حتي المسكنات تقريبا بقت صيني (حسبي الله ونعم الوكيل)
قاعد في امان الله بتامل في ملكوت ربنا وصفحات المنتدي والفيس بوك قبل الفجر بشويه
وسمعت طرقات علي كليتي اليمني
انا : مييييييين اللي بيخبط
الوجع : انا الوجع جاي اقلق منامك
انا: ياعم اتكل علي الله مش وقتك عاوز انام وعندي مشاوير اصبح
الوجع : استني بس لما انخر في كليتك شويه واطلع عينك
انا: حشربلك ميه ومش حتعرف تعمل معايا حاجه
الوجع : طيب خد وخلي ميتكم المعفنه دي تنفعك
انا: هات ياعم وامري لله ماهو انا فاضيلك
الوجع : ها عاوز كمان هأو أو أع (ضحكه رقيعه من الوجع)
انا : استني احاول انام يمكن تتخمد انت كمان
الوجع : انت عارفني مبجيش غير بالليل واحمد ربنا مش جايلك يوم جمعه زي ما باقي ااوجاع بتحب تيجي
انا : متشكرين منك يا عم بس مش حسيبك وحروح للي يموتك
الوجع : اعلي ما في خيلك اركبه
ونزلت مشيت لحد المستشفي ولولا بقايا من كبرياء لكان الوجع مشاني علي ركبي
الوجع : ها خفيت شويه ارجع بقي نكمل في البيت
انا: تصدق فكره بس انت لسه ممشيتش
الوجع : ماشي انت اللي جيبته لنفسك
وروحت المستشفي
وكان فيها دكتور تقريبا قرفان من نفسه
كشف عليا وقاس ضغطي وسالني علي اماكن الوجع
وقال للمرضه اديله حقنه ^#$#%إٌ^& في الوريد دا عنده مغص كلوي
ولمن لا يعرفوني
فانا علي اتم استعداد للتضحيه بصباعي او دراعي من غير ما اخد بالي
ولا اني افرد ايدي مستني حقنه
وبدا المسكن ياخد مفعوله
الوجع : لااااااا الحقوني كفااايه مش حعمل كده تاني
انا : مش قولتلك من الاول اديك اخدت علي دماغك
الوجع : خخخ خخخ خخخخ :36_1_50[1]:
ومشيت زي الفل نص ساعه بالتمام والكمال وانا قاعد في بيتنا
تك تك تك خبطات خفيفه علي جنبي
انا : مييييييييييين
الوجع : هاااوم انا صحيت حضرلي الفطار
انا : يخربيتك مش كنت اتخمدت من المسكن
الوجع : مسكن ايه ياعم دي باين عليهم حقنوك بميه غسيل
وبدانا نتعايش انا والوجع واستحملته ومشكورا فضل ينخر بكل قسوه وبلا كانه عنتره لعبسي في حومه الوغي
بس سابني انام ساعه
وقالي اصحي اكتب حكايتك علي المنتدي يمكن اصحابي الاوجاع التانيه ييجوا ومتشوفهومش تاني
اللي نفسي اعرفه
ايه نوع المسكن اللي بيقعد نص ساعه ده ؟؟؟
مسكن صيني مدينهولي علشان ادفع تمنه واروح بيتنا تاني !!!؟؟؟
عموما هي فرصه كويسه اني اجرب العلاج بالاعشاب علي نفسي بدل الادويه العقيمه اللي الدكتور كتبهالي
انا قاعد بكلمكم والوجع قاعد جنبي اهوه ههههههههههههههههه
قصدي قاعد في جنبي
ودمتم سالمين
معلش رغيت كتير بس ليل العيان طويل
وقولت افضفض معاكم
