الموضوع: السفر بري من الإمارات إلى مصر

إيه يا جماعة ما حدش جرب الموضوع ويقولنا أي معلومة ؟؟؟؟؟؟؟؟

إحنا جربنا السفر بالبر من الكويت لمصر عن طريق الكويت مرورا بالسعودية ، لميناء جدة (ولا ضبا ، مش فاكر ، الكلام ده من 12 سنة ههههههه) لسفاجا للقاهرة

مدة السفر 3 أيام ، السفر مش متعب بس ، ده مهلك جدا (ده أتوبيس سياحي مش بالعربية كمان)

بالنسبة للتكاليف ، مش فاكر كام فعلا ، بس هي كانت رخيصة جدا مقابل الطيارة

خد بالك ، الموضوع متعب جدا خاصة لو بالعربية ، هل هتعرف تستحمل تسوق ساعات طويلة جدا متواصلة؟؟

لازم يكون فى حد معاك
تبدل معاه فى السواقه ويونسك
غير كده بلاش

السلام عليكم و رحمة الله و بركاته

أنا مش عارف الخريطة بالظبط, بس, أن متهيألى أنك تيجى لحد الرياض و منها الى مكة و بعد كده تاخد طريق الساحل من جدة الى ضبا مرورا بينبع و أملج و الوجه ثم الى ضبا, أنا مش عارف المسافة من أبوظبى الى الرياض كام و لا من الرياض الى مكة كام, بس اللى أنا أعرفه أنها من مكة الى جدة حوالى 50كم و من جدة الى ضبا حوالى 900 كم و ميناء ضبا بيبعد عن مدينة ضبا نفسها حوالى 20 كم, اركب من ضبا العبارة السريعة الى سفاجا طبعا لأنها أقربلك الى المنيا.

لو عاور تروح المدينة, يبقى بعد ماتخلص فى مكة, هتطلع الى المدينة, المسافة حوالى 400 كم تقريبا و منها الى مدينة تبوك مرورا بخيبر و بصراحة, أنا مشيت عالطريق ده مرة واحدة و الطريق النص الأولانى بتاعه محتاج حرص فى السواقة لأنه مفرد و بعد كده هيبقى مزدوج لحاااااااااااااد مدينة تبوك و من مدينة تبوك, ممكن تسافر الى محافظة ضبا و دى المسافة حوالى 180 كم, الطريق من مدينة تبوك الى محافظة ضبا, كان من سنة و نص, مفرد, بس أنا متهيألى أنه بقى مزدوج دلوقتى, طريق زبالة, كله ملفات و السعوديين بيجروا عليه بسرعة 200كم/س و بيعملوا حوادث ممكن تتعرض فى مواقف و طرائف.

أنا أنصحك, أنك تطلع من أبوظبى, الى الرياض الى مكة و تاخد طريق الساحل الموازى للبحر الأحمر من جدة لحاااااااااااااااااد ضبا .

أهم شيييييييييييييييييييييييي ييييئ أنك تكون حريص جدا جدا السواقة لأن المسافة طويييييييييييييلة جدا و وارد أنك تصاب بالارهاق الشديد, لأنى كطبيب, اشتغلت فى تبوك 3 سنين و بصراحة كانت بتجيلنا مآسى من المصريين المسافرين برا الى مصر كل سنة فى اليومين اللى زى دول, لأنهم بيكونوا سايقين مسافات طويلة جدا و بيصابوا بالارهاق و ممكن يكونوا بيجروا عشان يلحقوا العبارات اللى هتقوم من ضبا و خاصة أنهم بيكونوا راكبين عربيات حديثة و قوية و بتجرى و بصراحة بيعملوا حوادث بشعة جدا, فأرجوا منك أن تاخد حذرك بشدة.

ألا مفيش أخبار عن الكوبرى اللى هيتعمل بين مصر و السعودية و ينزل على راس ابن الteeeeeeeeeet فى شرم الشيخ ؟؟؟؟

بالسلامة ان شاء الله.

[quote=maserati;3873642577]

السلام عليكم و رحمة الله و بركاته

جزاك الله كل خير

انا للأسف في حتة بعيدة عن ابو ظبي ومش عاوز انزل أبو ظبي علشان أوفر التعب لسفر السعودية

أنا ان شاء الله هآخد طريق الخرج من حدود الإمارات للرياض
وبعدن آخد طريق مكة وإن شاء الله ربنا يكرمني بعمرة مقبولة

هيركب معايا واحد من الرياض بس مش بيسوق بس هيآنسني في الطريق وربنا يسترها علينا

لو لقيت عندي وقت هأروح المدينة بأمر الله

لو هأتأخر هآخد طريقي علطول علشان ما أخالفش

أنا مش معايا خريطة للأسف لكن اشتريت موبايل حديث فيه جي بي اس مجاني

طبعا السفر السنة دي مختلف عن أي سنة سابقة لظروف الطرق في مصر وعلشان كده سالتكم لأن كل اللي حولي ما فيش حد فيهم سافر بري بعد الثورة

بخصوص الطرق في مصر حسب نصايح اللي في مصر إني أمشي في النهار فقط

وعلشان كده محتاج اركب سفينه توصلني الصبح وده اللي بيخليني أفكر أنزل عن طريق العقبة من الأردن وأنزل أ....... على ....... في شرم الشيخ وأكمل على السويس أمسي على المتظاهرين وعلى أهل السويس الكرام وبعد كده آخد طريقي للمنيا

ده اللي فكرت فيه ولو حد فيكم عنده نصيحة غير موضوع إني ما انزلش بري يبقى ينصحني وله مني كل تقدير

انا ليا صديق كان طلع من ابوظبى لحد مصر هو حكالى الرحلة عشان انا بفكر انزل حج السنة دية و اكمل على مصر بس انا معرفش طريق الخرج ده ... انا اعرف انك تاخد طريق ابو ظبى - السلع حوالى 450 كيلو و بعد كدة تدخل السعودية من منفذ الغويفات و تاخد طريق الهفوف , توصل الهفوف ان شاء الله تاخد طريق الهفوف - الرياض ... المسافة من الغويفات الى الرياض حوالى 700 كيلو تقريبا و بعد كدة تاخد طريق الرباض مكة ( قالى انه طريق كويس و علية خدمات ) توصل مكة وتاخد طريق ينبع و ضبا بمحاذاة الساحل لحد ضبا ... حاول تظبط نفسك على معاد العبارة ... فى نوعين من العبارات العبارة السريعة و دية بتقطع البحر من ضبا الى الغردقة فى 4 ساعات و العبارة العادية بصراحة معنديش فكرة عنها ... لو هتطلع من مكة الى المدينة يبقى زى ما قالوا الاخوة تطلع على تبوك و هناك هتجد مكاتب حجز العبارات تظبط منها و تتطلع بعد كدة على ضبا... موضوع العقبة اسمع انة متعب و مواعيد العبارات مش مظبوطة ... انا حاولت اديك خطوط تمشى عليها و ظبط الجى بى اس و توكل على الله وتوصل بالسلامة .... انا بس عندى استفسار ..انا لما روحت مكتب التربتك قالى ان لازم امضيلو على ايصالات امانة على بياض لحد ما ارجع .. الكلام دة حصل معاك و لا اية ؟؟؟!!!!

ابن خالتى السنة اللى فاتت نزل من الكويت لحد مصر بالطريق البرى :)
بس معاه عربية مازدا موديل 2010 دفع رباعى عربية تاكل الطريق و تستحمل المسافة دى كلها