هو انا كده غلطان

**khaloooda** · 09-07-2011 07:11 PM

حد يفهمني يا جماعة الله يكرمكو

انا ماشي في امانة الله
الطريق مش سالك اوي شوية يمشي وشوية يقف
المهم الطريق هدي وانا ماشي بالراحة واسمع من مرايا صوت (ايييييييييييييييييييييي طججججججججج)
فين يا معلم في اكصدام العربية اللي ورا
اتاري واحد بموتوسيكل جاي بسرعة سرحان ولا مش واخد باله من الطريق فرمل فجأه ملحقش راح الموتوسيكل مقلوب بيه ومتزحلق بيه علي الارض لمسافة الي ان اصطدم بالاكصدام بتاعي

نزلت وانا ناوي اطلع ..... انتو عارفين الباقي

لقيتو مرمي علي الارض ومتعور والناس حواليه بصيت علي الاكصدام لقيته اتجرح وشكله بقي زبالة بس متطبقش
قلت خلاص حصل خير ما انا كده كده كنت ناوي ارشه قريب

ومشيت

لحد هنا تمام
لكن انك تسمع طول ما انت ماشي تعليقات الناس

" سايب الراجل سايح في دمه - ايه مفيش انسانية - طب بص علي الراجل - الراجل بيموت - لا حول ولا قوة الا بالله - ادي اللي خدناه من العيال " وغيرها من التعليقات وكأني انا اللي خابطه

وكل ده ليييييييييه
عشان موقفتش اطمن علي جنابه
خبطلي العربية وبدل ما اوديه القسم واسجنه - سامحته ومشيت

لأ ازااااااااااااي الراجل متعور وبينزف
مش اخده اوديه المستشفي واعمله اشعة وارضعه وانيمه في سريره كمان ومش بعيد ندخل سينيما من تسعة - بلاش اتناشر عشان ورايا شغل
وان كان عالعربية
اهي غارت
فداه

حد يقولي لو مكاني كان هيعمل ايه مع الناس دي
وياتري انا فعلا غلطان اني سبت الراجل اللي خبطلي العربية ومشيت وهو بنزف لما وقع من علي الموتوسيكل

وان مكنتش غلطان - ليه رد فعل الناس كان كده - ايه مفيش تمييز ولا عقل نعرف بيه من الصح ومين الغلط

**FunnyMickey** · 09-07-2011 07:22 PM

هوا مخبطكش قاصد
هوا سرح ووقع فخبط في عربيتك
واتعور
كان لازم طبعا تقف تشوفه ولو تقدر تساعد او معاك اسعافات تساعده
محدش قال انك غلطان طبعا
بس ده واجبك تجاه اي شخص
زي الناس اللي بتقف لما تحصل حادثه جامده تساعد
مفيش عليه غلط لو موقفش
بس اهو بيساعد

بس حتخانق معاك حته خناقه لو رحت السينما ومخدتنيش معاكو :)

**waelfarid** · 09-07-2011 07:48 PM

زعلك علي عربيتك مينفيش شعورك وواجبك الانساني تجاه واحد متعور وخصوصا انه مش قاصد بس كون الناس مبتفهمش في تقييم الحادث والذنب علي مين لجهلهم المروري والانانية في امتلاك عقلية متخلفة في ترتيب الاحداث وان اي حد سايق ملاكي يبقي وارثها ولا سارقها او مش تعبان فيها مخ لا مؤاخذة اه ده بالاضافة لحكمهم من خلال النظر للي سايق العربية صغير في السن يبقي علي طول طايش وعديم المسؤلية ربنا يرحمنا برحمته

**yousef1978** · 09-07-2011 07:57 PM

لا يؤمن أحدك حتى يحب لأخيه ما يحب لنفسه

لو حضرتك في نفس موقفه - حتى لو الخطأ من عنده - لكن لو انت مسكين وكل ما تملك موتوسيكل وخبط في عربية موديل السنة كسرتله الباب مثلا وبعدين لا قدر الله اتعورت ومرمي في الشارع ومحتاج نقل للمستشفى ولا على الأقل حد يلمك انت والموتوسيكل ويركنك على جانب الطريق لغاية ما واحد ابن حلال يحن عليك ويسعفك

كان هيكون شعورك إيه

ما تزعلش من كلامي فالمؤمن مرآة أخيه

**aminibrahim** · 09-07-2011 08:46 PM

انسانيا غلطان

**Amr Axel** · 09-07-2011 09:04 PM

متزعلش مني انت غلطان جداااا
انك سيبته ده حتي لو قاصد و اتعور انسانيا بتنزل تبص عليه
ده احنا البلد الوحيدة في العالم اللي معروف عن شعبها الشهامة و انه لو شاف اي حد في محنة يجري عليه يساعده حتي لو هيموت بس بيروح يساعده

و لمجرد انه خبطك ميمنعش انك تبص عليه و انت بتقول كمان اتعور يعني حتي لو مش ذنبك ممكن تساعده باي حاجة و لو شوية مية
يعني الواحد حتي لو ملوش علاقة بالحادثة بيطلع يجري علي المصاب يسعفه
فهنا حضرتك طرف في اللي حصل

و قبل ده كله حط نفسك مكانه ايه ساعتها شعورك لو حصلك كده و الراجل اللي خبطت فيه عمل معاك زي ما انت عملت معاه اول حاجة هتيجي في ذهنك عنه ايه ؟؟؟ ( معروفة طبعا )

مشيت وكتمت غيظي زي ما امرنا رسول الله
بصراحة كل بني ادم وله طاقة
فيه واحد يقدر ينزل وعادي جدا ولا يهمك وعامل ايه سلامتك
وفي واحد تاني بدل كا ينزل يهلل ويشتم كتم غيظه وسكت ومشي

الرسول صلي الله عليه و سلم امرنا بكظم الغيظ لكن مأمرناش اننا نشوف شخص محتاج مساعدة و نسيبه و لا ايه ؟؟

و بالنسبة تعليق الناس نظرا لتصرفك و واضح انك لسه شاب صغير
و نظرا لأننا بنشوف شباب كتيير صغير في السن في منتهي التهور و العجرفة فاول شئ بدر لذهنهم انك من الشباب دول بلاضافة ان الناس متحققوش مين الغلطان لكن حتي لو تحققوا أؤكدلك ان ده هيكون نفس ردهم
يعني حط نفسك مكانهم برده لقيت حادثة فيها شاب و واحد مرمي في الارض بينزف و لقيت الواد نازل بيبص ع العربية و مشي و ركب و معبرش الراجل حتي يقوله انت كويس
اول حاجة هتقولها ايه عليه ؟؟؟

و في الاخر متزعلش مني بس انت اللي طلبت المشورة :)

المهم بقي الفيشار و البيبسي ع مين في السينما :))