الموضوع: أيه احسن في الكاوتش العادي ولا التيوبلس؟

اولا يا باشا مفيش حاجة اسمها عادى
ثانيا قبل اى شىء تشوف الجنوط عندك حلوة و لا لأ لو الجنوط مش حلوة احسنلك اشترى جنوط جديدة استيراد فى حدود 50 جنيه الجنط من سكة المحلة او من البهى او اى واحد بتاع استعمال انا جبت لنفسى 4 جنوط بتوع لانشيا عملوا 200 جنيه لان حرام تجيب كاوتش جديد و تشغله بشنبر
ثالثا التيوبلس ممتاز فى الاستعمال جدا لانه عمره ما يخونك و مش هتحتاج تقف تغير فردة الا لو لا قدر الله فرقعت او دخل فيها سكينة مثلا
رابعا انا جايب نوع اسمه نان كانج و ده اندوتيسى او تايلاندى مش فاكر و هو نوع حلو معايا و طرى و الفردة بتبقى كبيرة و جايبه من عاطف اللى على اول سكة سيجر بعد ميدان ستوتة و كان سعره ارخص واحد و خدت الفردة ب 190 جنيه بس طبعا من فترة وما اعرفش السعر كام دلوقت
خامسا مقاسات عربيتك 175 70 13 و اوعى تجيب مقاس تانى لانى جربت انى اجيب 185 70 13 لما حطيتهم ورا ضعفوا من عزم العربية و ادام العربية عليت من ادام و عامت شوية
سادسا انا من طنطا و اسمى معتز يحيى و تليفونى 0165566198 لو عزت اى مساعدة انا تحت امرك فى اى حاجة
سابعا اخر حاجة تشوف تاريخ انتاج الكاوتش ما يكونش عدى عليه اكتر من 3 او 4 شهور لانه له عمر افتراضى حتى لو ما ركبش فى عربية


للعلم بالشىء معنى الارقام بتاعة الكاوتش هى
175 هو عرض مداس الفردة بالمللى متر يعنى 17.5 سم
70 هو ارتفاع فردة الكواتش من حرف الجنط للمداس و 70 تعنى 70% من عرض الفردة
13 مقاس الجنط بالبوصة