كيف تتجنب النصب عند اصلاح الكاوتش
القصة اللي حكاها أحد الاخوة بعنوان 35 خرم خلتني اكتب الموضوع دة علشان أنا عندي تجارب كتير بسبب إشرافي على عدد كبير من العربيات فالشغل حتى وقت قريب . المشكلة دايما من ورش إصلاح الكاوتش اللي موجودة في محطات البنزين علشان دي ناس بتكون بتدفع إيجار لمترين تلاتة بتعمل فيهم ورشة تصليح علشان كدة معظمهم نصابين ،و برضه اكشاك الكاوتش اللي على الطرق السريعة . لك إسبوع يجيلي أكتر من فاتورة إصلاح كاوتش ب 50 أو 60 جنيه مقابل عمل 5 أو 6 خوابير و كلهم دايما في فردة كاوتش واحدة . غالبية الفواتير من محطة مصر للبترول في ميدان الدقي علشان هي أقرب محطة لمكتب شركتنا و دايما المهندسين الشباب مش في دماغهم .
قلت لازم أشوف الحكاية دي علشان أنا في أكتر من 25 سنة سواقة عمري ما حصل معايا أكتر من مسمار واحد في المرة ،شلت غطاء البلف و سربت شوية هواء و رحت لبتاع الكاوتش اللي دايما العربيات بتاعتنا بتروحلو ، أول حاجة زود الكاوتش بزيادة (علشان يفتح أي شرخ موجود في الكاوتش ) جاب زجاجة الصابون السائل و كشف ،و يعد واحد ،اتنين ،تلاتة لغاية ما وصل سبعة قلت له كفاية ، و طبعا كل مكان يلاقي بيعمل فقاقيع اوقفه قبل ما يغرس الخابور ، و أقوله كمل كشف الاول .
بعد كدة قلت له متحوتش خوابير ، و اضبطها على 28 .
الخلاصة ياسادة :
.... إنزل وخلي عينك معه ، سلامتك أهم و بلاش تبقى باشا ساعتها .
....إذا ماشفتش راس المسمار وهو بيخلعوا إرفض تركيب الخابور .
.... أسلم طريقة إذا مكنش المسمار باين هي إن العجلة بالجنط تتحط فالبانيو وسط مية بدون صابون .
.... إذا كان الكاوتش مريح شوية و مفيش محل بريدجستون قريب زودها في أي مكان موقتاً و برضه إنزل و شوف اللي بيحصل.
....أو اشتري كمبرسور صغير من كارفور أو هايبر أو أي مكان و زود الفردة لغاية متلاقي ورشة مضمونة ( أنا بستعمله من سنين و حتى لو الفردة على الارض {{ كدة ممكن ترحم نفسك من تعب و عرق }} ).
....إذا كنت غاوي ممكن تحاول تشوف لو فيه مسمار (مجرد كشاف بطارية ) كفاية .
.... (مش معنى كدة إن كل الورش وحشة فمثلا أنا بتعامل مع ورشة في الاسكندرية من سنين و هما آخر ضمير ، و حتى الترصيص بعمله عندهم 7 جنيه العجلة ذي الفل ) .
.... الزجاج المكسر مش ممكن يقطع الكاوتش إلا لو كان الكاوتش متاكل جامد أو كان الزجاج قطع كبيرة و عمودية على الأرض ذي قعر زجاجة مثلا .
.... الكاوتش لو كان قديم و ناشف بيكون فيه شروخ رفيعة ممكن تعمل مع الصابون فقاقيع .
.... فيه حالة بيكون السبب هو البلف : إما الإبرة الداخلية وحشة أو مش مربوطة كويس و دي ممكن العجلة تنام و الكشف مش يلاقي مسامير أو إن جسم البلف يكون مشروخ من ناحية الجنط بسبب ضغطه عند الركن لازق فالرصيف .
....أخيرا ممكن تخلي معاك كمرة داخلية إحتياطي ، لو لقيت نفسك داخل في نصب قل للصنايعي إخلع البلف و المسامير اللي فالعجلة و راكب الكمرة دي ، كدة تضمن إن الفردة مش حتبوز من كتر الخوابير لغاية مترجع لمكان كويس ، و حتدفع 10 جنيه بالكتير تمن بلف جديد .
ربنا يبعد عنكم المسامير مع الاعتذار للبمي 2 . :glasses12:
كيف تتجنب النصب عند اصلاح الكاوتش
اقتباس:
المشاركة الأصلية كتبت بواسطة rompo10
لو سمحت ياباشا هو الكمبروسور الصغير بيعمل كام
يبدأ من حوالى 60 جنيه و يصل الى 150 و اكتر فى الأنواع الجيدة اللى فيها كشاف و فلاشر للطوارئ لو عطلت باليل و ممكن ايضا شاحن بطارية و لكن لازم اقول ان موءشر الضغط تقريبى يعنى احسن نزود ونستعمل مقاس هوأ خارجى ( 20-30) جنيه من المحطات او كارفور