مشكلتين اغرب من بعض فى عربيتى الانوس و هى مكملتش 400كم

اولا صباح الفل عليكو جميعا و يارب تكونو استمتعتو بالإجازه اللى فاتت
الحمد لله اشتريت دايو لانوس من حوالى 15 يوم وعامل بيها حوالى 400 كم
المهم حدث معى الأتى :
1- الأسبوع الماضى بدأت اشم ريحه شياط وانا سايق و خصوصا لو واقف فى اشاره و العربيه دايره كانت الريحه بتزيد جدا لدرجه تقلق :eek: فقلت مبدهاش اخد يوم اجازه و اطلع على التوكيل و امرى لله فرحت ابو رواش و بعد الفحص خرج لى الفنى ومعاه قطعه مشمع تقيل من اللى بنحطه على الغسيل لما المطره تمطر حاجه شبهه كده وكانت محروقه خالص فقلتله ايه ده فقالى دى كانت لزقه فى الشكمان من تحت و هى اللى كانت عامله ريحه الشياط و انا خلاص نضفت الشكمان بفرشه سلك وبقى تمام فأستغربت جدا لأنه مشمع تقيل زي ده اكيد كنت هلاحظه فى الشارع لو عديت عليه المهم قلت الحمد لله انها جت على قد كده ومجاتش فى الضفيره ولا حاجه كبيره لا قدر الله و استلمت العربيه بعد دفع مبلغ 11 جنيه ولكن الغريييييب جدا انى لسه بشم ريحه الشياط ديه لغايه دلوقتى :mad: !!!

2- امبارح كانت رايح لدكتور فى مدينه نصر وبعد ما ركنت بشد فرامل اليد (عادى جدا) لقيتها هوا ايوا فعلا هواء بمعنى الكلمه يعنى خفيفه جدا و ملهاش مقاومه فى ايدى خالص فجبتها للأخر و زقيت العربيه لقيتها بتزق عادى خالص اكنها مش متعشقه بفرامل اليد رحت معشق بالغيار و قلت امرى لله وحست ان معايا عربيه موديل 80 مش 2008 :( و نسيت اقول ان فى سخونه فى الكنسول معرفش هل دا عادى ولا مش عادى فرحت لميكانيكى عندنا فى عابدين و يص تحت العربيه و قاللى السلك مشدود و كله راكب من تحت تمام واضح ان المشكله عندك فى الكونسول لازم تروح بيها التوكيل علشان احتمال يفكو الكراسى و الكونسول عشان يشوفو المشكله :eek::eek:

معلش انا طولت عليكوا لكن يمكن افيد حد تانى عنده مشاكل زى ديه المهم انما عندى سؤالين هما :

1- هل ما حدث غى فرامل اليد له علاقه بريحه الشياط اللى بشمها ؟
2- هل المشكله خطيره لدرجه تستوجب اروح للتعذيب تانى اقصد للتوكيل تانى :) ولا استنى صيانه الألف مع العلم انى عامل 400 كم زي ما قلتلكو يعنى فاضلى 600 كم يعنى على مشييى فى رينج 20 يوم .
وبجد اسف جدا على الإطاله يا احلى منتدى فى الدنيا :)

بالنسبة لمشكلة الشياط فهى مشكلة-او بالأصح لا مشكلة- تميز كل اللانوس الجديد، كل اللانوس الجديد من بو ما عملوه بيخرج من المصنع وفيه كيس مشمع لازق على الشكمان لسبب لا أدرية، إما مثلا لان وحدة تجميع الصالون بجوار وحده تجارب السيارات وبيرمو المشمع على الأرض فبيلزق فى الشكمانات ، وإما لأن مثلا فيه حاجة راكبة جنب الشكمان بتكون ملفوفة بمشمع، لكن الظاهرة دى عدا بيها الكثير جدا من ملاك اللانوس الجديدية وستنتهى باحتراق او تبخر بقايا الكيس النايلون الموجود على شكمان عربيتك ومتقلقش منها طالما هى ريحة كيس محروق

اما بالنسب للفرامل فغالبا اليد فكت من السلك ودى لابد لها من فك الكونسول وفعل من الأفضل زيارة التوكيل

1- انت اول ما قلت شياط انا كنت حقول حاجة فى الشكمان... دا بيحصل فى مصر لانها بلد نضيفة... ممكن الريحة تكون من بواقى المشمع اللى لسة لازقة على الشكمان

2- موضوع الفرامل لازم تراجع علية كويس و انا شاكك ان الميكانيكى راجع كويس... اصل او السلك مشدود كويس لازم فرامل اليد توقف العربية... هل المشكلة دى حصلت بعد ما خرجت من التوكيل على طول؟ يعنى اول شدة فرامل يد بعد ما استلمت العربية حصل فيها كدة؟

MMamdouh

الف شكر لييك يا باشا على ردك السرييع ولكن هل اروح التوكييل دلوقتى ولا استنى لما اكمل الألف و اقولهم عليها بالمره يعنى هل هى خطيره ام يمكن انتظر عليها شويه :):)

يا باشا نورت المشاركه و انت فعلا استاذى لانى كل يوم بتعلم منك و بالنسبه لفرامل اليد فلم تحدث بعد خروجى من التوكيل على طول أنى عملت بيها بعد كده حوالى 150 كم وكانت فرامل اليد شغاله تمام و 100% لغايه امبارح و لا اعرف السبب فهل الموضوع يستدعى ذهابى للتوكييل فورا ام انتظر صيانه الألف ولا فى اقتراح تانى عند سيادتك و ربنا يبارك فيك .:)

انا افضل تروح دلوقتى و تطمن

MMamdouh

يعنى الموضوع ممكن يكون خطيير ولا ايه يا استاذ ممدوح لآنى صعب اخذ اجازه اليومين دول فياريت تطمنى

لا مش خطير بس فدان وقاية خير من قنطار علاج... روح فى الweekend

MMamdouh

الف شكر يا استاذ ممدوح بس هل التوكييل فاتح السبت ولا قافل :)

الحمد لله اتصلت بيهم وهما فاتحيين يوم السبت و ان شاء الله هروح السبت القادم و انا شاكر لكم جميعا اخوانى الأعزاء

السلام عليكم

اولا الف مبروك وربنا يباركلك فيها ويديك خيرها ويكفيك شرها

اخوك لسة بردة جايب لانوس من حدود اسبوع وبشم بردة نفس ريحة الشياط ومش عارف لية

بس انا اعتقد ان مثلا بسبب ان الفرامل و الدبرياج لسة جديدة فلسة بطبع ,,, والله اعلم انا مش خبير فى امور ميكانيكا السيارات ,,
وياريت لو حد يفيدنى ويفيدك عشان اخوك من النوع الموسوس شوية ,,

وربنا يكرمك ويكرم الجميع ان شاء الله

السلام عليكم ورحمة الله وبركاتة ,,

اخوك , شادى