بصراحة انا محبط ومتضايق جدا انا اسكندرية كانت بتمثللي حاجة كبيرة لأني عشت فيها فترة جميلة من حياتي وطفولتي ولي فيها ذكريات جميلة وكنت كل سنة بحب ازورها الى فترة قريبة من حوالي 3 سنين ... المهم كنت معزوم في فرح في المنتزه قلت فرصة الواحد يغير جو ويستعيد ذكريات زمان .. اخدت عربية صديق لي عشان عربيتي في الصيانه وكانت هوندا سيفيك 93 اتوماتيك الحمد لله وصلت بالسلامة اسكندرية يوم الجمعة طبعا كان معايا اصدقاء لي كنا معزومين في الفرح المهم دخلت اسكندرية اول شئ قابلني الزحمة قلت عادي احنا في وقت مصيف بس كانت الزحمة غير عادية المهم وصلت الى فندق المحروسة وركنت العربية في شارع جانبي ونزلت فطرنا وجلسنا على قهوة اسمها المحروسة صلينا الجمعة وقلنا نروح المعمورة جيت ادور العربية رسها والف سيف ماهي قايمة المهم اتصلت بصاحبي قالي سيبها شوية عشان في مشكلة في طرمبة البنزين المهم سبتها وركبنا تاكسي طبعا السواق رغاي واكل دمغنا وقعد يلمح لنا لما لقانا شباب انه ممكن يجيب لنا بنات ..؟؟!!! لو عايزين نفرفش ..؟!!! طبعا الطريق كان زحمة خانقه على الكورنيش خصوصا الحتة بتاعة خالد ابن الوليد تقريبا في مشروع بيتم هناك في الجزيرة بتاعة الكورنيش طبعا اخدنا الطريق في ساعة الا ربع ؟؟!!! وصلنا المعمورة ولهف 20 جنيه حار ونار في جتتة ..!!! دخلنا صلينا العصر وقابلنا العريس وقلنا هانتمشى شوية المهم ركبنا الاتوبيس طالما الطريق زحمة كدة كدة قلنا ناكل سمك عند بلبع واتهبدنا 600 جنية ..!!! المهم رجعت للعربية ودخت السبع دخات عشان احاول ادورها قلت اشوف ميكانيكي جبت واحد رفع الكنبة الخلفية وبص على طرمبة البنزين وقالى الكهرباء قاطعة شوف كهربائي كان المغرب بيأذن صلينا المغرب صديق لي اتسرقت جزمته ...؟!؟!! روحنا جبنا له جزمة وقعدنا ندور على كهربائي سيارات مشيت مشوار الى شارع محمد نجيب في واحد هناك اسمه رابسو ..؟؟ قالى مش هقدر اسيب الورشة واروح معاك وبعتني لواحد اسمة سامي قالى اناميكانيكي والكهربائي مجاش بعتني لواحد اسمه بومبة قالي انا مش فاضي للأسف وبعتني لواحد اسمه مصطفي قالى انا مابشتغلش في طرمبة البنزين بالليل ..؟؟!!! وبعتني لواحد اسمة هاني قالي مقدرش اسيب الورشة هات العربية هنا قلتله العربية اتوماتيك قالى هاتها على الـ n وزوقها ..؟!! طبعا سبته عشان اصلا العربية بعيد والشارع من العربية للورشة مطلع قعدت ادور لحد لما لقيت واحد جه معايا كشف على الفيوز وعلى وصلة الكهرباء بتاعة الطرمبة وعمل ليها وصلة ولهف 50 جنيه المهم كانت الساعة وصلت لـ 11 ...؟!!! قلت اطلع الحق الفرح وانا ماشي على الكورنيش الى المنتزه صديق لي راكب في الخلف وفاتح الزجاج وبيتكلم في الموبيل وييجي متوسيكل راكبة اتنين شباب شكلهم شمامين ماشي عكس الطريق على الكورنيش ويخطف من ايده الموبيل وطار ....؟؟!!! طبعا الموضوع حصل في اقل من لحظة فكان من الصعب اني الف واجري وراه وقفنا نبص على الواد وهو بيختفي ماشي عكس الطريق وصلنا قرفانين وزهقانين كانت الساعة وصلت 12.ونصف الفرح كان خلص والعريس كان بيركب العربية وماشي طبعا انا قلت مش همشي وراه بيناقص وجلست على قهوة لقيت شاب بيضرب ينت بالقلم ويقولها فين الـ100 جنية يابنت كذا وكذا والبنت بتعيط وهو شغال ضرب فيها المهم الشهامة اخدتني وكنت هتدخل بس اصحابي منعوني وقالولي باين ان الموضوع فيه نمرة المهم جه شابين تانين ووقفوا تاكس واضح كان معاهم وركبوا البنت في التاكسي بالعافية امام الناس اللى بتتفرج ومشيوا بيها ولا حد فتح بقه ... انا خلاص كنت قرفت من القعدة والبلد وقلت انا مروح وركبت ومشيت وانا أسف على اللى حصل في الاسكندرية حرمية ونشالين ودعارة وقلة ادب وقذارة وزحمة وكلة عايز يقلبك في اي حاجة انا شوفت كمية بنات ليل على الكورنيش عيني عينك كده والله انا رجعت القاهر الفجر وقررت اني ماروحش اسكندرية تاني ... اتبهدلت اخر بهدله وتعبت جامد اليوم ده ربنا يصلح حال البلد لأن الناس للأسف بقت وحشه الا من رحم ربي