الموضوع: انطباعاتى عن الشارك

المشاركة الأصلية كتبت بواسطة just_magdy1

السلام عليكم
حبيت اشارك الاخوة مالكى الشارك انطباعاتى عن العربية دى ومش هاقول تقييمى لانى مش متخصص انا مجرد مستخدم للسيارات لكنى ركبت عربيات كتير جدا لانى غاوى تغيير (اخر سنتين انتقلت من الاوبترا الى الالنتر ثم الشارك) بالاضافة انى سقت عربيات اصدقائى زى البوما والسيراتو والكورولا
اول ما اشتريت العربية كنت منبهر بشكلها وفخامة صالونها بس ماعجبتنيش فى اول رحلة سفر وفكرت ابيعها واستفسرت من حضراتكم هنا وفعلا اكتشفت ان العربية كانت محتاجة ضبط الكاوتش + ترصيص + ضبط زوايا
وفعلا عملت كل الحاجات دى وفعلا العربية اتغيرت كتير
- الثبات ممتاز انا وصلت الى 160 كم وكنت ممكن اجيب اكتر .
- اخدت بالعربية ملفات عند 140 كم على طريق الشرم والعربية ماعومتش معايا زى الاشاعة اللى طلعت عليها لان شنطتها عاليه
- الموتور صوته عالى بس مش مزعج وعلى السرعات العالية مافيش فرق بينه وبين الكورولا 2010 الهاى لاين اللى سقتها كتير
- عربيتى السابقة كانت النترا كنت شاريها زيرو موديل 2010 كنت بوصل بيها الى 160 كم بس كنت ببقى خايف ومكنتش اقدر اغير مسارى بشكل مفاجىء(اعتقد دى اللى بيسموها غرز)
- العربية تخطف العين مع ان فى عربيات كتير جميلة بس العربية دى دايما بتشد عيون الناس ليها (يمكن عشان مش منتشرة)
- الشىء الوحيد اللى ماعجبنيش هو انى حسيت ان الفتيس بيتاخر شوية فى النقل (وخصوصا لما التكييف بيكون شغال )
- شىء اخير يا رجالة فعلا العربية دى فيها شىء غريب وده حسيته من الزملا ملاك العربية
وهو انه بيحصل حالة من العشق بينك وبين العربية دى وده ماحستوش فى اى عربيه تانيه فعلا العربيه دى انا حبتها جدا

و عليكم السلام و رحمة الله و بركاته

تقرير جميل

انا اتفق معاك في كلامك و في اخر حتة دي
فعلا العربية الواحد حبها جدااا
انا الصراحة لسه ما جربتش اجيب بيها سرعات عالية
اخري كان 130 و مقدرتش ازود عشان الطريق شبه زحمة
بس انا جربت اخد غرز و ملفات بسرعة 100- 120
و الحقيقة العربية اثبتت جدارة و ثبات ممتاز من غير تعويم
او الشنطة تلعب و الكلام ده
العربية فعلا ما شاء الله شكلها يخطف الانظار
بالنسبة لمشكلة ان الفتيس بيأخر في النقل لما تشغل التكييف,,الصراحة دي ما لحظتهاش,بس كنت شايف ان التكييف تاثيره على السحب غير ملحوظ

عموما ربنا يباركلك في عربيتك و يديك خيرها و يكفيك شرها

المشاركة الأصلية كتبت بواسطة dr_medoo

انا بصراحه فكرت جديا فى العربيه ديه بس انا لقيت ان العربيه مش منتشرة غير الانسر البومه معرفش ليه فبصراحه قولت اسال الاول عن العربيه قبل ما اشتريها خصوصا انا كان معاى كورولا 2003 وطبعا كلنا عارف الكورولا عامله ايه فى الناس هنا فى مصر بيعشقوها بس بصراحه عاوز اعرف رايكم ايه يا جماعه

السلام عليكم

مبدأيا هي العربية بش منتشرة الانتشار الرهيب زي البومة
زي ما قولت حضرتك
بس فعلا بشوفها كتير,في منطقتي بس فيها حوالي 10 عربيات شارك
اعتقد سبب عدم الانتشار الرهيب راجع لان قطع غيارها كانت غالية حبتين و كمان و الاهم ثقافة سوقنا في السيارات
كله بيشتري اللي منتشر و بس و بش بيبص لحاجات تانية افضل و احسن مليون مرة من اللي بيشتروه
عربيات كتير اتظلمت في سوقنا,,مع انها عربيات ناجحة جداا في دول اوروبا و الخليج
ده غير طبعا الفتاوي و الاشاعات اللي الواحد بيسمعها كل شوية سواء على الشارك او اي عربية تانية اتظلمت

نتكلم على العربية (الشارك) شوية

العربية محترمة جدااا و سحبها حلو جداا بش زي كلام الناس اللي يقولك بطة و غيره
العربية ما شاء الله ثباتها ممتاز و مريحة في القاعدة الداخلية
تكييفها تلاجة فعلا ما شاء الله
الصالون اوسع من البومة و اللي بيقعد ورا بيقعد مرتاح
العربية من جوه تحس باحساس الفخامة و من بره شكلها ما شاء الله جميل جداا (و دي طبعا اذواق)
الشنطة ضيقة نسبيا,لان الاستبن عبارة عن جنط مقاس 16 نفس مقاس الجنوط اللي في العربية,فبالتالى واخد ارتفاع شوية في الشنطة,لكن لو بدلته و جبت استبن عادي,حتلاقي وسع جميل جدااا

انا الصراحة ما ركبتش الكورولا عشان اقدر احكم و اقارن بين الاتنين
و اول ما التوكيل الجديد يبدأ,,مكن تسأل عندهم على test drive للعربية
عموما استخير ربنا و ربنا يقدملك اللي فيه الخير

الف مبروك

بالمناسبة يا رجالة من كام يوم دخلت معرض سيارت وقلت اشوف الالنترا الشكل الجديد هى فعلا من بره شكلها مبهر بس للاسف من جوه الخامات اللى مستخدمة فى التابلوه والصالون غير جيدة بالمرة ولقيت خامات الشارك افضل بمراحل .. ده للناس اللى بتقول خامات صالون الشارك سيئة

كلام حضرتك كله صح وفعلا الفتيس النقله فيه بتاخد وقت مش بتاخر بمعنى ان فى وقت ضايع بين النقلتين طبعا الوقت ده لا يذكر