كان راكب عندي في العربية الكاوتش اللى كانت جاية بيه من بلدها ... جوديير هندي ... بصراحة كانوا أربع عجلات تحفة ... وعملوا معايا حاجة مش مصدقها لغاية دلوقتي .. وهى إنهم إتخرموا كذا مرة (طبعا على أوقات متفرقة وأكتر من عجلة مش في عجلة واحدة) بمسامير عادية مش كبيرة قوي بس مش صغيرة برضه وبعد ما فكيت منهم المسامير بإيدي أول خرم فضلت ماشي عليه كسل مشوار كامل وبعدها روحت زودت العجلة وكسلت برضه أصلحه وعملت مشوار كمان ... المفاجئة كانت في إختفاء الخرم والعجلة بطلت تنام وفضلت مضبوطة
لما إتخرمت تاني بقى برضه عملت نفس القصة .. بس مش كسل بقى دا أنا كنت عايز أتأكد ... وفعلا أكتر من اربع أو خمس أخرام (مش فاكر بصراحة كام بالضبط) يلحموا لوحدهم بدون تدخل منى بعد ما اشيل المسامير منهم بإيدي
بصراحة الحركة دي عجبتني أو في الجوديير الهندي الغريب ده
وكمان الكاوتش ده عملت بيه خمسين الف ... وشلته فقط لأن في فردتين منه إتاكلوا من حادث في الرصيف كنت عملته من فترة قصيرة ... لكن التلات فرد التانيين (بما فيهم الإستبن) كان ممكن يقعدوا لغاية أكتر من كده وأعتقد بكتير كمان (عموما أنا محتفظ بيهم)
يعيبه فقط .. إنه كان ناشف جدا على الطريق .. ومزعج بشكل خرافي لما كنت بأقفل الزجاج وأفضل أنا وهو لوحدنا من غير كاسيت كان بيجيبلي صداع
ركبت بدل منه بقى فولدا بولندي مقاس 13/155/65 (المقاس الأصلي بتاع العربية كان 13/145/70)
الفرق في النعومة والضوضاء غير طبيعي برغم إن الفولدا فردة ناشفة برضه بالمقارنة مع الكومهو والهانكوك بس أفضل منهم بمراحل وفرق السعر ماكانش كبير مع العلم إني أساسا مكنتش لاقي منهم المقاس بتاعي بس كانوا بيتراوحوا حوالين 200 - 210 .... أنا جبت الفولدا بـ 225 من أرابكوم في مدينة نصر أمام النادي الأهلي تقريبا
النقشة اللى جبتها إسمها إيكو كونترول .. أعتقد مافيش فولدا غيرها في مصر لإنها هية المناسبة للفصول الأربعة سواء مطر أو أرض جافة وغرضها الأساسي التفوفير في إستهلاك الوقود ... والعهدة على موقع فولدا لسة هاجرب وأقولكوا ... بس مبدأيا بس مبدأيا أنا مبسوط منها في إتزانها وهدوءها بعد الجوديير الهندي المزعج (لكن ماتتوقعوش هدوء الهانكوك أو الكومهو أو البريدجستون)
وده رابط الموقع بتاع فولدا وفيه حاجات مفيدة كتير .. وممكن تشوف العجلة على جنط تختاره من الموقع على عربيتك بالذات بعد ما تختار الموديل بتاعها
وده رابط للفردة اللى جبتها وهى راكبة على عربيتي بعد ما إختارتلها جنوط كمان دوس على زرار DETAILS في النص على اليمين تحت صورة الكاوتش عشان تكبر الصورة وتشوف معلومات الكاوتش بالكامل