الشعب و "أي بتاع" إيد واحدة

**Donzi** · 07-07-2011 09:42 AM

حصلت خناقه النهارده الصبح بين سواق ميكروباص وبين واحد من الركاب والسواق نزل وجاب أصحابه السواقين علشان يضربوا الراجل والراجل تضامن معاه عدد من الركاب علشان مش أخلاق ولاد البلد إنه يتضرب لوحده

و بدأت الناس تستعد وقبل الضرب بثوانى واحد من الناس هتف الهتاف العام (( الشعب و سواقين الميكروباص إيد واحده )) وبدأت الناس تردد وراه فى حماس وكله راح معيط وإتقلبت الخناقه لحفله بوس كله بيبوس كله وكل واحد بيجيب الحق عليه والكل يردد الهتاف الثورى .. الشعب وسواقين الميكروباص إيد واحده , الشعب والجيش إيد واحده , البلطجيه والشرطه إيد واحده (( أسفه معرفتش تطلع منى كلمه الشعب والشرطه إيد واحده لأنهم بيحاولوا بكل الطرق يقطعوا الإيد دى ده غير إنهم متكاتفين مع البلطجيه فا كده بقت أوقع )) .. المهم إنه الشعب واى بتاع إيد واحده .. وهنا يا إخوانى السؤال بيطرح نفسه هل مصر هتقضى بقيت عمرها بإيد واحده كاتعه يعنى , الشعب وحط جمبه اى كلمه مفيده
بقى إيد واحده طب الإيد التانيه فييييين ؟؟؟؟

أعتقد إن هتاف الشعب واى حاجه إيد واحده ده بيرمز لحاجات كتير اوى , الإيد دى هى إيد التعاون والصبر والحب , إيد الحريه والكرامه والعطف , كأن الناس بتقول لبعض متنساش إحنا واحد , أنا معاك مش ضدك , أنا بحبك , تمام حلو أوى الكلام ده برضه إحنا لسه معرفناش الإيد التانيه فين ؟

الإيد التانيه هى دى الإيد إللى إحنا نازلين ندور عليها يوم الجمعه 8 يوليو إن شاء الله , إيد الحسم والقوه والعدل , إيد الوضوح والتغيير , الإيد إللى مصر محتاجاها مع الإيد التانيه , الإيد إللى هتطلع مصر من الضلمه للنور , زى ما عندى إيد بطبطب لازم إيدى التانيه تجبلى حقى وقت اللزوم مش كده ولا إيه ؟؟

أنا هنزل يوم 8 يوليو إن شاء الله علشان عايزه محاكمات علنيه , عايزه أشوف اللى قتلوا إخواتى فى ميدان التحرير وهما بيتحاكموا , عايزه حد يجيب القناصه إللى كانوا فوق المبانى بيصتادوا شباب مصر كأنها مسابقه فى صيد البط , عايزه أطمن إن مفيش لعب وإن جمال وعلاء فى سجن طره و إن مبارك وإللى معاه هيتحاكموا بجد , عايزه إللى خرجوا براءه من إهدار المال العام يرجعوا تانى علشان عيب اوى كلنا عارفين إنهم حراميه ولو مش حراميه يتحاكموا بتهمه إفساد الحياه السياسيه فى مصر , تهمه الخيانه العظمى لشعب غيبوه وضيعوه لمده 30 سنه , انا نازله علشان انا عايزه حقى وحق الغلابه , حق إللى ماتوا فى العباره , حق مصر اللى خلوها خرابه , نازله لأنى مش حاسه بالتغيير , نازله لأنى حاسه إن فى حد بيشتغلنا من الأخر , نازله لأن عايزه أحس إن إحنا عملنا ثوره بجد مش شيلنا رئيس وجبنا بداله واحد تانى , نظام شالوا ألدو جابوا شاهين ده مبقاش ينفع خلاص , نازله علشان أقول إن الناس إللى فى التحرير دول مش بلطجيه , دول أهالى الشهداء إللى عايزين حق ولادهم , حتى لو شكلهم مش عاجبك , حتى لو إسلوب كلامهم مش مريحك برضوا هما ليهم حق نازلين يطالبوا بيه (( بالمناسبه اللى بيمشى المرور دلوقتى فى ميدان التحرير هما أطفال الشوارع والله العيال بتمشى المرور احسن من عسكرى المرور إللى بيجبوه غصب وإقتدار من بلدهم ولا هو فاهم حاجه يا عينى )) , على العموم انا نازله يوم الجمعه إن شاء الله علشان اقول إن الثوره لسه مخلصتش .

لو مش عايز تنزل براحتك بس ياريت متخونيش علشان نازله ومتقولش عليا بخرب البلد لأنى بحبها زيك بس مع إختلاف الطريقه وكل واحد حر فى طريقته .

دى دعوه للنزول يوم 8 يوليو بس دعوه مش إجباريه علشان إحنا عايزين نشوف الإيد التانيه لمصر علشان قالوا زمان فى الأمثال إيد لوحدها متسقفش

منقول (( كتبته ياسمين محمد ))

ط§ظ„ط´ط¹ط¨ ظˆ "ط£ظٹ ط¨طھط§ط¹" ط¥ظٹط¯ ظˆط§ط.ط¯ط©

**pro_samir** · 07-07-2011 11:44 AM

لا حلوه وجديده

الشعب و "أي بتاع" إيد واحدة .. وبتشحت

**Donzi** · 07-07-2011 12:22 PM

المشاركة الأصلية كتبت بواسطة n_i_t_e

بالنسبة للخناقات فبقت فعلا مشهد متكرر. بس للأسف الخناقات اللى بشوفها مش بتنتهى كده ده بيبقى الرجل و المفك اللى بيضرب بيه ايد واحدة.

بالنسبة للمحاكمات للأسف ساعات ناس بتكسر الدنيا زي ما حصل فى المحكمة هنا لما ضابط محبوس مثلا متحكمش عليه فى ساعتها. و يشككوا فى القضاء. و هو مش ممكن و لو أحتمال 1% يكون الضابط ده مظلوم و متاخد فى الرجلين و لا هو مش من حقه انه يدافع عن نفسه ؟ و هى العدالة ان الواحد يتحكم عليه تانى يوم زي ما الناس عايزة من غير ما حتى يتسمع صوته؟ كأنهم عايزين خلاص هو ده القاتل أعدموه فى ساعتها.
طبعا فى ناس طالعة تطلب مطالبها يوم الجمعة بالعقل بس ده بيدخل مع ده و ساعات بتبقى فوضى لأن واحد بيبقى طالع يعبر عن حاجة فعلا مطلوبة و التانى طالع عشان حاجة غير منطقية و بيشوش على الأولانى

لاحظ ان الناس بقالها 5 شهور تقريبا مستنيين القصاص العادل و لحد دلوقتي ولا ظابط اتحكم عليه باي حاجة مع ان الادلة و الفيديوهات موجودة و كمان بيمارسوا عملهم عادي جدا مش موقوفين حتى لحين اصدار الحكم و دا طبعا بيأثر على اهالي الشهداء اللي شايفين اللي قتلوا ولادهم حرين و مابيتحاسبوش بما يرضي الله و كمان بيتمارس عليهم ضغوط عشان يتنازلوا و عشان الشهود يغيروا شهادتهم و دا ابتدى يحصل فعلا

طيب بعد كل دا مستني ايه من الناس غير ان هما يفقدوا الامل و يكسروا و يدمروا ، انا مش موافقهم على الطريقة بس في نفس الوقت مقدرة موقفهم جدا جدا جدا و ملتمسالهم العذر و مش ملتمسة العذر للقضاء اطلاقا

**Donzi** · 07-07-2011 01:01 PM

هوا انا مش مقتنعة الصراحة بحوار سواقين الميكروباصات و الركاب دا

انا عجبني المقال التالي للحوار دا

**AmAhmed** · 07-07-2011 03:30 PM

مقال ساخر لطيف و لكنه هادف
شكرا لكِ

**Donzi** · 07-07-2011 04:04 PM

المشاركة الأصلية كتبت بواسطة AmAhmed

مقال ساخر لطيف و لكنه هادف
شكرا لكِ

عفوا يا فندم

-

-

الموضوع: الشعب و "أي بتاع" إيد واحدة

LinkBack

أدوات الموضوع

عرض