد ياما اتخبط و خبط و لو الشخص اعتذر خلاص طالما اعترف بغلطه و لو التكلفة عالية مش هقدر عليها لوحدي ممكن بالنص او اللي يقدر عليه لو هو عرض انما مش غصب عنه انما طالما بسيطة فمش محتاجة القلق ده كله و شرطة عسكرية و نقطة و زعيق ع حتة مراية و واضح ان مخها ابيض من الصيني بعد غسيله ال ميكانيكي ال ههههههه
و كمان بتقول انها جايبة سواق يعني اللي يعين سواق معتقدش انه هيبص لمبلغ زي ده
و اكبر دليل انك صح ان الظابط قالك اتكل ع الله و خد حاجتك
مش عارف جوزها ده ملوش كلمة في الموقف خالص اكيد زييها الطيور ع اشكالها تقع

طبعا الغلط مني من الاول ودي حاجة انا متفق عليها ومش بعترض دي اول نقطة

تاني حاجة انا مقدر عصبيتها الزائدة نوعا ما لاني لو مكانها ولسه شاري العربية زيرو ويجي واحد يخبطهالي اكيد هيبقى موقفي نفس موقفها ويمكن انيل كمان

اما بالنسبة لزوج المدام فشكله كدة كان رافع الاريل ماكنش ليه اي كلمة في الموضوع نهائيا لدرجة اني ماسمعتش صوته بالمرة ! !

المشاركة الأصلية كتبت بواسطة alaa99991111

اولا هو ده الغلط وانك تعمل غرز
لكن تصرفك بعد كده انك وقفت وتعاملت باحترام مثالي جدا ومشكور عليه

ده صحيح وانا معترف بالغلط ده

والتصرف اللى طلع مني ده نتيجة لاحساسي بالغلط مش اكتر وربنا يسترها معانا كلنا