مش فاهم الناس مالهاو عايزين ايه ؟ قال ايه سرعة محاكمة المتهمين , احنا لحقنا دا الموضوع بقاله 5 شهور بسسس؟؟ الموضوع عادى بياخد 10-15 سنة و لا ايه؟ احنا عايزين محاكمات عادلة يعنى ياخد وقته و طبيعى القضايا فى مصر بتاخد سنين يبقى نصبر !!
قال ايه عايزين تطهير ؟ يعنى الحكومة ترش كلور و لا ديتول؟ مهم شالوا وزراء كتير من الحزب و غيروهم بوزراء تانيين من الحزب برده و شالوا محافظين لوائات و جابوا لوائات تانيين و شالوا مديرين الامن و نقلوهم لمديريات امن فى محافظات تانية تمهيدا ان بعد 10-50 سنة يجيى وزير اقتصادى مميز مشهور او شخص اكاديمى محترم و لا مطلوب نقلب الطرابيزة مرة واحدة مفيش حاجة بتتغير فى يوم و ليلة؟
مطلوب ايه تطهير وزارة الداخلية؟ مالها الوزارة 10/10 و حالة الانفلات الامنى مستمريتش اكتر من 5 شهور بس بعد الثورة و لا الناس فاكراها فسحة و الناس اللى قتلت و عذبت باقيين علشان فى العهد الجديد فى بلطجية كتير و محتاجين ناس جامدة علشان تسيطر عليهم.
كل شوية طلبات طلبات و لا الالعن واقفين عجلة الانتاج , كل ما يحصل استحمار قصدى استقرار تلاقيهم نزلوا علشان يوقفوا العجلة!!!
عايزين نشتغل بقى و العجلة تدور و نلحق نفرح بال700 جنية الحد الادنى للاجور و طبعا دول كفاية اوى الناس تحوش منهم لا و الالعن يقولك قال ايه عايزين حد اقصى للاجور يعنى روساء الجامعات و مجالس ادارات الشركات الحكومية اللى هما كفائات تمتاز بيهم مصر قليل لما تلاقى زيهم فى العالم ياخدوا ايه ملالييم ؟ 100 و لا 200 الف فى الشهر زيهم زى رجل الاعمال المتوسط الحال و لا زى مذيع؟؟؟ امال هما بياخدوا 500 الف و مليون جنيه فى الشهر ليه مش عاشان الانجازات اللى بيعملوها فى المصالح الحكومية اللى اصبحت لا تقارن بالشركات الخاصة؟؟
دى بقت جمهورية التحرير و كل شوية طلبات قال ايه يا اخى عايزين مصر تتقدم و تتطور , فى حاجة كدا تحصل مرة واحدة؟؟ نصبر 100 سنة و لو المطالب متحققش ربعها نصبر 100 كمان و بعدها ننزل التحرير
المفضلات