الموضوع: بيقولك فابريقة جوه و بره !!!

نفس الموضوع حصل معايا ليا واحد معرفة حبيبى بيشتغل فى العربيات كنت قايلة على 128 المهم كلمنى قالى عربية موديل 1989 يعنى 1300 سىسى ماشى كلام جميل جنوط سبور يا سلام ايوه كده طقم صوت, فبريقة جوه يا حبيب قلبى قالى لقطة وصاحبها عايز يبيع علطول هات معاك 500 جنيه وانت جى ربط كلام علشان لو كده تخلص بكره او بعده بالكتير يعنى العربية حلوة قالى دى زى الفل عروسة شمعة منوره
اقل من نص ساعة كنت عنده وشوفت العربية وتبتدى الاشتغالات العربية اولا 1987 يعنى 1100 سىسى مش 1300 سىسى ولا يهمك مش حتفرق كتير كده كده مش حتجرى المهم الحالة ابص على الجنوط الاسبور الاقى ايه؟ طقم الجنوط بتاع 132 الى هوه فضى فى اسود على شكل ورده ماشى يا سيدى نشوف بقيت العربية العربية فبريكة جوه فعلا ودى الحاجة الوحيده الى طلعت صح نشوف بقيت العربية
-بالنسبة للفرش انا مش متاكد ازا كان العربية كان فيها كراسى اصلا ولا لاء
-التابلوه كان عايز تابلوه بمعنى الكلمة
-الكاوتش كان ممسوح كله غالبا علشان احتكاكه على الارض يكون قليل فيقلل من استهلاك البنزين
-فتحت الشنطه كلها بارومه لدرجة انى كنت شايف حتت كبيره من الشارع وبعدين الراجل شال الفرش بتاع ارضية الشنطة علشان اشوفها وانا مش مسامحة على الحركة ديه لانى حاولت انبه بس مالحقتش طلعت ريحة رهيبة غالبا عرسة ماتت فى المصنع وهما بيقفلو العربية وفضلت موجوده من ساعتها
-طبعا الراجل هوه الى كان بيفرجنى على الحاجة دى لانى كنت قرفان امسك العربية بايدى
-طقم الصوت طلع ايه كاسيت ابو بكرتين بتاع زمان ده وغالبا بايظ ومفيش سمعات بس حاسب مخروملها مكان على الخشبة الى وره
طبعا نظرا لقوانين المنتدى مقدرش اقول انا عملت ايه او قولت اية علشان متوقفش وبعد هذا الموقف قطعت علاقتى بالراجل ده نهائى وقولت خلاص مش حستعجل على الشراء وقعدت 6 شهور ادور لحد ما ربنا كرمنى بالحاله الى بدور عليها الحمد لله معلش طولت عليكم بس الى عايز اقولة بلاش تجار ومعارض والكلام ده لان معظمهم ما بيراعيش ربنا فى تعاملاته

مفيش امانة عند حد