الموضوع: فيلم عسل أسود وفيها حاجة حلوة !!!

المشاركة الأصلية كتبت بواسطة axel

اولا معلش بس اللي انا فاكره ان اسمه سيد مصري مش عربي هههههه ما علينا

طبعاالفيلم ناقش سلبيات لكن برده زي ما في سلبيات فيه ايجابيات

و ديه اللي عشانها رجع تاني

و امثلة ع كده في الاخر لقي ان بلده هي اللي شالته في حين ان البلد التانية اللي كان عايز يرجعلها باي طريقة مقبلتوش و شوف عملوا فيه ايه ؟؟
زي ما يوسف داوود قاله ايه قاعد ليه ما ترجع حد ماسكك

شوف الولد الصغير قاله ايه ع موضوع القمر و الهوا ساعتها خلاه يعيد تفكيره عن اللي بينبهروا بالمظاهر بس لكن في الحقيقة غير كده

حاجة تانية لما اترمي في الشارع و اتبهدل برده ممتش من الجوع و ديه من ضمن السمات اللي بنتسم بيها بالرغم طبعا من ان الناس بقت اخلاقها اسوء لكن برده فيه الكويس اللي بيساعد
زي ما بيقولوا مفيش حد في مصر بينام من غير عشا و ديه حقيقة
يعني مثلا في ناس كتيير مش لاقيين ياكلوا ادخل اي محل قوله عايز اكل مكلتش و معييش فلوس هتلاقيه طلعلك اكل و عيش و مش محلات صغيرة لأ و كبييرة كمان برة اول حاجة هيطلبله الشرطة لو ممشيش

مثل تاني لو انت في ميكروباص و فجأة لقيت مفيش معاك فلوس طب تعمل ايه برة هينزلك من الباص عندهم لكن هنا الميكروباص لو عنده دم هيقولك خلاص مش مشكلة او هتلاقي الناس دفعتلك هات حد برة يعمل كده ؟

مثل تالت شوف لو حصل و واحد وقع و لا عمل حادثة هتلاقي كل الناس في الشارع جريت تساعده و اللي ينظم المرور و الطريق عشان الدنيا متقفش و اللي يجيب مية و اللي يسنده و اللي يعمله اسعافات اولية لو محتاج و اللي ممكن يوصله او يتصل باهله او حد معرفة برة مفيش الكلام ده
برة يقولك مليش دعوة و يوم ما تلاقي واحد اتحرك هيطلب النجدة و خلاص

مثل رابع و خامس و 1000 كمان
كله بيساعد بعضه
ديه حاجة المصريين بيتسموا بيها عن باقي الشعوب المساعدة و الشهامة اللي ساعات بتودي في داهية ههههه

حاجة تانية برده شاف ان الناس هنا عندهم حنيين و بيراعوا بعض لكن برة نظام انجليزي حتي الام بتعامل ابنها كأنه غريب بيزنس اذ بيزنس هات خد
شوف هنا الام او الاب بيدوا عيدية شوف الاخوات مع بعضهم
و في رمضان حكاية الطبق اللي طالع نازل ديه برده نقطة
موائد الرحمن اللي بتبقي مالية مصر كلها

و برده زي ما جابلك الشخصية المرتشية جابلك اللي بيشتغل بما يرضي الله و بدون مليم واحد يعني بتعتمد ع الشخص نفسه

و غيره و غيره

فيه ايجابيات كتيير عندنا بالرغم السلبيات اللي حوالينا لكن بنتسم بحاجات مش موجودة في العالم
و اي حد برة عنده عقدة الخواجة بالنسباله و هي مصر اي حد برة بيبقي نفسه ينزل مصر و يقعد فيها حتي لو دقايق

مش ذنب البلد هنا انه هو حط صورة في خياله غير الواقع لكن لازم يتأقلم و ده اللي حصل لما بدأ بتأقلم مع الحياة و العيشة هنا لاقي نفسه عايش عادي و مفيش مشاكل

زي مثلا واحد حاطط في دماغه انه هيروح الصين الناس شغالة البلد بتصدر للعالم كله مفيش فقر و العربيات بانواعها الخ الخ
هيروح يتصدم هناك هيلاقي الوسيلة العجل و ناس كتيير مش لاقيين ياكلوا و البيوت بسيطة جدااا زي اليابان مثلا في البيوت نظام استديوهات

تصدقوا الحكومة هنا المفروض تعمل للشعب عمارات نظام استديوهات زي برة كلها اوضة و صالة و عيش مش لازم يعني اتنين لسه متجوزين و يجيب 3 اوض و صالة و مش عارف ايه اهو اي حيطان تلمهم و خلاص و في نفس الوقت هنوفر سكن كتيير لكل الشباب و اللي معهوش يشتري و يكون فيه زي رقابة ع اسعارها عشان منلقيهاش زي باقي الشقق اللي وصلت للــ150-200 الف
ليه عندنا عقدة الخواجة ؟؟
السلبيات اللي عندنا فيه منها برة و اكتر لكن برة زي ما تقول اضفاء الرونق الاجنبي بالنسبة لينا فمش بنشوفها بالطريقة اللي احنا بنشوفها بيها
صدقني مفيش احسن من هنا في كل حاجة
ع الاقل عندنا دين و اخلاق و تقاليد تحكمنا ع عكس برة اللي مقضينها
هديك مثل عندنا في حقوق دكتور اسمه\ محمد علي محجوب كان وزير الاوقاف سابقا دكتور زي العسل و محبوب من الناس كلها من التمنينات لحد دلوقتي متلقيش ابدا دفعة دخلت حقوق عين شمس الا و شكرت فيه و نفسهم لو يدرسلهم كل المواد و يديهم الاربع سنين حتي صيته واصل لباقي الجامعات و الكليات و الناس العادية كمان و بيتعامل مع الطلبة كأنهم اصدقائه المهم
قالنا ع مثل حصل في فرنسا
اب و بنته عايشيين في استديو ( شقة صغيرة يعني ) المهم الاب مش موجود البنت جابت البوي صاحبها و قعدوا
جيه الاب جايب صاحبته و دخل الشقة عادي
البنت بهدلت ابوها و راحت رفعت عليه قضية في المحاكم ان ازاي الاب ينتهك حريتها و يدخل عليها و هي مع صاحبها و خد زي ما انت عايز كلام و المحمكمة حكمت ضد الاب غرامة و حبس تقريبا بس مش فاكر بالظبط اذا كان غرامة بس و لا غرامة و حبس


و غير الايجابيات اللي رجعته اللي بيحب بلده بجد ميقولش انا هسيبها حتي لو حصل فيه ايه و قدامه فرصة سفر مش هيسافر هيقولك اقعد في بلدي و لو بعد عنها شوية بيبقي عامل زي السمك اللي خرج من البحر و زي ما امادو ابراهيم قال و مفيش حاجة اختم بيها غير ديه

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهيّ مالكه الأرض شرق وغرب

وباحبها وهيّ مرمية جريحة حرب

باحبها بعنف وبرقة وعلى استحياء

وأكرهها وألعن أبوها بعشق زي الداء

وأسيبها وأطفش في درب وتبقى هي في درب

وتلتفت تلاقيني جنبها في الكرب

والنبض ينفض عروقي بألف نغمة وضرب

اسمح لى اؤيد حضرتك الراْى وبشدة .
واحترم اراء حضرتك جدا .
تقبل احترامى الشديد لشخص حضرتك الكريم .