الموضوع: نداء الي ثورجية التحرير - يوم 8 يوليو

ياريت يكون نقاش موضوعي محترم
مفيش داعي للكلام ده يا اخ korkor

انا مش ضد انك تتظاهر عشان تاخد حقك ومقلتش ان المجلس العسكري ملايكة وسبحت بحمدهم ورفعت راية بطولاتهم زي ناس
بالعكس انا ليه رأي في المجلس العسكري وموقفه من الثورة من اول يوم لكن مش وقته ولا موضوعه هنا

لكن خلينا موضوعيين

انت نزلت يوم 8 يوليو
عاوز اييييييييييييييه

عاوز تعجيل المحاكمات .. حقك وطلب مشروع وممكن اجابته ببساطة
بس من غير قلة ادب وشتيمة في القضاه والقضاء وقدح في شرف وذمم الناس بدون دليل
حضرتك بتفهم في القانون او درسته
الاجابة لأ
الرد : روح اسأل واعرف الاجراءات اللي ممكن تتعمل عشان تتكلم علي بصيرة
واطلب حقك
عاوز تسجن قتلة المتظاهرين في السويس اللي اخلي سبيلهم مؤقتا علي ذمة القضية
لو سألت هتعرف ان اخلاء سبيلهم مش مؤامرة علي حضرتك ولا علي الثورة
ده حكم قضائي موااااااااافق للقانون - ولو كان القاضي طاوع الثوار وامر باستمرار حبس المتهمين ، كان اصغر محامي بشلن هيطعن علي الحكم ويلغيه ويجيب لهم اخلاء سبيل

عاوزين دم ومشانق في التحرير ونعيد تجربة الثورة الفرنسية - اوكيه
اسحب القضايا من القضاء المدني واركن القضاه علي جنب وحولها للقضاء العسكري
وانت هتاخد احكام بالاعدام والمؤبد لكل اللي ميضايقينك خلال ايام واولهم حسني وحبيب العادلي

بس في حاجة مهمة اوييييييييييييي
متجيش تلوم حد ولا تصوت لما المحاكم العسكرية تاخد العاطل بالباطل وتلاقي ابرياء من اعلاميين ورجال اعمال شرفاء وظباط وقضاه محترمين اخدتهم المحاكم العسكرية في الرجلين
ما هو ساعتها هتبقي شرعية ثورية تبيح في نظر الجالس علي المنصة اي شئ
ما ده لصالح الثورة
وده حال محاكم الثورة عموما عشان محدش يقولي مش هيحصل ،، ولينا سابقة في ثورة يوليو والمحاكمات اللي صدرت بعدها

عاوز الدستور اولا وتأجيل الانتخابات
عشان الاخوان
انا مش فاهم ايه موضوع الاخوان وحالة الفزع والتخوين دي
انا مش معاهم ولا ضدهم
لكن ناس بتتسجن وتتبهدل من سنة 1928 وناس تاني بتبيع مواقفها للحكومة واحزاب كرتونية وشباب مكنش يعرف حاجة عن البلد وصحي فجأة عاوز يكون ليه دور
اتفضل اعمل حزب وانزل للناس
الاستفتاء خلص 19 مارس
والانتخابات في سبتمبر
لكن نلغي الامتحان عشان في طالب مذاكرش
حتي لو عنده ظروف منعته من المذاكرة
فيه غيره استحمل الظروف دي وذاكر
كل واحد ياخد حقه
وبعدين يا جماااااااااااااااااعة الاخوان عددهم وقوتهم اقل بكتير من اللي الناس فاكراه
اديهم الفرصه وانتو هتعرفوا تأثيرهم الحقيقي
لكن تتطلع عاوز تلغي اللي فات وتبدأ من اول السطر
لأ

عاوز المجلس العسكري يرحل
والحكومة ترحل - انا شخصيا لا اطيق عصام شرف من تاني يوم تولي الوزارة لكن مش كل مسئول هيمسك عايزينه يجيب مصباح علاء الدين ويوجد لنا حلول سحرية
طب وبعدين
التغيير لا يأتي فجأة - دي سنة كونية وقاعدة ربانية مش من عند حد

انزل محدش منعك بس من غير متهد البلد
حدد مطالبك وافهم وادرس حالة البلد كويس
وبلاش حماس غير محسوب
انما هنقول
القضاء فاسد - الجيش فاسد - الحكومة عليلة - رجال الاعمال حرامية - ظباط الشرطة طغاه وفاسدين .... طب مين الكويس

يا جماعة لازم ندرس ونفكر قبل ما نطلب

يا جماعة ثورة الجياع لو طلعت علينا نتيجة توقف عجلة الانتاج هتنسف البلد
هتكون ثورة لا تبقي ولا تذر
مش هتفرق

اللي هيقوموا بيها منطقهم وااااااااحد ومعروف
انا جعااااااااان
مش لاقي العيش الحاف وانت راكب عربية
يبقي انت حرامي - واخدها منك أأكل عيالي
يا جماعة في دولة عربية شقيقة دفعت مرتباتنا الشهر ده - ووصفها وزير الخارجية بشقيقة كبري وطبعا ده زعل بعض الهتيفة وكدابين الزفة اللي طلعوا ينتقدوا الوزير ويقولوا ان مصر هي الشقيقة الكبري ومفيش حد اكبر منها
ده احنا 7000 سنة يا راجل مش كده

يا جماعة الفكرة ان فيه شباب كتير بيتلعب بعقولها وبيتغرر بيتها باسم شعارات رنانة
الوضع اخطر من اعتصام في التحرير البعض بيستغله لتحقيق اغراض معينة منها الاجرامي ومنها الطائفي ومنها السياسي الخبيث

واخيرا خلوا بالكو من الاعلااااااااااام ولا تنساقوا وراءه
اقذر اعلام شهدته مصر في حياتها كلها
خد معلوماتك من مصادر موثوق منها ويستحسن تكون مصادر مباشرة
ناس تلتمس فيهم الصدق والامانة

وربنا يصلح الحال والازمة دي تعدي علي خير

ياجماعة بلاش نقسم نفسنا في وقت مفروض كلنا نتحد فيه ونكون أيد واحدة ياجماعة أنتم كدة بتضعفوا موقفكم وموقفنا وبتدوا فرصة للكلاب والجبناء يدخلوا وسطنا ويعملوا فتنة عدونا واحد وهدفنا واحد ليه نختلف في الطريقة ....

القضاء : هل القضاة نزلوا من السماء ؟ هل هم أنبياء ؟ ألم يحدث تزوير في الأنتخابات طوالة مدة حكم الديكتاتور المخلوع ؟ ألم يكن القضاة يأتمروا بأمر رجال أمن الدولة حسب تصريح المستشار هشام الباسطويسي ؟ يعني أيه منشككش في القضاء يعني أيه القتلة والسفاحين والحرامية يتحاكموا وياخدوا براءة ؟ والنشطاء السيايين يتحاكموا عسكرياً ويتحبسوا ؟

الجيش : عالعين والراس أخواننا وأولادنا وأهلنا زيهم زي الشرطة أهلنا واخواننا بردوا بس زي مافي الحلو في الوحش زي ما في فاسد في شريف .

لما تفاحة حمرا حلوة وطازة تتحط وسط تفاح فاسط متعفن أسود 30 يوم مش 30 سنة هيحصلها أيه هتفضل على حالها ؟ لأ طبعاً هتفسد وتتسمم نفس الحال الفساد بقى نظام عندنا بقى هو الأساس والقاعدة وبقى الشرف والأمانة هما شواذ القاعدة أصبح الناس يستهزؤا بالشريف ذو الخلق ويحترموا ويقدروا الصايع البلطجي اللي معاه فلوس .. الناس بقت بتاكل في بعضها مبقاش في حد طايق حد سرقة وقتل ونصب وتزوير الخ الخ الخ ...

لو هو ده الأستقرار اللي أنتو عاوزينه يبقى ما أحقره من أستقرار .... لو هو دة الأمن والأمان اللي بتدافعوا عنه وبتهاجمونا علشانه فبئس الأمن والأمان ..... ولو نسيتوا كم الجرائم وحوادث السرقة اللي حصلت في الفترة اللي قبل الثورة نتيجة الفقر والجوع والفساد لما كل واحد بقى ماشي بيبص وراه كل ده كان في عصر الأستقرار والأمان بتاع مبارك ياجماعة لو عاوزين مبارك موجود لسه لو عاوزين تشموا هو نظيف أنزلوا التحرير .