الموضوع: حد هنا عنده قريب حصل له موضوع الغدة الدرقية ده؟

المشاركة الأصلية كتبت بواسطة azmeralda

ايوه فعلا انا اعرف ان الدكتور لازم يمشى على تنيات الرقبة والمريض قاعد مش نايم كمان بس واحدة قريبتى عاملاها ومنظر الجرح جامد مع ان فات سنتين وباين جدا مش زى ما بتقول خالص لو دققت وكده فيمكن عشان دكتور التجميل فعلا لازم يكون موجود ساعة العملية

بس بيقولوا الليزر ده خرم صغير ومش لاقية حد اسأله يكون عملها

بالنسبة لأخد دوا طول العمر فعلا شىء ممل بس اعتبره زى الأكل والشرب طول العمر ما احيانا بيبقى ممل وملكش نفس تاكل بس بتاكل عشان لازم تاكل عشان لازم تعيش ده فى ناس كتير بتبقى عيانة طول العمر بحاجات اصعب زى الغسيل الكلوى بعد الشر علينا فحبايتين كل يوم مش مشكلة وبعدين مرض بيخلى الواحد رشيق مهما ياكل ده فى ناس بتحسد عليه: ) متخلفين والله

أنا حقولك اللي فاكره لأن العملية كانت من 3 سنين تقريباً .. معرفش العملية بتتعمل والمريض قاعد ولا نايم .. بس أخر حاجة فاكرها قبل البنج اني كنت نايم على سرير العمليات .. وبعد العملية طبعاً لأن الألم بيبقى جامد كنت باخد مسكنات من عائلة الترامادول في الجلوكوز لمدة يومين (المدة اللي قعدتها في المستشفى وكنت أيه أخر سلطنة والمزاج عالي جداً لأني والحمد لله مبخدتش أي نوع من أنواع المخدرات) وبعد ما خرجت من المستشفى رحت للدكتور استشارة في العيادة وكانت رقبتي بتوجعني جداً (مش من العملية .. وجع زي ما يكون الرقبة كانت ملوحة وأنت نايم) .. فقالي ده طبيعي جداً لأن أسلوب تنفيذ العملية أن الراس بتبقى نازلة من حافة سرير العمليات .. مش عارف أوصلهالك ازاي ؟! بس أكني نايم وجسمي كله على السرير والراس فقط هي اللي نازلة بحيث تبقى الرقبة مشدودة .. وطبعاً مع مدة العملية (حوالي ساعتين) أكيد الرقبة تأثرت بهذا الوضع .

أكيد قريبتك دي الجرح متخيطش بطريقة تجميلية علشان كدة باين حتى بعد فترة .. والخياطة التجميلية بتتقدم كل سنة عن التانية .. ومسمعتش عن الخياطة الليزر دي بصراحة مع أنها ممكن تكون معمولة عندي .. لأني مش فاكر إذا كان في سلك اتفك ولا لآه .. اللي فاكره هو الدرنقة اللي اتشالت بعد يومين .. والحمد لله على كل شيء وأحنا أفضل من ناس كتير .. وتحت أمرك في أي استفسار .