الرئيس اللي عاوزه يحكم مصر - إمبراطووووووووور
السلام عليكم
كلنا نفسنا مصر تبقى أحسن بلد في العالم
لكن أنا رأيي إن ده حلم بعيد المنال طول ما احنا بنفكر بطريقة إننا عاوزين حد بس ييجي ينضف البلد ويوفر دخل للناس ويرجع الأمن للشارع وشوية طلبات صغيره
يبقى كده هنحصل على رئيس تسيير أعمال أو بالكتير وكيل خدمات من الآخر
عارفين أنا لما سمعت وزير الخارجية التركية أحمد داود أوغلوا افتكرت - انبهرت بأسلوبه هو أو رجب طيب أردوغان والناس دول
تحس ان الواحد فيهم قبل ما يبقى مسئول فهو مفكر ومنظر وباحث وإمبراطور في ذاته وبيحلم بمكانة لبلده ما يحلمش بيها أي مواطن أمريكي مثلا
افتكرت حلم قديم لي إن مصر يمسكها واحد إمبراطور بحق وحقيق
لو رجعنا للتاريخ هنعرف إن مصر لم يكن لها شأن أبدا إلا لما مسكها واحد عند فكر توسعي وعمل من مصر إمبراطورية عالمية ليها شنة ورنه
أنا مش دارس للتاريخ الفرعوني جامد
لكن بصوا للسنوات اللي مصر بقى ليها شأن
1- سيدنا عمرو بن العاص - واحد من دواهي العرب وقال عنه سيدنا عمر ( لأضربن ارطبونهم - أي الروم - بأرطبون العرب ) وأرسل إليهم عمرو بن العاص
منذ بداية فتح سيدنا عمرو بن العاص ومصر بقالها شأن تاني
تحولت لكنانة الله في ارضه وقلب وعصب الأمة والقوة الحامية والمرجعية القوية اللي الكل بيرتكز عليها - رغم إن الحجاز هي مهبط الوحي لكن اصبحت مصر قلب العالم الإسلامي
2- صلاح الدين جه من أكراد العراق علشان يعمل إمبراطورية مصرية تقف وتهزم الصليبين داخل مصر وخارجها
3- قظز - جه من وراء النهرين لمصر علشان ينتصر على التتار اللي هزموا أبوه وأزالوا دولته ودول أخرى كثيرة في طريقهم - ورجع مصر تاني لأمبراطورية يخاف منها الجميع
4- محمد علي - جه من أوروبا من ألبان البلقان ( ألبانيا ) وعمل إمبراطورية مصرية تقف قدام أوروبا لدرجة إن اوروبا تعمل معاهدة عسكرية جماعية لتحجيم دوره
أنا حاسس إن البلد دي عمرها ما هتتقدم ولا تبطل تاخد على قفاها وتتنهب اموالها وثرواتها عن طريق الوكالة للدول الأوروبية واسرائيل إلا لو جه واحد رئيس ومجلس شعب امبراطوري عنده اهداف توسعية وعاوز يكون له نفوذ عالمي على الأقل زي تركيا حاليا
ومش عاوز اقول يرجع علشان ما يكونش هدفه قليل - لكن يخلي لمصر تأثير ويد في الصومال والخليج والدول الأفريقية وأمريكا اللاتينية وآسيا واوروبا والعالم العربي والإسلامي
وتكون كل الدول بتخاف من مصر وتعملها ألف حساب وتبقى كلمة مصر عليا فوقهم كلهم
في رأيي عمرنا ما هنوصل للمرحلة دي غير لو مسكنا واحد في قوة سيدنا عمر ودهاء سيدنا عمرو وحزم سيدنا صلاح الدين وتفاني وإخلاص سيدنا قطز ويحمل افكار توسعية كمحمد علي
وفي النهاية يكون من إختيارنا وشغال عندنا علشان مش عاوزين نستنسخ التجارب الثلاثة السابقة لآنها أثبتت فشلا مروعا لن يتكرر في التاريخ
هل ممكن واحد رئيس يكون كده بس يكون مصري مش أجنبي
ولا المصريين للأسف لا يلدون قادة وإمبراطوريين ولكن فقط جنودا باسلين
تحياتي
