الموضوع: خلاصة الكلام فى الاوبل...مساعده لوجه الله

السلام عليكم ورحمة الله


بصو انا مش هلف وادور كتير واقولكو هاى ياجماعه وانا عايز اعرف عيوب الاوبل ومميزاتها والكلام الحمصى دا...


انا واحد عايز اركب اوبل..عربيه المانى..اه عارف انها مكلفه فى صيانتها..اه عارف انها بتسخن بسرعه..عارف انها مبتتباعش بسهوله..ياعم انا عايز اركب اوبل بتتكلم كتير ليه !!

دا كان اغلب الكلام الى خدته من التجار والناس الفهلويه الى سألتهم عن الاوبل

بصو بقه من الأخر انا عارف ان الناس هنا فى المنتدى ناس تعليمها وثقافتها راقيه تختلف عن البشر الى فى السوق عشان كدا انا مترددتش انى اجى اسألكو

انا طالب جامعى ( اكاديميه بحريه ) وكنت بدور على اوبل كويسه عشان بسافر بورسعيد كتير بالإضافه روشنه بقه وبتاع انتو عارفين

المبلغ المتوفر حاليا هوا 55.000 للأسف مقدرش ازود عليهم اى مليم لأنى حاطط 5 الاف تانيين فوق ال55 الف بحيث لاقدر الله اكتشفت اى عطل فى العربيه الى هجيبها اصلحه واخليها مرتاحه

دلوقتى انا بفكر فى اوبل فيكترا من 1997 لغاية 2000 اوتوماتيك طبعا

شويه الاقي ناس كاتبه 47 الف وشويه الاقى ناس كاتبه 60 وشويه الاقى 57 لغاية ماقربت اتلغبط...دلوقتى انا عايز اعرف الفيكترا النضيفه الى متتعبنيش وتكون عمليه هتتكلف حوالى كام..؟؟

وايه اول حاجه ابص عليها فى الفيكترا...ناس قالتلى بص على عداد الحراره لو بيرفع ل100 تبقى عربيه مش كويسه

وايه افضل مكان اكشف عليه فيها فى القاهره ( انا من اسكندريه ولكن هنزل اشتريها ) انشالله ادفع 3 الاف جنيه بس ميكونش اتعلم عليا


تانى حاجه شوفتها اوبل استرا من موديل 2001 لغاية 2005


نفس الكلام برضه بلاقيها فى نفس رينج الفيكترا...طيب انا كدا اتلغبط..ايه الفرق بين الاسترا والفيكترا غير ان دى موتور 2000 ودى موتور 1600...هل فيه فروق مؤثره بين الاتنين ولا الاتنين واحد...ولو فيه فروق تنصوحنى بأنهى عربيه


وفى الاخر احب اقول شكرا لكل الى قرى البوست وعمل كومنت والى معملش برضه

المشاركة الأصلية كتبت بواسطة kareemz

الفكترا فئة أعلى من الاسترا طبعا .. انت لو لقيت فيكترا نضيفة يبقى أحسن بكتير من الاسترا دى و ثبات أحسن بكتير .. و ألمانى انما الاسترا دى برازيلى.

الصعوبة انك تلاقى فيكترا تسعينات نضيفة .. عشان زى مانت عارف العربيات بتتهلك بسهولة فى مصر .. يعنى عادى انك تلاقى عربية 2010 دلوقتى رشه كلها.

فالاسترا هتلاقى منها حالات أحسن من الفيكترا عشان موديلاتها أحسن.

والله ياباشا دى المشكله..انا فعلا مكنتش اعرف انها برازيلي بس كان باين اوى على تقفيلها انه مش قد كدا يعنى..عموما انا هشوف وربنا يسهل بس انا هدور على الاسترا اكتر لو ملقيتش الى فى دماغى يبقى فيكترا وتوكلت على الله مع انى خايف من استهلاكها فى البنزين فيه ناس بتقول انها حوت استهلاك...بس اهو كله كلام

وبعدين معلش طلب اخير اى حد هنا من اسكندريه يقولى اقدر فين الاقى اسواق السيارات الى اتعامل فيها مع البايع على طول...عشان مش عايز اروح لتجار..وكزا مره ناس تجيبلى عربيات اوبل اكتشف ان صحابها تجار اروح طاردهم من عندى...