كتاب اللى فيه مواعيد الصيانة ضاع منى هل ده يلغى الضمان ؟

**noga28** · 08-07-2011 12:03 AM

السلام عليكم
انا شارية العربية من 40 يوم تقريبا وكتاب الضمان ضاع منى سبته فى العربية فواضح ان حد ذكى رماه كتاب الضمان مش كتالوج السيارة
السؤال بقى هل ده مهم علشان اروح التوكيل فى اوقات الصيانة ؟
طيب هما هيرفضوا ولا ممكن اروح مكان ما اشتريت اجيب غيره؟
يعنى الصيانة كده اتلغت ولا ماشية من غيره انا لسة يادوب عاملة بها 850 كيلو يعنى قربت اروح صيانة ال1000
ياريت حد يفيدنى لو سمحتم

**Bishoy.Girgis** · 08-07-2011 01:01 AM

بصراحة سؤال جديد في القسم و مش في المنهج :))) انما اكيد ليها حل و هننتظر رأي بقية الاعضاء او بعد الاتصال بالتوكيل ..
متابع ...

**WalidAdel** · 08-07-2011 01:51 AM

كتاب الضمان لايسقط حقك في الضمان خالص و بعدين العربيه ليسه ماعملتش حتي صيانة الالف و مش هاينكروها يعني مارقم الشاسيه متسجل عندهم اكيد
افتكر انه عادي ممكن حضرتك تروحي التوكيل القريب ليكي و هما هايتصرفوا
اكيد هايبقي ليها حل مش هايقولك لا والله من غير كتاب الضمان احنا مانعرفكيش ولا نعرف العربيه
واحد ضاع منه الكتاب بردوا و قالولوا ان العربيه متسجله عندهم و الصيانات اللي عملتها و كده فاكيد هايبقي الموضوع مش مشكله عندهم
بس و بعدين في كود كده حضرتك بتتصلي تجبيه من التوكيل اللي اشتريتي منه العربيه علشان تفعلي الضمان بتاعك بس انا للاسف ولا عارف بيتجاب ازاي لاني اصلا ماجيبتوش خالص بس دا كان اخر مره كنت في التوكيل كانوا بيسألوا عليه الناس اللي جايه تعمل صيانة الالف

**SonaSteel** · 08-07-2011 02:16 AM

المشكله انه علشان يطلع واحد تاني لازم تعملي محضر بفقدانه وهاتديه للمعرض اللي شارية منه العربية هو اللي هايتابع المصنع علشان يجيبوا واحد جديد.
وربنا ييسرلك الخير يارب العالمين

**Bishoy.Girgis** · 08-07-2011 03:18 AM

المشاركة الأصلية كتبت بواسطة noga28

ممكن تقصد الكود اللى على الشريحة المعدنية مع المفتاح ولا غيره؟
فى شريحة معدنية مع المفتاح علشها رقم وبعدين يعنى على رايك انا هضحك عليهم ماهو لها تاريخ والعداد باين

لألألأ ... بتتصلي برقم 16244 خدمة عملاء نيسان و بتدي ليهم بيانات العربية .. و بكده بيفعلوا الضمان بتاع العربية و هما بيدوا ليكي رقم كودي و عن طريقه بتتعاملي بيه مع التوكيل
حاولي تتصلي و اعرفي ايه الحل في موضوع كتيب الضمان برده .. بس يارب يردوا لأن الرقم ده بيدي مشغول بقاله فترة
انما اعتقد ان الرقم اللي علي الشريحه المعدنيه ديه دا رقم شاسيه العربية

**WalidAdel** · 08-07-2011 03:29 AM

المشاركة الأصلية كتبت بواسطة noga28

ممكن تقصد الكود اللى على الشريحة المعدنية مع المفتاح ولا غيره؟
فى شريحة معدنية مع المفتاح علشها رقم وبعدين يعنى على رايك انا هضحك عليهم ماهو لها تاريخ والعداد باين

لا الشريحه المعدنيه دي والله ماعرف ليه هيا معايا بس انا وجدت لها استخدامات اخري كتيييييييييييير
الكود ده و الله اعلم بيبقي مكتوب في الضمان او لو مش مكتوب حضرتك بتكلمي التوكيل اللي جيبته منه العربيه بيدهولك علشان يبقي الضمان شغال علي العربيه علشان التوكيل بيسجله عندهم علي الكمبيوتر و منها يبقي كتاب الضمان مالوش اهميه لان حتي مهندس الاستقبال قال للعميل الكود فين قاله كذا كذا كذا و بعدين العميل رد عليه قاله و كتاب الضمان فالمهندس بصله اللي هو عايز يقوله بله و اشرب ميته حاجه كده حتي مابصش فيه لان العميل كان حافظ الكود هو كام حرف انجليزي كده علي كام رقم

و بلاش حتة تضحكي عليهم دي "ايه يعني كتاب الضمان ضااااااااااااااااااع" علي غرار اللي يعرف ابويا يروح يقوله كده يعني علشان ماحدش يرخم عليكي يقولك طالما بتضحك نضحك معاها احنا كمان

حل اخر (ودا انا شخصيا افضله) طالما العربيه بقالها 40 يوم يبقي اكيد المندوب اللي في المعرض فاكر حضرتك شكلا و موضوعا علي اساس ان العربيه ليسه متباعه و هما فاكرين روحلهم و اقفي بالعربيه قصاد المعرض علشان يفتكروها و شوفي المهندس اللي باعهالك و احكيله علي اللي حصل و ان كتاب الضمان ضاع و بتاع و هو هايتصرف او هايبلغ التوكيل اللي هاتعملي عنده الصيانه محدش يسالها علي كتاب الضمان كده يعني اكيد هايبقي عنده حل لان التوكيل كده كده هايرجع للمعرض علشان يسأله علي العربيه فحضرتك تروحي المعرض من اولها كده احسن

**egypt0777** · 08-07-2011 08:08 AM

لا تقلق

السؤال ده انا سالته لمركز الخدمه

قالولى حتشترى كتاب ضمان ب 100 ج

وتروح المراكز اللى حضرتك عملت الصيانات فيها قبل كده و يختمهولك من اول وجديد
عشان الصيانات ده متسجله عندهم على الكمبيوتر
وفى حالتك افضل الاتصال بخدمه العملاء وابلاغهم الحاله وهم حيصرفوا واحد تانى بفلوس

انت مع نيسان يبقى انت فى الحسبان