الواحد إزاى يتصرف مع إستفزازات السائقين وأصحاب السيارات
السلام عليكم ورحمة الله وبركاته
اولاً : يعنى اية كلمة سواق هل هو :
- هل هم عازفي الكلاكس .
- هل هم محترفى الكسر على الاخرين فى الاشارات او السير .
- هل هم أصحاب السيارات المتهالكة والى بيستخدمها سلاح يضرب ويكسر بيه عربية غيرة (انا شوفت مرة ميكروباص رمسيس بيزق عربية قدامه ملاكى علشان يخليه يمشي) .
- ولا محترفى تشغيل حفلات الزينون فى اعين الاخرين .
- هل هم اصحاب السرعات العالية الى بتنتهى فى الاخر بحوادث مميته .
- هل هم من يقومون بركن سيارتهم على الارصفة .
- هل هم من يركنون سيارتهم خلف سيارتك لمينعك من الخروج .
- هل هم من يقومون بوضع حجارة علشان ما حدش يركن مكانه او يدق حديد فى الارض على اعتبار انه اشترى حتة الارض ده مع شقته وانه كده بياخد حقه مش بيتعدى على الاخرين ، وعامل نفسة مش واخد باله انه كده حرام عليه وانه فى كل مرة بيعمل فيها ده بيشيل ذنوب انه بيتعدى على حق جارة على اساس ان البيه المفروض لما يخرج ويرجع الساعه 3 الفجر لازم يلاقى مكانه موجود واى حد تانى يخبط راسه فى الحيطة .
- هل هم سائقى الميكروباص بكل طايفته المحترمة والى بتجتمع فيهم كل هذة الصفات انا شوفت موخرا ميكروباص واقف على كوبري عرابي فى شبرا بيحمل فى طلعه الكوبري وواقف فى نص الكوبري هل هم دول السواقين الى دايما بيقولوا ان سواقين الملاكى دول ملهمش فى السواقه على اعتبار انه لما يكسر عليك ويخبطك ويقف فى نص الشارع ويجي جري بسرعه من اول الشارع ويقف وراك مرة واحده هو كده الى سواق ما يعرفش انه كده هو الحمار .
- هل هم سائقي التاكسي الى عمرهم ما يعرفوا حاجة اسمها رزق ويجري يقف جنب كل واحد واقف على محطة يمكن يشاروله ويعطل الدنيا وراه ، لأ وممكن يقف مرة واحده فى عرض الطريق علشان يركب او ينزل حد .
انا عندى جيران كتير منهم الى بيحط حجارة ومنهم الى داقق حديد ومحدش فيهم بيجي فى دماغه لحظة ان ده حرام وانه هيحاسب عليه اما الله عز وجل لانه بيتعدى على جارة الى الرسول الكريم صلى الله عليه وسلم اوصانا به خيراً .
طيب انا اتصرف ازاى لو ركنت مرة ونزلت لقيت جحش راكن ورايا بحجة انى ركنت فى المكان الى ورثه عن والدته او ابوه الحاج وحصل موقف بليل حالة وفاه طفل تعب ولازم يروح للدكتور اعمل اية :
- أرجع مارشيدير بالعربية وادمر له الجنب بتاعه واتاخر عربيته واطلع .
- انادى عليه واان واثق انه هيكون نزال وهو بيضحك زي الاحمق ومفكر نفسه هو الى كسب فى متش المصارعه وساعتها ممكن اضربه .
- ولا اجيب حد تانى من جيرانى واسحب عربيته بيعربية تانية فى عرض الطريق واخرج انا .
ثانياً : الحل :
انا راى الشخصي فى الموضوع انه لازم قبل اى اختبارات فى القيادة علشان الرخصة لازم يكون فى كشف طبي كبير علشان يشوفوا نفسية الى عايز يطلع رخصة هل هو معقد عنده نقاط نقص ممكن يطلعها وهو بيسوق ، لازم كمان يكون حاصل على موهل دراسي عالى لضمان نضوج عقله وقدرته على استيعاب الامور ، انا عارف ان فى ناس كتير ممكن تزعل من الموضوع ده لكن يا جماعه والله ربنا هيحاسبكم على تصرفاتكم ده فبلاش تتحاسبوا على حاجات زي كده واتقوا الله وراعوا الناس وراعوا جيرانكم ، أقسم بالله العظيم اقسم بالله العظيم انى كل مرة اركن فيها واحنا بنركن عمودى على الرصيف لازم اسيب مكان مناسب لجارى علشان لما يجي يلاقى حتة فاضية مش اعرض عربيتى ومش مهم اى حد ولازم بعد ما اركن انزل اشوف هل انا كده ممكن اعطل حد وهو خارج بعربيته وعمرى عمرى عمرى ما ركنت ورا حد ابدا الا اذا معايا حد نزل يجيب حاجة من صيدليه محل او سوبر ماركت وانا لازم اكون قاعد فى العربية علشان لو حد حب يطلع اكون موجود وده بيكون غصب عنى لانه ما بيكنش فى اماكن فاضية بس فيه ناس بتقوم مقفله وماشية
ثالثاً : وبجد اعمل اية فى موقف ركن السيارات ده :
- الى يركن خلفى علشان انا ركنت مكانه ؟
- او الى بيدق حديد مع الوقت المكان الكبير الى كان بيساع 50 سيارة مع الحديد الى بيتعمل ياخد بس 20 طيب اية الاجراء القانونى الى يتخذ فى الموقف ده ابلغ مين واعمل اية ؟
- اه وممكن يعمل معاك حاجة جامده جدا انه انت لما تركن مكانه والمفروض انا ما اقولش مكانه الى اذا اشتراه من الدولة يجي يوقف العربية جنب عربيتى وجنب بابى اوى اوى علشان ما اعرفش ادخل عربيتى شوفتوا وساخه اكتر من كده وعلى فكره انا واحد قريب بيعمل كده للاسف برده هو من ضمن الناس الى محتاجه كشف طبي ونفسية ؟