الموضوع: يعني لما اخبط حد اطلع اجري احسن ؟ ؟

السلام عليكم ورحمة الله وبركاته

بصراحة انا حصل معايا موقف وانا لحد دلوقتي مش مصدق اللى حصل ! !

انا هحكي اللى حصل بالظبط ولو كنت غلطت ياريت تنوروني الا الواحد من سعتها حالف انه لو لا قدر الله خبط في اي حد مش هيقف ولا حتى هيسأل

اللى حصل اني كنت ماشي في شارع الهرم الساعة تقريبا 11 بليل قرب المريوطية كدة وانا ماشي لقيت واحد معاه فيرنا وراح رامي عليا جامد وخد غرزة من قدامي ماتتخدش اساسا

نرفزني وقلت لازم اجيبه اهزأه

شديت شوية لقيت قدامي عربية نيسان صني بصيت على اليمين لقيته فاضي لاني مش متعود ادخل يمين الا لما اتاكد ان مافيش حاجة وتبقى الرؤية واضحة قدامي

دخلت يمين لقيت واحد من بتوع موتسكلات الدليفري فجاة تطلب معاه انه ياخد شمال من غير اي اشارات ولا اي حاجة

لقيته بيرمي عليا فكانت ردة الفعل الطبيعية مني لما تلاقي حد بيكسر عليك انك تكسر العكس

كسرت الدركسيون شمال ورديته يمين علطول لان كان فيه عربية جمبي بس للاسف خبطت في العربية اللى جمبي من نحية الشمال

المهم اديت انتظار ووقفت على اليمين ونزلت بصيت على عربية الراجل قبل مابص على عربيتي

الحمد لله محصلش حاجة غير ان المرايا عندي اتقفلت عشان ضم عادي وهو مرايته عشان ضم كهربا فاتخلعت من مكانها لكن ماحصلش اكتر من كدة (لان كل اللى حصل ان العربيتين لمسو في بعض وانا رديت العكس علطول)

قلتله انا اسف حقك عليا واحد بتاع موتسكل حدف عليا فرميت عليك غصب عني وشوف انت عايز ايه وانا تحت امرك

المهم طلع الراجل سواق وقالي انا العربية مش بتاعتي انا سواق وبتاعة المدام والكلام معاها

لقيت ست نزلت من العربية ( العربية نوعها نيسان صني ) الست عمرها تقريبا في اوائل التلاتينات

وده الحوار اللى حصل بيني وبينها

هي :اول مانزلت بتزعق ومنك لله وانتو شباب مستهترين ومش حاسين بالفلوس والعربية زيرو موديل 2011

انا : حضرتك انا اسف وانا اكيد مكنش قصدي اني اخبط عربيتك وانا ماقلتش اني مش غلطان انا عارف اني غلطان بس الموتسكل حدف عليا وردة الفعل دي طلعت مني بشكل تلقائي وعموما الحمد لله الموضوع بسيط ومحصلش حاجة واللى حضرتك عايزاه هعملهولك

هي : انا لازم اوديك القسم دي عربية 2011 وزيرو ولسه جايباها


انا : حضرتك الموضوع مش مستاهل احنا ممكن نحل المسألة بشكل ودي الموضوع بسيط والمرايا مافيهاش حاجة غير انها اتغلعت بس من مكانها شوفي حضرتك نروح عند اي حد يصلحها وانا مسؤل عن كل التكاليف

هي : لا العربية زيرو وموديل 2011 مش هخلي ميكانيكي يلعب فيها


انا : حضرتك مين جاب سيرة ميكانيكي ؟ ؟ كل اللى حصل المرايا عشان ضم كهربا لما انا خبطتها واتقفلت اتكسرت القاعدة بتاعتها ودي حاجة بسيطة ولو حضرتك عايزة مرايا تانية انا ماعنديش مشكلة وبرضوا حضرتك هدي نفسك والموضوع مش مستاهل انا وقفت وقلتلك حقك عليا وانا غلطان انا لا جريت ولا مشيت ولا حتى نزلت قلت اني مش غلطان

هي : طلعت الموبايل واتصلت تقريبا بجوزها وبتقوله في التليفون " شباب مستهترين خبطوني بعربية لانسر قلت في نفسي انتي مش شايفة علامة التويوتا ولا ايه -- "

انا : خلاص حضرتك هدي نفسك والموضوع مش مستاهل واتفضلي ارتاحي جوة العربية لحد مازوج حضرتك مايجي

هي : مش مبطلة زعيق ومصرة انا لازم اوديك القسم وانتو مستهترين والعربية زيرو ولسه جايباها


انا : قلتلها حضرتك القسم مش هيعملك حاجة عشان ماحصلش حاجة غير ان قاعدة المرايا اتكسرت اكتر من كدة ماحصلش والحمد لله عربيتك مافيهاش ولا خدش فاكيد القسم مش هيعمل لحضرتك محضر عشان مرايا وانا بقول لحضرتك اللى انتي عايزاه هعملهولك الموضوع مش مستاهل قسم ولا حاجة

المهم شوية ولقيت تاكسي جيه وقف قدامنا وعربية نيسان صني برضوا

العربية النيسان نزل منها زوج المدام والتاكسي نزل منه اتنين من الشرطة العسكرية

الظابط بيكلم المدام : ايه اللى حصل

هي : عمالة بتتكلم بزعيق شباب مستهتر وعربية زيرو وخبطوني

الظابط : حضرتك اهدي طيب وماتزعقيش وفهميني ايه اللى حصل

هي : خبطني وكسرلي المرايا

الظابط : جالي بيقولي ايه اللى حصل

انا : قلتله حضرتك انا داخل من اليمين لقيت موتسكل حدف عليا فكانت ردة الفعل مني اني حدفت عليها وانا وقفت وعارف اني غلطان وقلتلها اللى انتي عايزاه هعملهولك وهي مش مبطلة زعيق

الظابط : هات رخصك

انا : رحت مطلعله الرخص


الظابط : قالي اطلع ورايا وخلى عسكري يركب معايا

المهم رحنا عند نقطة الشرطة العسكرية اللى هي قرب مستشفى الهرم

وقفنا هناك جالنا ظابط من الجيش (نسر ونجمتين)

راح للست : ايه اللى حصل بتتكلم بزعيق وحكلته

جالي بيقولي ايه اللى حصل : رحت حكيتله

راح للست وبيقولها طيب الراجل وقف وبيقول انه غلطان وبيقولك شوفي عايزة ايه وهو هيعملهولك

الست : يجبلي مرايا غيرها من التوكيل لاني العربية زيرو وموديل 2011 ومش هخلي ميكانيكي يلعب فيها

الظابط : قالها طيب المرايا من التوكيل بكام ؟

الزوج : طلع الموبايل واتصل بواحد تقريبا من التوكيل ساله على سعر المرايا قاله 850 جنيه

الظابط : رد على الزوج قاله مافيش 850 جنيه ولا حتى 500 جنيه دول شباب محترمين وباين عليهم ولاد ناس احنا اتعاملنا مع مجرمين وعارفين المحترم من المجرم ووقفو واكيد مش هيكون معاهم المبلغ ده وقاله انا نفسي مافيش في جيبي المبلغ ده وانت تحمد ربنا ان اللى خبط عربية زوجتك ناس زي دي

الظابط : جالي وقالي انت معاك كام دلوقتي ؟

انا : قلتله حتى لو اللى معايا مش هيكلم مافيش مشكلة انا ممكن اسيب العربية هنا واسيب الرخص واروح البيت اجيب لحضرتك تمن المرايا ومافيش مشكلة

الظابط : قالي لاء شوف بس انت معاك كام

انا : طلعت المحفظة كان معايا فيها حوالي 250 جنيه رحت موريله المحفظة وطلعت الفلوس وقلتله هما دول اللى معايا حاليا

الظابط : خد الفلوس وراح يديها للست وقالها دول اللى معاه

المدام : مش عاجبها وبتزعق وانا اعمل ايه ب 250 جنيه -- دي عربية زيرو وموديل 2011 انا عايزة تمن المرايا من التوكيل

الظابط : قالها طيب حقك علينا احنا غلطانين واحنا مش واقفين هنا عشان نصلح لحضرتك مرايتك

الظابط : جالي وراح قايلي انت اللى انت عملته ده يدل انك محترم وعارف الاصول -- وسالني بتدرس ايه ؟

انا : قلتله انا في رابعة كلية صيدلة

الظابط : اداني الرخص واداني ال 250 جنيه وقالي اتوكل على الله وانت غلطان انك وقفت ! !

انا : الف شكر يا باشا

وخدت رخصي وفلوسي والعربية وطرت ! !

اللى عايز اقوله يا جماعة الواحد مش معصوم من الخطأ واكيد كلنا بنغلط واكيد مافيش حد لما بيخبط حد بيكون قاصد انه يخبطه

هل بعد كدة الواحد لما يخبط يمشي ويطلع يجري ؟

انا عن نفسي ماشي في حياتي بمبدأ طالما غلطت يبقى تتحمل نتيجة غلطتك وعشان كدة نزلت وعلى الرغم من زعيق الست وصوتها العالي ماحبتش اني امشي لكن انا عارف اني غلطان وانها ماشية بعربيتها في حالها وانا اللى دخلت فيها

مع اني كان ممكن اخد عربيتي وامشي من الاول وماكنش هيحصل اي حاجة حتى لو خدت رقم العربية لان ماحصلش حاجة اساسا كل الموضوع مرايات ! ! !

واقسم بالله انا لو مكانه واتخبطت ونزل اللى خبطني اعتذر مش هقدر اقوله اي حاجة وعمري ماهقبل العوض ابدا !

هل الواحد كدة تصرفه غلط ؟ ولا المفروض مستقبلا لما يخبط يجري عشان يتجنب كلام الناس ؟