قفشت مع واحد حاطط طوب قدام المحل بتاعة
من شوية كنت رايح أجيب جاتوة عشان كان جايلنا ضيوف .. المهم جاى أركن قدام المحل لقيتة حاطط طوب قدامه .. قمت سايب العربية فى الشارع .. و نزلت و قعدت أشيل الطوب و أحطه على جنب .. و أنا متوقع اللى هيحصل .. لقيت صاحب المحل طلع و بيقول لى انت بتعمل ايه يا أستاذ؟ .. قلت له حضرتك اللى حاطط الطوب فى الشارع كده؟ قال لى اه؟ قلت له ليه؟
حسيت كده انه مكنش متوقع السؤال .. قال لى أصل دى تلاجة و فيها عرض و العربيات بتخبى عليها .. و الكلام ده .. قلت له ثوان .. يعنى انت مثلا لو رزقك 100 جنية فى اليوم .. و جت عربية نقل قفلت على المحل بتاعك خالص مش هيجيلك الرزق بتاعك .. قالى بس ربنا بيقول "ولا تلقوا بأيديكم الى التهلكة" .. قلت له دى ايه علاقتها بالموضوع أصلا :biggrin24:.
المهم قلت حضرتك اعمل فى محلك اللى انت عايزة .. انما ده شارع من حق أى حد يركن فيه .. قال لى أصلها بتكون عملية ذوقية .. قلت له فين الذوقية دى؟ ده انت حاطط طوب فى الشارع .. قالى لأ ماهو فى أماكن فاضية .. قلت له يعنى انت لما الاماكن كلها بتتملى بتشيل الطوب و لما بتفضى بترجعه تانى؟ .. و قلت له نفسى الناس تفكر فى غيرها زى ما بتفكر فى نفسها و ان أنا فى طوبة زى دى كسرت لى الرادياتير قبل ده .. و لا حول و لا قوة الا بالله .. و حسبى الله و نعم الوكيل فى الناس اللى بتؤذى غيرها.
وقلت له بص .. أنا بصراحة كنت راكن عشان أجيب جاتوة .. انما خلاص مش جايب .. هروح أجيب من محل تانى .. بس قال لى احنا اسفين يا باشا .. و سبته و مشيت و رحت جبت جاتوة من محل تانى.
