النهارده صحيت بدرى قولت لازم انزل اعمل التكييف علشان الجو اليومين دووول ناار بصراحه .... كلمت محمد الريحانى سمسم
باشا ربنا يكرمه كان قالى عليه ورحتله قبل كده بص على العربيه المهم رحلته على الساعه 1 كده وبدأ شغل فى العربيه اللى عمله كالأتى :-
1- فك السربنتينه وغسلها كويس
2 - فك الكويل وكان نضيف علشان كنت منظفه قبل كده بس برضه نضفه كويس جداا
3 - فك الدراير وقالى محتاج يتغير :)
4- ونظف الخراطيم وظبط الدنيا

المهم بقى رحت اجبله الدراير ...رحت لتوشكى ملقتش عنده قالى فى المخزن بس روح انت وانا هجبهولك لحد عندك رحت لمحمد قالى لقيته بكام ؟؟؟ ب 110 يا عم الحج قالى لأ كتيير روح عند واحد اسمه سكارو بتاع تكييف برضه وعنده قطع غيار للتكيف...... وصلت للراجل بعد عذاب اى واحد اسأله يدينى اهتمام على اساس انى جايله اشترى منه حاجه. .... اول ما اوله فيين سكارو يلف وشه الناحيه التانيه ويقولى معرفش كتييييير جداا عملوا كده معايا واللى ميردش عليا اصلا مش عارف الناس بقت وحشه ليه كده ... ما علينا علشان مخرجش عن الموضوع وصلت لسكارو دراير هوندا 92 لو سمحت ؟؟ايه ؟!!!!!!!!! فلتر تكييف يا عم الحج بتاع هوندا 92 ؟؟؟ اه طيب ....... طبعا كنت واخد معايا التانى علشان اجيب زيه .. جابهولى وطلع هوه بس منظره مش مريحنى ..... بكام يا برنس ؟؟ ب 60 جندى قولت زى الفل

ورجعت لمحمد وهوه شخص لذيذ بصراحه وكان بيشتغل بمزاج وناس تيجى يعملها حاجه وانا مكنش عندى اعتراض علشان مش ورايا حاجه ... المهم شويه ركبه وجه يجرب ابعاد المسامير مختلفه ... قولتله ما انا قولتلك اجيب التانى واخلص وطبعا اتسحلت مشى تااانى ورحت رجعته وقمت مكلم مجدى الدسوقى بكام يا حج مجدى ؟؟ ب 135 جندى الف شكر يا باشا رحت جبته من توشكى ورجعت لمحمد وكنت خلاص لفيت الحرفيين كلها علشان حته بتاع قد كده

5 - ركب الدنيا دى كلها تانى وكبس هوا لمده نص ساعه تقريبا وكشف على اى تسريب مفيش الحمد لله
6 - شحن فريون r134 مع ان الدراير r12 ..... سألته كده غلط ولا ايه قالى عادى وواخد الدنيا بهزار بجد والله انا حبيته

دورت العربيه وشغل التكييف طبعا الجو باليل والتكييف اكيد هيسقع بس احسن من الاول بكتيير طبعا
والتكييف تحت التجربه لو فيه حاجه قالى تعالى تانى بس فيه صوت غريب ظهر من الكباس قولتله قالى انا مجتش جنب الكباس انا ظبطلك زيته بس ....انا قولت كفايه كده علشان جبت اخرى وممكن الصوت ده يروح مع المشى ولا فيه حاجه هبقى اروحله .... بس هوه صوت زى تكتكه كده مش عارف ظهر من ايه ده بقى :(

خد شحن ومصنعيه 270 جنيه
الدراير 110 جنيه والنوع اللى موجود تايوانى مش فاكر اسمه بصراحه العلبه فى العربيه هبقى اقولكم على اسمه بعدين

والتكييف تحت التجربه ويارب يظبط الصبح ان شاء الله