الموضوع: عايز ريسيفر h.d بسيط بس يعتمد عليه , أجيب إيه؟؟

المشاركة الأصلية كتبت بواسطة A_H_M_A_D

دلوقتي معظم القنوات يا إما قلبت فعلا أو هاتقلب قريب للـ HD

وأنا عندي في البيت شاشة بلازما HD بس الريسيفر عادي , و عايز أجيب ريسيفر يكون هو كمان HD

أنا مش عايز أفك شفرات القنوات المشفرة و الكلام ده , أنا كل اللي يهمني أشوف القنوات المفتوحة على النايل سات بوضوح

و مش عايز حاجه يكون مبالغ في سعرها , و في نفس الوقت مايكونش نوع صيني مالوش أصل من اللي عمره الإفتراضي أسبوع و نص

كلمت واحد بتاع دش قاللي فيه عنده Qmax وده متجمع في مصر , تمنه 550 جنيه , وبعدين قاللي بلاشه عشان ده بيطلع خرج 720 بس و صورته مش قد كده

حاولت أفهم منه 720 إيه بالظبط مقدرتش أوصل منه لحاجه عشان هو مش فاهم أصلا !!

وقاللي في نوع أعلى منه بيطلع خرج 1100 إسمه IG ( مش LG ) شكله كده تقليد بس كوري و سعره 650

و أخيرا فيه نوع إسمه Truman بيقول إنه تكنولوجيا ألماني و صناعه كوري و سعره 725 جنيه و خرجه برضه 1100 (من الحاجه اللي هو مش فاهمها)

إيه رأيكم في الكلام ده ... أفيدوني أفادكم الله

لو حضرتك مش عايز فك شفرات والكلام ده .. يبقى سيبك من كل الماركات المصرية و الصينية التعبانة دي كلها .

كلام الراجل عن الخرج .. قصده 720P او 1080P
و هنا دي معتاها دقة الصورة يعني ال 720P دي , مقاس الصورة بتاعها 1280x720
ال 1080P مقاس صورة 1920X1080

كل القنوات الشغالة HD حاليا شغالة بنظام 1080i وده بيشتغل على اي ريسيفر مش حتفرق معاك موضوع الخرج .

بس خلي بالك من حاجة ... لو حضرتك عايز تستمتع بال HD ... مفيش قنوات مفتوحة اصلا HD غير Dream !
يعني علشان تشوف منى الشاذلي بدقة عالية و خالد الغندور :P

فانصحك بحاجة من الاتنين !
ياتشتري الرسيفر بتاع MBC HD الي لسة نازل علشان هما عمله 4-5 قنوات بتوعهم HD بس لازم الرسيفر الخاص بهم بدون اشتراك شهري و ده معرفش ثمنه كام و بيشغل باقي القنوات العادية.

يا اما تشترك في OSN (انا مشترك حاليا)
85 قناة منهم 12 HD ب 350 جنيه في الشهر و الرسيفر مجانا (HUMAX)

يا اما لو الموضوع مش ماذم اوي انسى خالص ال HD دلوقتي لحد مايبقى في قنوات اصلا HD
وعلى فكرة ... القنوات العادية مش حتفرق علشان محدش يضحك عليك .. بمعنى ان لو القناة مش HD والجهاز HD مش حتفرق اي حاجة عن الرسيفر الي عندك .

لو عايز تشتري وخلاص الجهاز الي OSN بتبيعه HUMAX نضيف جدا جدا و بيبتاع في المحلات اعتقد ب 800 .

ده لينك Mbc HD لو عايز تشتريه :

HD | MBC.Net

المشاركة الأصلية كتبت بواسطة mustafa_farouk

karim

طيب هو بيشغل mbc وكل القنوات اللي معاها، زي fox movies و- dubai one ؟؟ وحاجات النيل مثلا ؟؟

انا سالتهم قالولي ريسفر عادي جدا بس هو لازم علشان ال mbc و هو رسيفر hd برده بيجيب باقي القنوات العادية وال hd المفتوحة عادي جدا .

المشاركة الأصلية كتبت بواسطة a_h_m_a_d

شكرا على التوضيح

أنا فعلا سبب أساسي في رغبتي للتحويل لل hd هو موضوع قنوات ال mbc اللي اختلف حجمها عندي و مبقتش زي الأول

مش عشان منى الشاذلي طبعا , هههههههه

بس معنى كده إني لازم أشتري الريسيفر بتاعهم بالذات و ماينفعش أي ريسيفر hd تاني ؟؟

وهل الريسيفر بتاع mbc ده هايشغل بقية القنوات الhd عادي و لا مش هايظهرها بقوة ال hd ؟؟

المفروض انه رسيفر hd عادي بس في حماية معينة لقنوات ال mbc hd بس بيشغل باقي القنوات العادية وال hd برده عادي جدا .

ودي الموضة دلوقتي كل شركة حتعمل رسيفر خاص بيها علشان حماية من السرقة والقرصنة ...
بس الميزة و العيب في ال mbc حاجة واحدة ..
الميزة انها بدون اشتراك شهري طبعا ..

العيب انها مازالت باعلانات ... يعني في osn مثلا الفيلم بيشتغل كامل بفاصل وحيد في المنتصف بالظبط و بيبقى اعلان عن فيلم اخر انما في mbc ماشاء الله :) بس طلاما ببلاش محدش حزيعل اكيد :)