الحلقة الأولى
العين الإزاز .. تفلق الحجر .... والإزاز
أول لما اشتريت العربية وروحت مرور طنطا -اللي انتوا عارفين طبعا إنها أم الدنيا- وبعد الفحص طلبوا مني الذهاب إلى المرور اللي كانت العربية تابعة ليه عشان أطابق البصمة من الملف وهو مرور مصر الجديدة –اللي هي أم الدنيا بردو بس من أب تاني-
في المشوار ده حصلت حاجة غريبة قوي
وأنا رايح على طريق مصر اسكندرية الزراعي .. مشيت الأمور طبيعية ومحصلش حاجة
لكن لما طلعت عالدائري بقى ..
بردو مشيت الأمور طبيعية ومحصلش حاجة
قابلت صاحب العربية عند موقف العاشر وخليته هو اللي يسوق عشان أنا معرفش السكة
واحنا بقى في السكة ..
بردو مشيت الأمور طبيعية ومحصلش حاجة
لحد ما وصلنا للشارع اللي فيه المرور .. طبعا الشارع ضيق ومفيش خرم إبره تركن فيه
راح راكن صف تاني في الشارع اللي هو ضيق أصلا وبقت العربية ملطش
نزلت ورحت المرور وأنا إيدي على قلبى وحاسس إني هارجع ألاقي العربية حصل فيها حاجة تزعلني وخصوصا إني هاطوّل جوه كعادة المرور المصري
وفعلا لما رجعت للعربية .. لقيت المفاجأة
.
.
.
.
.
بردو مشيت الأمور طبيعية ومحصلش حاجة :-)
واحنا ماشيين في الحر ومشغلين التكييف قالي اتطمنت على سوائل العربية؟
قلتله أيوه .. بس هي قربة الميه بتاعة المساحات فاضية ولا ايه؟
على أساس إني كنت لسه ماعرفش طريقة قياسها
قام مجربها راحت مطلعة ميه والمساحات اشتغلت .. هنا بقى ..
.
.
.
.
.
مامشيتش الأمور طبيعية وحصلت المفاجأة
لقيته بيبص على الإزاز وبيقول: هو الإزاز اتشرخ منك ولا ايه؟
قلتله لأ طبعا .. دا أنا لسه ماسحه الصبح وكان تمام
بصيت لقيته مشروخ من فوق لتحت حوالى 20 سنتي بالطول من تحت المراية على طول
استغربت جدا وقلت حصل امتى وازاي؟
نزلت وبصيت
قلت يمكن حصل واحنا راكنين العربية عند المرور يكون حد حدف عليه حاجة
بس لأ مفيش نقرة توضح إنه كان في حاجة اتحدفت .. الشرخ كان كله منتظم
معقولة الشمس اللي اتعرضلها في الفترة الطويلة قدام المرور تكون هي اللى شرخته
بس مستحيل .. دا الإزاز الأصلي بتاع العربية اللي جاي معاها من اليابان .. وأنا إتأكدت من كده بنفسي وشوفت العلامة بتاعة نيسان والكلام اللي مكتوب تحتها .. والتقفيل واضح إنه ماتلمسش
وبعدين أكيد العربية اتركنت في الشمس كتير قبل كده .. إشمعنا دلوقتي يعني
طب يكون إيه السبب؟!!!
حاجة تجنن
ومع التحقيق والتدقيق .. وبعد التفكير العميق
عرفت إيه السبب
.
.
.
.
.
الشرخ ماكانش موجود إلا لحظة إكتشافه
يعني أول لما الميه جت على الإزاز في عز الظهر والحر
ومع تشغيل التكييف جوه العربية .. حصل اختلال مفاجئ في درجة حرارة الإزاز أدى إلى إنه يتشرخ
والحكاية دي باقولهالكم عشان محدش يحط ميه على الازاز وهو سخن عشان مايحصلهوش اللي حصل معايا
وخصوصا لو مشغل التكييف
طبعا المفروض بما إن الازاز أصلي ماكانش حصل كده
بس يمكن يكون السبب إنه كان في عين إزاز ورا الموضوع ده
بس طبعا قلت الحمد لله .. ومشيت
ومع المسافة الطويلة في المرواح ومع المطبات ومع التكييف بردو .. الشرخ قعد يزيد حبة حبة
لحد ماوصل تحت لآخر الازاز من ناحية الكبوت
ووقف فوق عند المراية
طبعا الإزاز الجديد تمنه 1800 جنيه على ما أعتقد .. وبيتهيألي عمر التقفيل بتاعه ما هيكون زي بتاع اليابان
طيب أعمل إيه؟؟؟
لو سيبته شكله يستحمل عادي يعني .. بس منظره مش قد كده
في سكة تانية للموضوع ده
عندنا واحد في طنطا عامل إعلان عالطريق السريع كاتب عليه "هنا أطباء شروخ وكسور زجاج السيارات .. معالجة الشروخ والكسور بالليزر"
قلت إما أروح أشوف الحكاية دي
دخلت الشارع اللي الإعلان بيشاور عليه
لقيت محل صغير يادوب تدخل نص العربية فيه .. فيه مكتب صغير وسرير
وكان موجود عربية ربع نقل بتصلح الإزاز بتاعها
ولقيت الراجل صاحب العربية وجنبه الصنايعي شغال في الإزاز
كان شاب في التلاتينات ومعهوش صبي أو أي حد تاني
ركنت العربية وقلتله: سلام عليكم يا دكترة
.
.
.
.
.
وكعادة أي مخرج غلس .. لازم يقطع الحلقة على أهم حته فيها
أشوفكم في الحلقة الجايه في مسلسل المؤامرة .. إللي هتكون بعنوان:
طب الزجاج .. بين الحقيقة والخيال
.
المفضلات