الموضوع: تقرير بسيط عن الصني وعن مركز خدمة السبع اوتوسرفس !!

[justify]
بسم الله الرحمن الرحيم
اولا : احب اشكر البشمهندس احمد مصطفي علي مساعدته لي ورده علي استفساراتي الكتتتتيره
ثانيا : الصني اللي بتكلم عنها بتاعة واحد صاحبي مش بتاعتي
البدايه ان صاحبي كان عاوز يجيب صني سوبر صالون هاي لاين ورحنا كذا توكيل ملقناش العربيه وفي معرض في مدينة نصر كلمناه علي العربيه قالنا موجوده فتفقنا معاه
وخلصلنا الورق بتاع العربيه واستلمنا العربيه
استلمنا العربيه كانت عامله 6 كيلو جربتها وجربت كل حاجه فيها تمام بس لاحظت ان الموتور كانت استجابته ضعيفه اوي بس انا قولت لسا لما العربيه تلين
فطلعنا بالعربيه وغيرنا الكاوتشات نيتروجين من عند اشرافكو في الحي السادس
واحنا في الطريق مروحين لاحظت ان العربيه بتحدف يمين جامد فقولت لما نروح الصيانه ان شاء الله
وصلنا الحمد لله ويومين ورخصنا العربيه وبعد كده قولت لصاحبي كلم نيسان علشان تاخد رقم الضمان وبعد كده نحجز الصيانه
فكلمهم وادوله رقم الضمان وكمان حجزوله في السبع اوتوسرفس زهراء المعادي يوم الاثنين الساعه 1 -- هوا كلمهم يوم الجمعه --
اتحركنا يوم الاثنين الساعه 10 -- من المنيا -- وعلي الساعه 11.30 كلموا صاحبي قالوله اسفين حصلت مشكله ومضطرين نأجل الميعاد لبكره الساعه 1
واحنا في الطريق كان التكيف شغال تمام بس فاجاه لقيناه بقي مروحه بس ومش جايب بروده خالص!!
فنزلنا اليوم ده مدينة نصر ورحنا تاني يوم في الميعاد
.... بس علي فكره اداء الموتور اتحسن كتييير بعد حوالي 800 كيلو وقبل الصيانه ....
وصلنا هناك الساعه 12.30 وسألوا صاحبي علي الضمان وللاسف مكنش معانا فكلمنا المعرض وقلنا اديلهم صورة الرخصه وهما هناك هيدوك الضمان علشان العربيه اصلا من توكيل السبع
فسألنا عن البشمندس المسئول قالولنا البشمندس عمر في الدور التالت طلعناله وحكيناله علي اللي حصل قالنا تمام بس هنا صيانه مش مبيعات فروحوا اقرب توكيل للسبع اللي هوا في المعادي
فقولتله طب احنا كده هنأخر قالي لو جيت الساعه 4 هادخلك
وكان قاعد جنبه واحد ربنا يباركله قالنا انتوا عاوزين كتيب الضمان علشان الصيانه طب انا هديكوا بون تعملوا بيه الصيانه وبعد متخلصوا تبقوا تروحوا وتاخدوا الضمان
واخدنا البون ونزلنا واستلم العربيه البشمهندس-- تقريبا اسمه احمد ناجي -- وقولناله علي اللي في العربيه
1- العربيه بتحدف يمين
2- التكييف مش شغال كويس
3- الباب اللي ورا بيعلق مع السنتر
واستلم العربيه منا حوالي الساعة 1.15 وقالنا علشان العربيه فيها شغل هتأخر شويه وهتستلموها علي الساعه 4
* علي الساعه 4.15 كده سألت عليه وقالي العربيه خلصت بس مأخره علشان في عربيتين قبليها علي جهاز ظبط الزوايا
وبعد كده لاقيته طلع بالعربيه يجربها ورجع قالنا تمام وقالنا حاسبوا في الخزنه
والحساب كان 349 جنيه
* تقريبا كان 220 زيت و50 فلتر و 60 مصنيعيه وحوالي 20 ضريبة مبيعات
فدفعنا واستلمنا العربيه وكانوا غسلوها
.... رأيي عن السبع اوتو سيرفس الموظفين هناك شايفين شغلهم ومتفاهين لاقصي درجة ومهذبين ومحترمين جدا ....
التكييف اداؤه بقي تمام بس معرفناش نتأكد من حدفه العربيه
اتحركنا واتكلنا علي الله
ودوست في العربيه ولاحظت ان الحدفه لسا موجوده بس بقت اقل من الاول
مميزات وعيوب الصني من وجهة نظري
المميزات
1- العربيه تمنها كويس جدا واحسن من عربيات كتير في نفس الرنج
2- شنطه العربيه واسعة جدا وده مسبب ضيق في الصالون
3- العربيه مرتفعه عن الارض وتقريبا لو فيها مثلا 3 او 4 العربيه صعب جدا انها تحك في اي مطب
4- تابلوه العربيه شكله جميل -- في نظري -- احلي من الهيونداي
5- العربيه فيها اماكن تخزين كتيره وجراب للنضاره
6- كاسيت العربيه كينوود وصوته كويس ومعاه ريموت كمان
7- 2 ايرباج في السوبر صالون ميزه كويسه وصعب ان انت تلاقي عربيه بنفس التمن فيها 2 ايرباج
وفي النهايه كفايه انها ياباني
عيوب العربيه
1- عزل العربيه سئ جدا والموتور اول ميعدي 3.5 ار بي ام تلاقي صوت الموتور ارتفع جدا
2- كراسي العربيه غير مريحه وخصوصا في السفر او السواقه لمسافات والكنبه اللي ورا ضيقه
3- بور العربيه تقيل وعفشتها قويه بس خشنه زياده عن اللزوم -- سوبر صالون --
4- العربيه قطر دورانها كبير اوي
بالنسبه لاستهلاك البنزين فمقدرش احكم علشان العربيه لسا برده بتلين
وبالنسبه لثبات العربيه فلسا مجربتهاش علي سرعه كبيره
وفي ملاحظه غريبه مش عارف في عربيه صاحبي بس ولا في كل العربيات !!
عداد البنزين
في من فوق F ومن تحت E وبينهم 5 شرط
فالمفروض ان الشرطه اللي في النص تبقي نص الخزان بس لما المؤشر يجي علي الشرطه اللي في النص يبقي العربيه استهلكت بالظبط حوالي 15 او 16 لتر
والشرطه اللي بعديها يبقي العربيه استهلكت حوالي 30 لتر !!

وممكن استفسار بالنسبه للحدفه بتاعة العربيه ليها حل ولا ايه يعني ممكن اشوف حد بتاع ظبط زوايا بره ولا ايه ؟!
ومعلش التكييف بحالات ساعات يشتغل تلاجه وساعات يجيب هوا عادي كأنك مشغل المروحه بس فممكن برده نعمل ايه في الموضوع ده ؟!
واسف علي الاطاله

[/justify]

بخصوص الباب الخلفي ومشكلتة

البشمهندس قالي كلام غريب شويه قالي ان كان في سيلكون سايح علي الباب او في الباب وده اللي كان بيخليه يعلق وقالي احنا نضفناه وشيلناه

الباب الخلفي شمال مش بيفتح علي طول من السنتر لازم تتقفل وتفتح كذا مرة

كانت نفس المشكله بالظبط بس دلوقتي الحمد لله شغال تمام