الموضوع: عملت صيانه الألف للرائعه بروتون واجا

[COLOR="Blue"

السلام عليكم ورحمه الله وبركاته

]
بدايه أحب أشكر كل أعضاء بروتون أجدع شباب فى مصر
كنت من فترة عملت موضوع عن إختيار عربيه وكنت حجزت الساجا أوتو وللأسف ما إستلمتهاش وحجزت واجا أوتو بدالها والحقيقه العربيه دى ماشاء الله فوق الممتازة محترمه أوى وتابلوة رائع وشياكه وجمال المهم ماعلينا مش هطول عليكم اكيد الكل عارف العربيه مميزات وعيوب
عملت بنصيحه أحد الأعضاء اللى كان بيقول خلى فى العربيه ورقه وقلم وسجل كل ملحوظه تشوفها فى العربيه علشان لما تروح التوكيل تفتكر كل حاجه وتقولهم عليها
شديت الرحال الصبح وطلعت على توكيل عز العرب فى أبو رواش
كنت بشتكى من أكتر من حاجه فى العربيه زى
1. ريموت المفتاح مش بيقفل السنتر ولا بيفتحه
2. فى مشاكل فى السنتر اليدوى مكنش بيفتح وبيقفل من عندى
3. الشنطه مكانتش بتقفل من أول مرة لازم أرزعها
4. إستهلاك غريب للبنزين التفويله الأولى مكملتش معايا 280 كيلو
5. زرار الزجاج الخلفى مكانش شغال كويس
6. التكيف لما بشغله كان بيخنق العربيه أوى
7. درج التابلوه مكنش بيقفل مستريح
...... وحاجات صغيرة كده تانيه وكلها مكانتش مؤثرة تأثير السنتر بصراحه
المهم وصلت التوكيل وقابلت المهندس أحمد إتخض طبعا من لسته كان فيها 12 نقطه عاوز أعملهم وقالى سيب العربيه تستلمها الساعه 5 والكلام ده كان 10 ص وشويه
طبعا انا إتجننت لأنى كنت راسم أطلع أليكس بالمرة وفضلت قاعد متزنب لحد الساعه خمسه
الحقيقه فى ملاحظه مهمه جدا فى توكيل أبو رواش
عدد مشرفى الصيانه أكبر بكتير من عدد الفنيين وعليه لقيت أن العربيه بتقعد وقت كبير أوى ومحدش شغال فيها لأنهم شغالين فى عربيه تانيه وهكذا مع باقى العربيات وهو ده اللى خلى التأخير بشكل مبالغ فيه
المهم على الساعه 5 ونص إستلمت العربيه وطلع معايا المهندس مصطفى جرب العربيه وحقيقه الراجل ده محترم جدا جدا ونصحنى أكتر من نصيحه وجرب كل حاجه كنت بشتكى منها وراجع على العربيه كلها ولف بيها شويه وقالى تمام كله كده إتظبط
بصراحه تعبوا جدا فى العربيه بس لما خلصوا حسيت ان العربيه بقيت حاجه تانيه خفيفه جدا سحب عال تكيف تمام ظبط من الأخر
والصيانه إتكلفت 195 جم بالظبط
وفعلا الحمد لله على أنه وفقنى للعربيه الرائعه دى وربنا يباركلى فيها وشكرا لكل الناس اللى عرفتنى ببروتون [/COLOR]