الموضوع: تقرير صيانه ال 1000 كيلو في التوكيل

السلام عليكم ورحمة الله وبركاته
الحمد لله عملت صيانه ال1000 كيلو في التوكيل ابو رواش
اولا العربيه كانت عامل 2041 كيلو
روحت هناك الساعه 9.30 تقريبا
المهم روحت هناك سلمت العربيه للمهندس وعمل حاجه غربيه جدا
في رسم كده عند استلام العربيه
لاقيه عامل دواير كتير سئلته ايه ده قالي دي خدش في العربيه والعربيه مافيش فيها الا خدش في الجنط
وخدش في الفانوس بس
لاقيته عامل بتاع 12 حكه في كل ناحيه
بصراحه قلقت
قولت عادي
سلمت العربيه
وقالي هتستلم بعد 4 ساعات!!!!
ونزلت تحت في الانتظار
مافيش شاشه تقولك عربيتك فين ولا فاضلك قد ايه ولا الكلام ده والتكييف كان تعبان جدأ
والمكان كان زحمه اووووي
مكان في مكان اقعد فيه دخلت صليت وقعدت في الجامع شويه
وبعدين خرجت الجو ممل جدا مافيش اي حاجه تسليك خالص
انا حسيت بقيمه اللاب توب في المشوار ده مع اني مش بحبه خالص كا جهاز
واللي زود مللي الموبايل بتاعي كان فيه مشاكل ومقفول
كان ممكن يسليني كنت حاطط عليه 21 جيجا افلام كنت ممكن اتسلي ملل التنين
فضلت قاعد لحد الساعه 2.30 قولت اطلع اشوف الدنيا فيها ايه
لاقيت العربيه خلصت بقالها شويه صغيرين

بس بصراحه العربيه مغسوله غسله صح صح من جوه ومن بره
غسلت الموتور بالفوم بقي بيلمع زي المرايا
فرامل اليد بقت جامده جدا واحسنت
ده كله وانا واقف
دفعت الفوس
470 جنيه بكله الزيت والفلتر والمصنعيه 135 جنيه
وغسيل المحرك ب 30 جنيه
اولا انا شايف ان السعر معقول
ثانيأ مشيت العربيه حاجه تانيه خالص
بقت ثبات افضل المطبات مبقتش احس بيها زي الاول
العربيه عايزه تطير من علي الارض
بتجري جري غير طبيعي
والفرمل بقت اقوي واثبت العربيه بقت عربيه تانيه
بصراحه الناس شايفين شغلهم صح
ومش خساره فيهم 470
التوكيل توكيل يا جماعه انا هعمل كل الصيانات في التوكيل
وانصح اي حد يعمل الصيانه في التوكيل وبخصوص ال 1000 كيلو

اغلي بس انضف والفرق مش كبير اووي بس فرق المصنعيه والناس فاهمه شغلها صح
اه صح نسيت العربيه خليجي 2011
والسلام عليكم ورحمه الله
تحياتي ....

المشاركة الأصلية كتبت بواسطة ZeZoZeZ

ما شاء الله رربنا يباركلك فيها و يكفيك شرها يارب اصلى انا برضو معايا بفضل الله كارينز خليجى و كنت بفكر برضو اعملها صيانة الالف هناك و الصراحة تقرير حضرتك شافى ووافى و كامل الف شكر على التقرير

شكرا ياباشا