مشكلة غريبة جدا و أرجو المساعدة

**besoaly** · 07-07-2011 11:53 AM

صباح الخير يا جماعة. أنا الحمد الله بعد اسنخارت الله و قراءة مشاركات الاعضاء هنا و اقتنعت و اشتريت اللوجان من شهر و نص كده و كانت ماشيه زى الفل و الحمد الله و عامل دلوقتي 2500 كم. من حوالي أسبوع بعد 2000 كم لقيت و أنا ماشى العربية بتبطل خالص ( بتطفي ) و هي ماشية حتي لو على سرعة عالية و ده بيحصل أول ما أشيل رجلى من على البنزين علشان أهدي أو أدوس فرامل و طبعا بكون دايس دبرياج و بلاحظ أحيانا أن لمبة البطارية بتنور أحيانا و أنا ماشى و لو ده حصل بعرف على طول أن حركة التبطيل حتحصل. المشكلة أن ده ممكن يحصل و أنا على ملف أو ماشى في صلاح سالم و حبيت أهدي شوية و طبعا بعد ما تطفي لازم استنى 20 ثانية علشان ادور تانى لأنى لو حاولت ادور على طول ما بتدورش لو عملت أيه. المهم روحت أول امبارح توكيا العبور و قالولي ظبطنا كمبيوتر بتاع الرشاش البنزين و طلعوا معايا جربنا العربية 15 دقيقة و كانت تمام بعد ما كانت في المشوار الشاعة بتبطل 7 مرات كده. المهم امبارح و النهارده لسه المشكلة موجودةو ان كانت اقل شوية. كلمتهم تاني قالولي استنى يومين كده او عايز تجبها تاني هاتها و هنشوف................
ممكن اى مساعدة يا جماعة لو حد قابلته المشكلة دى أو يقولي أعمل ايه علشان متضايق جدا.

**ger** · 07-07-2011 12:42 PM

البطارية او بنتحط بنزين من بنزينة مش حلوة

**besoaly** · 07-07-2011 12:48 PM

شكرا على الرد و بس انا دايما بحط من موبيل أو شل و بغير البنزينة على طول و اخر مرة لما تكررت المشكلة كتير كنت حاطط من شل الى قبل مدخل المعادي على الاوتستراد و هما في التوكيل قالولي هما كاشفوا على البطارية و الدبنامو كويسين.

**akerima** · 07-07-2011 01:15 PM

والله من الواضح ان مشكلتك في الرشاشات مش اي حاجة تانية وحاول تطلع علي طريق مفتوح واجري بالعربية شوية جايز يكون فية حاجة سادة الرشاشات فتتسلك والاحسن من دا كله تابعهم في التوكيل

**Dr.Karim Emam** · 07-07-2011 01:16 PM

الأفضل انك تروحلهم التوكيل و بلاش تستنى

**Abdm** · 07-07-2011 02:40 PM

كدة كدة وأنت رايحلهم التوكيل ابقى سرع شوية والطريق مفتوح وجرب يمكن فعلا الرشاشات فيها حاجة مسدودة وتسلك وخليهم فى التوكيل يبصوا على الكهربا بتاعت الموتور هل هى واطية ومحتاجة تعلية .. أو الموتور محتاج يعلى شوية ..أو الرشاشات مسدودة وعايزة تسليك

ما تنساش تبقى تطمنا علشان الآخوة يعرفوا التوكيل عمل معاك أية

والله الموفق والمستعان

**besoaly** · 07-07-2011 02:48 PM

شكرا لكم جميعا على الرد و حاحاول اروح على الاسبوع اللى جاى علشان قاللولى استنى كده يومين و بعدين الجمعة و السبت مافيش صيانة اعطال في صيانة دورية بس. و اكيد هاطمنكم.

**mrmohamedragab** · 07-07-2011 03:44 PM

قبل ميحصل كده هل انت غسلتها ؟؟؟؟

**besoaly** · 07-07-2011 03:50 PM

ولا مرة من جوه ، كله من بره بس

**amriar** · 07-07-2011 04:56 PM

المشاركة الأصلية كتبت بواسطة abdm

كدة كدة وأنت رايحلهم التوكيل ابقى سرع شوية والطريق مفتوح وجرب يمكن فعلا الرشاشات فيها حاجة مسدودة وتسلك وخليهم فى التوكيل يبصوا على الكهربا بتاعت الموتور هل هى واطية ومحتاجة تعلية .. أو الموتور محتاج يعلى شوية ..أو الرشاشات مسدودة وعايزة تسليك

ما تنساش تبقى تطمنا علشان الآخوة يعرفوا التوكيل عمل معاك أية

والله الموفق والمستعان

سؤال: يعنى ايه الكهربا عاليه او واطيه و بتفرق في الموتور بس ولا في كل العربيه و لما تعلي يبقي كلوه تمام ليه بتكون واطيه اصلا ؟؟
شكرا ليكم و اسف علي الاطاله