الموضوع: بيقولك فابريقة جوه و بره !!!

السلام عليكم و رحمة الله و بركاته

حبيت اشارككم تجربة مريت بيها امس و علي أد ما حرقة دمي علي أد ما استفدت منها اوي و ضحكت من اللي حصل اوي

طبعا ما شاء الله و لا قوة الا بالله كل العربيات اللي في مصر فابريقة جوه و بره و المعلومة دي انا متاكد منها بعد دراسة وافية شافية عافية لاعلانات النت . المهم انا من فترة طويلة بدور علي عربية مستعملة تكون كويسة و كل لما ادور الاقي الاعلانات حاجة تفرح وهي اني تقريبا 95% من العربيات مكتوب عليها "فابريقة جوة و بره و المعاينة خير دليل" طيب لما كل دول فابريقة فين العربيات اللي مش فابريقة و العربيات اللي حصلها حوادث دي كلها راحت فين.

المهم ادخل في الموضوع علشان ما طولش عليكم زي ما قولت بعد فترة طويلة من البحث قررت انزل ابص علي عربية من اللي شفتهم علي النت و هي ميجان 2006 و في الاول رحت للمعرض اللي عنده العربية مع واحد صاحبي سالنا صاحب المعرض عن العربية اللي معمول عليها الاعلان قال العربية موجودة و لو عايزين تشوفوها اجبهالكم بكره و اتفقنا علي معاد اشوفها فيه و كان الموعد امس الاثنين الساعة 6 قبل المغرب و ده بعد ما اتاكدت من كلامه انها عربية 2006 ميجان فول اوبشن كاملة مش بانوراما و انها كلها فابريقة جوه و بره بس راشة اكصدامين و مفيش غير كده و ماشية 79 الف كيلو.
اتصلت براجل معرفة شغال في مجال السيارات من اللي هم بتروحله العربية بعد حادث مدمرة و تخرج من تحت ايديه عروسة ربنا يكفينا جميعا شر الحوادث الراجل ادب و اخلاق و علم و فعلا استاذ في مجاله و اتفقت معاه علي المعاد و المكان علشان نعاين العربية و صليت استخارة و قلت توكلت علي الله و لو فيها خير يبقي من نصيبي.
و بالفعل في تمام السادسة كنا عند المعرض و الراجل صاحب المعرض بلغنا اني العربية جاية في الطريق علشان صاحبها قرر يغسلها في البنزينة قبل لما تيجي علشان نشوفها براحتنا موضوع راحت تتغسل ده خلي الميكانيكي يقلق من العربية من غير ما يشوفها طبعا انتظرنا البيه لحد لما ييجي بالعربية لحد الساعة 7 الا ربع و اخيرا وصل بعد تقريبا 6 مرات اتصال نستعجله.
بعد وصول العربية بالسلامة اول كلمة قالها الميكانيكي صاحبي للراجل اللي جاي بالعربية يا استاذ العربية دي راشة
طبعا صاحب العربية اصر انها مش راشة و صاحبي يقوله و الله راشة و اللي راششها يستاهل قطع ايديه لانه مابيفهمش و راشش رش وحش اوي و برده الراجل مصر انها مش راشة
صاحبي اتغاظ منه اوي و قاله طيب تعالي وراله اثار الرش باينة في كذا منطقة في العربية حتي الكاوتش بتاع الابواب كان عليه اثار الرش و الراجل اللي كان بيرشها حاول ينظف الكاوتش لحد لما قطع منه اجزاء من الاطراف
اخيرا الحمد لله الراجل اعترف انها راشة جانبين ابواب و رفارف بس فضل مصر اني السقف و الكابوت سلام و مش راشين
بعد كده الميكانيكي طلب يسمع صوت الموتور و انا لوحدي حسيت اني فيه صوت غريب فيه و ده اللي اكدهولي الميكانيكي صاحبي لما شفت ملامح وشه و مدي الاستياء اللي ظهر عليه وقتها سالت صاحب العربية هي ماشية اد ايه وراني العداد عامل 67 الف كيلو و ده خلاني اشك اني العداد ملعوب فيه لاني كان صاحب المعرض مبلغني انها عاملة 79 الف كيلو و في اللحظة دي رفض صاحبي انه يكمل فحص للعربية و قال كفاية كده و فهمت انه بيقولي ما تخدهاش وحشة ولا فابريقة ولا حاجة و علشان يمشي صاحبها نزل في ثمنها 10 الاف جنيه و طبعا صاحبها خادته العزة اوي و قال لا طبعا ما ينفعش قولتله خلاص نفكر و نرد عليك.
طول ما كان صاحبي بيفحص العربية و بيطلع في مشاكل فيها و انا كنت مدايق جدا من اللي بيحصل و النصب اللي بيحصل علي الناس من اصحاب المعارض و اللي بيبيعوا مستعمل و مع كده كان جايلي نوبة ضحك من شكل الراجل صاحبها و هو واقف مش عارف يرد و اصراره الشديد انها فابريقة من غير حتي ما يحاول يثبت صحة كلامه
كلمة حق عايز اقولها اني الراجل صاحب المعرض راجل محترم جدا و امين جدا و اللي اكدلي كده صاحبي الميكانيكي لانه طلع يعرف اخواته و اكدلي اني شغلهم كويس جدا بس للاسف مكانش عندهم عربية في الفترة الحالية مناسبة لظروفي
و اتضح اني العربية الميجان دي مش بتاعة صاحب المعرض اللي انا كنت رايح عليه انه كان مجرد وسيط بيني و بين معرض التاني

ارجوكم اي واحد بيفكر في مستعمل ما يشتريش لوحده حتي لو بيفهم كويس في العربيات برده يكون معاه واحد تاني يكون برده بيفهم في العربيات و ما خاب من استشار