كان زمان حاجة غريبة .... دلوقتي المنظر دة بقي عادي جدا.....
انا هطرح موضوع انا عارف ان كلنا بنشوفه كتير اوي اليومين دوول ، مش عارف ليه
لو حضرتك ماشي علي اي كوبري علي سبيل المثال لا الحصر
كوبري فيصل للقادم من فيصل ومتجه للجيزة
كوبري 6 اكتوبر للقادم من طريق النصر ومتجه ناحية رمسيس
وصلة صفط للقادم من الدائري ومتجه للجامعة
المهم
حضرتك تبقي ماشي علي الكوبري وكالعادة الكوبري زحمة وانت داخل علي الزحمة
وتلاقي طابور من العربيات وطبعا يتقدمهم تاكسي وراجعين بظهرهم عشان ينزلوا من الفتحة الي فاتت بدل ما يكمل
المنظر دة كنت بشوفه زمان قليل اوي
دلوقتي تقريبا يوميا بشوفه
عايز اعرف ليه ؟؟؟ هل دي شطارة وحداقة اني ماضيعش وقتي مع ناس اقل مني في الذكاء واشوف طريق تاني سالك ؟؟؟ وطبعا بذكائه الخارق هو الوحيد الي فكر في كدة وياعيني تلاقي الناس منقادة وراه وفاكره ان الملاذ في الفتحة الي فاتته
والمهم ان الفتحة الي هو بيحارب عشان ينزل منها دي بتبقي اسواء وازحم من الطريق الي هو هرب منه
يعني هو بيهرب من نزلة شارع السودان عشان ينزل الجيزة لما لقي شوية زحمة عند محطة مترو جامعة القاهرة
وبيهرب من زحمة كوبري اكتوبر عشان ينزل عند العباسية وزحمتها
وبيهرب من نزلة شارع ثروت وشوية الزحمة عند باب تجارة عشان ينزل شارع السودان ويلف من تحت كوبري فيصل ويقابل الزحمة الي الناس هربت منها من علي كوبري فيصل
لو حد عنده تفسير للموضوع دة ياريت يقولي عشان انا بشوف مهازل في الشارع ومش لاقي تفسير
لدرجة ان بسبب الحركة دي بشوف ناس بتلف وتمشي عكسي مش بيكتفي انه يرجع بظهره ويعرض غيره للخطر
ربنا يرحمنا برحمته
والله المستعان
،
،