عشان كده الناس مبتحبش تبيع للتجار
السلام عليكم و رحمة الله
أنا كنت عامل اعلان لعربية سوزوكى سويفت بتاعة واحد صاحبى و هى أصلا كانت بتاعتى و العربية نضيفة جدا .. هى جابت له 29 ألف بس هو كان عاوز 30 فلما مجابتش قال ينزل السوق .. المهم هو نزل الجمعة اللى فاتت السوق عشان يبيعها فى السوق .. و هو عند مسجد السلام واحد وقفه .. تبيع يا شيخ (صاحبى ملتحى) .. أبيع .. بكام؟ .. أخرى 30 ألف:beee:.
الراجل قعد يقلب فى العربية .. قاله أخبار التكييف ايه؟ .. قاله بصراحه نص نص .. يعنى شغال بس مش تلاجه .. طبعا طلع له القطط الفطسانه .. حاجات عاديه جدا .. البويه مطقطقة من هنا .. ده التابلوة مجرب .. التكييف عاوز يتصلح .. صاحبى قلق عشان مالوش خبرة فى شغل التجار .. قاله يعنى كام؟ التاجر قاله 26 ألف :blink4: .. طبعا هو عشان زهق و نزل السوق مرة قبل كده .. قاله ماشى .. قام جاى الراجل خده بعيد عن الطريق و اتصل بالتليفون جه اتنين صاحبى بيقول لى شكلهم عمال محارة (مع الاحترام لمهنة عامل المحارة طبعا) واحد راكب عربية بى ام دبليو 2004 و التانى راكب هوندا سيفيك .. المهم الراجل بدأ يكتب العقد .. صاحبى قال يتصل بواحد صاحبنا متابع الأسعار و كده .. قاله أنا ببيع ب 26 :no4:.. صاحبنا ده طلع فيه .. انت أهبل .. أنا قلت لك مش أقل من 28 .. روح السوق و هتجيب لك أكتر .. و بهدله فى التليفون .. المهم صاحبى رجع للتاجر قال له معلش فى واحد صاحبى هياخد العربية ب 28 .. و انا اسف مش هقدر أبيع لك و كده .. طبعا التاجر قاله ازاى ده احنا كتبنا العقد :prove: .. و العقد مكتوب عليه بسم الله الرحمن الرحيم و على بركة الله :biggrin24: .. صاحبى قاله أنا ممضيتش يبقى لسه مبعتلكش .. قاله صاحبك مشافش العربية و متجبش 28 .. قاله لأ شافها و هياخدها .. و ركب ووهو ماشى .. التاجر قاله خلاص يا شيخ ب 28:surrender:
المهم اتفقوا على 28 .. و كتبوا عقد ابتدائى بس لواحد تانى .. قام و هو بيدى له الفلوس .. قاله أنا هخصم 250 جنية سمسرة الراجل ده (الأول) .. صاحبى بيقول لى أنا كنت قرفت منهم .. قلت له ماشى .. المهم خد فلوسه ناقصه ألف جنية على ما يجيب المخالفات و كده.
صاحبى راح عشان ياخد حاجتة من العربية .. كان فاضل فيها ترمس شاى و شاحن موبايل .. لقى التاجر بيزق ايده .. قاله الترمس ده يلزمنى :wtf: .. قال له يا عم ده بتاع البيت و باخده معايا و احنا مسافرين و صاحبى أصر انه ميسيبوش هو و لا الشاحن .. المهم كان فى كيس فى بواقى شيبسى و كيك كان واقع فى أرضية العربية و صاحبى كان لمه فى الكيس .. الراجل قال له .. طيب هاخد الأكل ده بأه .. قاله خده .. بالهنا و الشفا :biggrin24:.
المهم صاحبى جاب له المخالفات .. ووهو بيعمل له التوكيل .. الراجل بيقول له أنا طمعان انك تنزل لى 200 جنية .. قاله له ليه؟ قال له هو كده .. عشان يطلع لى حسنه و بتاع .. فا صاحبى قال له لأ .. احنا خلاص اتفقنا و كتبنا العقد على السعر ده .. و خد منه الألف جنية و مشى.
أنا كنت عامل موضوع قبل كده ليه الناس مبتحبش تبيع للتجار .. بصراحه الناس اللى كده تكره الواحد انه يبيع لتاجر بالنوعية دى .. و أنا فعلا شفت ناس كتير أول ما تاجر يكلمه يقول لأ مببيعش .. من القرف و سوء المعامله اللى بيعاملوا الناس بيها.