الموضوع: مـثـل مـن امـثـلـة كـتـيـر فـي الـشـرطـة !!!!!

المشاركة الأصلية كتبت بواسطة MASERATI

السلام عليكم و رحمة الله و بركاته

طبعا لأننا هنا فى المنتدى كلنا ناس محترمين و الأساس هو الصدق فى المعلومات التى ترد فى المشاركات و أن المعلومات سواء المنقولة أو المسرودة من أعضاء أفاضل هنا فى المنتدى, فالأساس فيها الصدق حتى يثبت العكس و بالتالى القصة دى صادقة 100% الى أن يثبت العكس.

أولا, ربنا يرحم الظابط الشهيد و يصبر أهله و يجازيه خير عن عمله و يسكنه فسيح جناته.

أنا كان ليا سؤال صغير و عفوا لو كان ساذج شويه, هو فيه مانع أن لما الحرامى القاتل ده يتمسك, أنه يتحاكم و محاكمته تتنقل علنى على كل وسائل الاعلام و يتحكم عليه بالاعدام و الكاميرا تتسلط على وشه و هو بيتلقى حكم الاعدام و يتعدم فى ميدان عام و كووووووووووووووووول وسائل الاعلام تصور و الناس فى كل الدنيا تشوفه و هو بيتحكم عليه بالاعدام و هو بيتنفذ فيه حكم الاعدام, عشان يبقى عبرة لغيره من البلطجية و تخلى أى من الخارجين على القانون يفكروا ألف مرة قبل مايتهور و يرتكب أى عمل مماثل و لا هما القضاء و القيادات الكبيرة فى الداخلية, دم الناس عندهم ببلاش و مش عايزين السلام و الأمن يسود و مش عاوزين البلطجية يتلموا و عاوزين الفوضى دى تفضل زى ما هى ؟؟؟؟!!!!!

اولا اشكرك ع كلامك في البداية
بص يا ريس انا عارف تقصد ايه و بتلمح لأيه لكن مش هتكلم عنه لأنه مش موضوعنا
بس اللي هقوله اتمني فعلا ان يبقي فيه اداء غير الحالي يرضي الجميع و ده اللي اي شخص بيتمناه و اللي يتمني عكس ده يبقي يا اما بلطجي فيه طبعه ياما هو شخص مش بيحترم حد و لا بيحترم القوانين

المشاركة الأصلية كتبت بواسطة FunnyMickey

عمر الناس ما شتمت في ظابط بيؤدي واجبه
بس مستحيل حضرتك تلاقي ظابط مرتشي ولا مغرور ولا تنك ولا يتنطط علي خلق الله
ويروح يضحي بنفسه عشان خاطر عربيه اتسرقت
في الغالب نفض
الاخلاق لا تتجزأ
مش ممكن حيفتري في القسم ويطلع يستشهد بره يعني

للأسف هخيب ظنك انا شوقت ظباط كويسيين و لا بيتعاملوا بتناكة و لا غرور و مرتشيين و مش بيشوفوا غير شغل
بل بالعكس متواضعين و مش بيمشوا يتفاخروا لكن بيتعاملوا ع انها مهنة ساعة الشغل مدني خارج الشغل
و طبعا شوفت العكس تماما فاللي بتكلم عليه الكويس مش لازم نعمم
سؤال انت دلوقتي شغال في شركة هل كل اللي في الشركة سيئين ؟؟ اكيد لأ فيه و فيه لكن الكويس بيروح في الوسط ده اللي اقصده

المشاركة الأصلية كتبت بواسطة adelmof40

كل مهنة فيها الصالح والطالح
لكن الصالح في الشرطة نادر جدا ربنا يكتر من امثالهم

و ده اللي بحاول اقوله لكن الناس كلها لازم تهاجم و خلاص و شوية شوية هيطلعوني فلة من الفلول و خاين
انا مش بدافع عن السئ انا بدافع عن الصالح فيهم
و زي ما قولت مثال الشركة في الرد اللي فات

المشاركة الأصلية كتبت بواسطة dentist4ever

انا شايف حضرتك بتدافع عن الشرطه دفاع المستميت ومش عارف سبب غير انى هاعتبر ده خوف منك على مصر من الانفلات الامنى
عايز من سيادتك ترد رد محدد على اسالتى :
-هل الشرطه تعمل باكمل وجه (بما يتناسب مع هزيمتهم النفسيه بعد الثورة) ؟
-حضرتك شايف نسبه الفساد فى الداخليه اد ايه (تقديرك الشخصى) ؟
عشان نعرف اكتر وجهه نظرك ونتناقش احسن

اولا انا مش بدافع عن الشرطة دفاع مستميت و لا حاجة انا بدافع عن الصالح فيهم اللي بيروح بين الرجلين مش بدافع عن السئ المفروض ندي كل واحد حقه

بالنسبة للاسئلة
1- اكيد طبعا الشرطة مش شغالة ع اكمل وجه و ده مش محتاج يعني لأنه واضح و اللي بقوله نحاول نطلب اللي عايزينه لكن بدون عنف و مننساش ان فيه منهم الصالح و السئ ده شئ في كل مكان

2-بالنسبة نسبة الفساد
الفساد غير قابل للتحديد بكام في المية لأنه ملوش حد ادني و لا حد اقصي
فالفساد في كل مكان حتي من الشعب نفسه لما تلجأ لطرق غير مشروعة عشان تقضي حاجتك تبقي فاسد الموظف اللي بياخد فاسد يعني كل واحد اشترك في الفساد

المشاركة الأصلية كتبت بواسطة Tyler_Durden

يا ريتهم كلهم كده
بس الواقع الشرطي بعيد كل البعد ،، الشرطة أدائها سيئ و ضعيف من قبل الثورة و مهتمين بأشياء أخرى غير حفظ أمن المواطنين البسطاء اللي هو دورهم

و على فكرة مافيش حد فوق النقد لا شرطة و لا غيره ،، حاول تاخد على الفكرة دي بقى

بص اكيد كلنا نتمني ان كله يبقي كده لكن احنا دلوقتي ملناش دعوة بقي بالماضي احنا عايزين نبتدي من الحاضر و نبص للمستقبل مش عايزين نوصل لمرحلة نبقي فيها زي دول زي جنوب افريقيا اللي نسبة الجرايم فيها بتوصل في السنة لأكتر من 14 الف جريمة طبقا للاحصائيات
و اكيد كل شخص قابل للنقد مفيش حد فوق النقد
و انا لما اضفت الموضوع قصدت الدفاع عن الكويس و ليس الدفاع عن السئ

المشاركة الأصلية كتبت بواسطة mmffor

اللهم ارحمه و تقبله عندك من الشهداء يا رب


لكن للاسف القصة دي توضح مدى القصور في تدريب ضباط الشرطة في التعامل مع مسلحين

الضابط طول عمره واخد على معاملة المدنيين العزل فبيدخل على المشتبه به فارد صدره على الاخر و رافع راسه و مناخيرة في السما و مش متخيل ان حد يعارضه بالكلام حتى فما بالك بتبادل اطلاق نار

في كل قوات الشرطة في العالم و حتى دول الخليج - عند التعامل مع مشتبه به - دايما تلاقي الضابط بيبعت تحذير و هو واخد ساتر و شاهر سلاحه تجاه المتهم ( حتى و ان لم يحمل المتهم سلاح ) انما هنا للاسف واخدينها عافية و دراع و نقول خليها على الله العمر واحد و الرب واحد - فهلوة

يا ريس ايه الكلام اللي بتقوله ده تدريب ايه و و مدنييين عزل ايه ؟ الكلام ده مش موضوعنا اساسا
حضرتك هل دخلت كلية الشرطة شوفت تدريباتهم عاملة ازاي ؟؟ هم بيدرسوا زيينا في حقوق مواد اه لكن اغلب الوقت مواد شرطية نظرية و عملية
و كمان حضرتك محضرتش الموقف متعرفش ايه اللي حصل عشان تحكم و انا اقدر ارد باللي المفروض يعمله او ميعملوش لأن انا مش في الموقف او حتي شوفته

و كمان اللي حضرتك بتقوله بتاع التحذير ده الكلام ده لو الشخص اللي بطارده وقف ع جنب فبيطلب منه انه يترجل
اما لو الشخص موقفش او لم ينصاع بيضربوا نار عالطول

و ع فكرة مش الشرطة بس اللي واخدينها عافية لأ الشعب كله واخدها عافية و كلنا بنقول الرب واحد و العمر واحد و بندخل شمال
اومال ليه كله بيخاف من الشعب المصري ؟؟ ههههههه كفاية ساعة اللجان الشعبية شافوا كل فئات الشعب واقفة في الشوارع من اطفال لعواجير حت الستات من الشبابيك ده لوحده عمل زلزال



و في الاخر بكررها تاني انا مش بدافع عن السئ انا بدافع عن اي شخص صالح و اضفت الموضوع كمثل عن افرد الشرطة اللي بيموتوا في مواجهة البلطجية او المجرمين او الارهابيين و مع ذلك محدش يعرف عنهم حاجة غير اللي يعرفهم و بيسيبوا وراهم اسر و عائلات

و في نفس الوقت يهمني ان البلد تهدي و تبقي كويسة في اسرع وقت

و بالتوفيق للجميع ان شاء الله