كوكتيل استفسارات خفيف

**Car's Sniper** · 07-07-2011 08:39 AM

السلام عليكم
اخيرا خلصت امتحانات وفضيت لمشاكل النوبيرا اللى مش راضية تخلص من يوم مارحت للعفشجى

لسة مغير من شهر ونص تقريبا جلب النوبيرا بفيرنا وبعد ما العربية كانت بتعوم على 140 بقت بتعوم على 70 وانت طالع
والزوايا مضبوطة وزى الفل
بس اكتشفت حاجة وانا باغير الكاوتش الامامى امبارح
الديسك بتاع الفرامل اللى هو الطنبورة الامامية تقريبا شمال "بيلوء" (بيتهز) ييجى 2 مللى كدة فهل ده ممكن يكون ليه تأثير على حكاية ثبات العربية؟؟...وايه حلها؟؟
لان المشكلة ظهرت من يوم ماغيرت الجلب ويومها كان العفشجى عمال يدق ويرذع فى الطنابير والمقص لدرجة انه تنى اطراف (شفة) المقص فحاسس ان اهتزاز الطنابير ليها علاقة بالعفشجى

الاستفسار التانى بخصوص الماتور ...قبل كدة سحبت عربية واحد صاحبى وحسيت من بعدها ان انسيابية صوت الماتور مش مظبوطة كأن صوت الماتور مش متساوى فيه تكة كدة مش واضحة اوى وهو بيلف يعنى لو ركزت على عصاية الفتيس الاقيها بتتهز هزة خفيفة كل 3/4 ثانية كدة ده ممكن يكون من ايه؟؟
مع العلم ان الميكانيكى شاف قواعد الماتور لاقاها بايظة ولما ركبت عربية عمى (لوجان 2010) لاقيت فيها نفس حوار الهزة دى مع ان عربيته لسة جديدة

والاستفسار التالت بخصوص صوت نقلة الفتيس فى المارشدير فقط باسمع صوت التروس كأنى مش دايس دبرياش وعمرى ما غيرت زيت الفتيس من يوم ماجبت العربية من 4 سنين...فممكن يكون الصوت دا ليه علاقة بالزيت؟؟؟

والاستفسار الاخير واللى حازز فى نفسيتى هو سعر زيت موبيل xhp هو فعلا بقى ب 130 ولا الراجل بيشتغلنى؟؟؟
لانه بيقوللى ان الزيت سعره زاد من يوم الخميس اللى فات بس انا مش مصدقه بصراحة..فياريت لو حد سأل على سعر الزيت الاسبوع دا يعرفنى

كنت ناويها استفسارات خفيفة بس هى اللى تختخت لوحدها...آسف للاطالة

**MMamdouh** · 07-07-2011 12:54 PM

المشاركة الأصلية كتبت بواسطة Car's Sniper

الديسك بتاع الفرامل اللى هو الطنبورة الامامية تقريبا شمال "بيلوء" (بيتهز) ييجى 2 مللى كدة فهل ده ممكن يكون ليه تأثير على حكاية ثبات العربية؟؟...وايه حلها؟؟
لان المشكلة ظهرت من يوم ماغيرت الجلب ويومها كان العفشجى عمال يدق ويرذع فى الطنابير والمقص لدرجة انه تنى اطراف (شفة) المقص فحاسس ان اهتزاز الطنابير ليها علاقة بالعفشجى

لو اللى بتحكى علية دة بيحصل و انت فاكك العجلة يبقى متغلش بالك بالموضوع دة خالص... اصلا اللى بيثبت الطنبورة مكانها هو احكام ربط مسمار العجل اللى بيزنق الجنط فى الصرة و بينهم الطنبورة

MMamdouh

**Car's Sniper** · 07-07-2011 04:10 PM

المشاركة الأصلية كتبت بواسطة mmamdouh

لو اللى بتحكى علية دة بيحصل و انت فاكك العجلة يبقى متغلش بالك بالموضوع دة خالص... اصلا اللى بيثبت الطنبورة مكانها هو احكام ربط مسمار العجل اللى بيزنق الجنط فى الصرة و بينهم الطنبورة

mmamdouh

شكرا على رد حضرتك يا بشمهندس انا فعلا شفتها والعجلة مفكوكة....المشكلة دلوقتى بفت اكبر من مجرد تعويمة انا لسة راجع حالا من مشوار جبت فيه ال120 واول مارجعت لل100 لاقيت العربية حدفت من ورا لوحدها يمين لحقت المها وهديت لاقيتها مصممة تروح يمين من ورا وبعد كدة الحدفة اختفت لوحدها ووقفت على جنب اتطمن على صواميل العجل لاقيتها مربوطة وتمام واول مادخلت جوة البلد مع اول مطب سمعت صوت خبطة تحت الكبوت كأن حد خبط صاج العربية بألة صلبة (صوت حديد بيخبط فى بعضه) ولسة اخويا قايللى انه خد العربية مشوار امبارح وخد بيها زى مطب صغير اللى هو الفرق بين الرصف القديم والجديد وان شاء الله هبقى اروح النهاردة لبتاع الزوايا لان كدة الموضوع زاد عن حده اوييييييييييى وبدأت اتخنق من العربية

المشاركة الأصلية كتبت بواسطة sala7

موضوع الجر مافيهوش اي مشاكل غير انه استهلاك بنزين اعلى
موضوع الغيار الريفيرس و صوت الزعقة مشهور اوي في الدايو و بيكون عاوز رجلاش بس متعملوش حلها انك قبل ما تجيب ريفيرس اضغط مرتين ورا بعض على الدبرياش و هات الغيار هيجي معاك حلاوة
الا اذا الزعقة دي موجوده بردوا في غيار كمان في الحالة دي رجلش

شكرا لرد حضرتك يا استاذ صلاح
بالنسبة لموضوع السحب فانا باتكلم عن صوت الماتور بعد ماخلصت سحب عربية صاحبى والعربية ماشية طبيعى من غير اى مجهود اضافى عليها
وان شاء الله هجرب ضغطتين الدبرياش واشوف لان فعلا ساعات الصوت باسمعه وساعات لأ فممكن عشان بكون فى مرة دوست كتير ومرة من دوسة واحدة
ادعولى ربنا يهدى العربية دى لان اللى عملته معايا النهاردة خلانى اخد موقف سلبى منها