صيانة 1000 للعروسة

**pirlo2000** · 03-07-2011 06:41 PM

الحمدلله امبارح رحت عملت الصيانة للعروسة الجديدة الكوبيه في كيا سرفيس المعادي....

انا عملت الموضوع بناء علي طلب الاخ ابو ليلي و مرضتشي اكتب التفاصيل في موضوع الاخ kmatrix فعملت موضوع جديد....

انا روحت هناك عشرة الا تلت كانت قدامي عربيتين واحدة كارينز و التانية سول....

جه الساعة عشرة الا عشرة كده المهندس احمد خد بيانات العربيات التلاتة و قالنا اتفضلوا في الاستراحة...

بالنسبة لي هو قالي ايه اللي هيحصل بالضبط...

- تغيير زيت شل10000 و فلتر زيت (260 + 35 جنيه)

- غسيل كلي للعربية (30 جنيه)

- نيتروجين ( 25 جنيه)

- صيانة عامة و تشمل ( كشف كامل بالكمبيوتر - تربيط عفشة - فحص السوائل ) وده مجاني عشان ضمان AAA

سالني اي طلبات اخري ؟

قولتله اني بحس احيانا بسخونة فيها و انا راكب عند ركبي.... زي مايكون فيه حاجة بتطلع صهد من تحت التابلوه.... معرفش تهيئات و لا بجد..

تاني حاجة مرة عملت معايا صوت طكطكة مع المشي و شوية و راح... قاللي هنبص عليها....

اتفضلت في الريسيبشن و كان معايا واحد صاحبي... المكان نظيف .... مكيف و فيه lcd بتابع منه عربيتك جوه الورشة...

شوية و دخلت العروسة في الورشة و انا بيني و بينكم خايف عليها برضه.....

شوية قمت طلعت بره بصيت عليها و المهندس احمد قاللي تعالي بص عليها مع من تحت مع انه ممنوع بس ديه عشان انت اول مرة تشرفنا بعد كده مفيش :)

اتفرجت عليها من تحت ماشالله شغلها نظيف و نص الحاجة عليه علامة هيونداي مع كيا و ده يطمنك انك انشالله مش هتتعب في قطع غيارها.....

قعدت تاني في الريسيبشن..... بصوا علي العزل عشان مشكلة الصهد الحمدلله ملقوش مشاكل و قالي انسي صوت الطكطكة خلاص احنا ظبطنهالك 100 % ..... اتمني ذلك انشالله.....

خلصوا الشباب كل حاجة من كشف و زيت و نيتروجبن و خلافه.... و اتاخدت علي المغسلة و اتغسلت الحمدلله بضمير و رجعت كانها خارجة من المعرض....

روحت في الاخر دفعت الحساب و كان 350 و الصيانة القادمة انشالله عند 5000 و هي فقطانشالله check up و ختمت الضمان...

خرجت بيها من هناك و عندي تعليقين:

- النيتروجين و لا فرق .... هي هي نفس العفشة الفولاذية ... ربنا يبارك فيها :)
- الولد بتاع المغسلة عمل الكرسي بحتة مبلولة و صابون...و من ساعتها بتزحلق في الكرسي :):)

بس عامة العربية حسيت انها فاقت ... مشكلة الصهدحسيت انها مش موجودة علي الرغم اني مامشيتشي بيها كتير بس ادينا هنشوف انشالله تكون اختفيت.....

و اخر تعليق ماشالله المركز نظيف جدا.... تعامل ممتاز .... اتمني انه يكمل كده انشالله...

اتمني اكون افدتكم و انشالله ربنا يكرمنا جميعا , و مستعد للمساعدة في اي وقت

**Deshahcoka** · 03-07-2011 07:57 PM

الف مبروك يا باشا :) و الصهد ده عادي لا تقلق :)

**pirlo2000** · 03-07-2011 08:11 PM

االه يبارك فيك..... طب ايه سبب الصهد ده؟

**kmatrex** · 03-07-2011 10:05 PM

ياباشا مبروك عليك صيانة العروسة والحمد لله ان نفس الانطباع عند باقى الاعضاء من حيث الارتياح الى مركز صيانة كيا المعادى وان شاء الله يتم المحافظة على نفس مستوى الجودة ويتم عمل عروض خاصة الى اعضاء نايل موتورز

مع الشكر

**ابو ليلى** · 04-07-2011 01:13 AM

تسلم ايدك على التقرير الجميل

حضرتك تالت عضو يشكر فى المكان وانا فعلا كنت اسمع عنه ربنا يسهل ونشوف نقدر نعمل ايه

سؤال ..تقريبا انا شاكك انى اعرف المهندس احمد على ..هو عنيه خضرا او ملونه ؟

موضوع السخنية ده ممكن يكون من تظبيط التكيف علشان بيسحب الهوا من بره

حاول تخلى التكيف فى اتجاه السهم اللى ظاهر على الشاشة الى الوجه بس وجرب وقلى .