المشاركة الأصلية كتبت بواسطة yahia_zakareya
بعد عمليات الفرز و الإستبعاد إنحصرت المنافسة بين الآتي (مرتبين بالأولوية ترتيب تنازلي):
-1- يوكوهاما سي درايف ............................ 460 جنيه (محدش قدح فيه)
-2- كونتينينتال إيكو كونتاكت 5 ..................... 460 جنيه (جنابه طرية جدا جدا لدرجة إني ظنيت إن صباعي ممكن يعلم فيها أو يخرمها لو كنت الرجل أخضر)
-3- نوكيان لاين ............................................. 425 جنيه (محدش بيجيب سيرته هنا في المنتدى و لم أجده إلا عند تاجر واحد فقط)
بصراحة يا أ/ وليد أنا محتاج مساعدة في اتخاذ القرار النهائي ، يا ترى عندك فكرة عن ماركة نوكيان عاملة إيه مع الناس اللي جربتها خصوصا إن الموديل Line واخد تقييم عالي جدا ؛ بس ممكن مينجحش في الطرق الرديئة بتاعتنا ؛ يعني ممكن تكون جوانبه (Side Wall) بتاعته طرية جدا ، أو إن بنية الإطار متستحملش الضرب اللي هتاكله في شوارعنا [كابتن كابتن .... هو كله ضرب ... مفيش شتيمة]
، فيحصل إنهيار داخلي للإطار ، و ده أنا شوفته مع ماركة مجهولة الهوية اسمها Olympic من نيوزيلندا و كان المقاس 13-70-155 للفيات 127 و كانت النتيجة فشل ذريع للإطار و جاب عالي و واطي و لوحة يمين و لوحة شمال .
طبعا شركة Nokian الفنلندية محترمة جدا و مشهورة بجودة إطاراتها العالية .
على فكرة أنا عارف إن حضرتك هتقول "و عليك بإيه يا عم يحيى ، متخليك في اللي إحنا نعرفه و مجربينه ، هو إنت هتجيب إطار كل يوم" .
عندك حق ، بس أنا من الناس اللي بتحب تجرب ما هو جديد و يغلب ظني إنه هيكون ممتاز في نفس الوقت من سمعة الصانع و تاريخه ، لكن شكلي كده المرة ديه هعصر على نفسي و ألتزم بالقاعدة الذهبية اللي بتقول
"اللي تعرفه و مجربه أحسن من اللي متعرفوش أو مجربتوش"
ميال أكتر لليوكوهاما سي درايف من شكر الناس هنا في المنتدى فيه و من شكر الناس في الهند برضه فيه (الطرق بتاعتهم أسوأ من بتاعتنا غالبا ) .
و أخيرا بماذا تنصحني علشان أنا ناويت أنفذ في خلال يومين إن شاء الله و عشت.
نسيت أشكر حضرتك على شكرك ليا أولا و على إهتمامك ثانيا .
المفضلات