خبطة فى القايم اليمين للعربية

**khaled_Saga** · 12-07-2011 10:16 PM

السلام عليكم اخوانى الكرام

النهاردة نزلت من الشغل (شغلى فى منطقة سافلة مستوى مش اد كده وعيال متشردة) وانا مش بطيق اغطى العربية فى الطالعة والنازلة .. ففوجئت بخبطة فى القايم اليمين من العربية فوق الباب وواضح ان الخبطة من قالب طوب واقع من فوق بيت او اترمى من بعيد على العربية .. الخبطة مش جامدة لكن واضحة طبعا عوجت فى القايم لجوة وخربشت فى البوية فشكلها باين وملحوظ وخانقنى اوى فحبيت أسأل هل الخبطات فى القوايم بتترد وتتسمكر وتندهن عادى ولا ايه نظامها؟؟ وهل لو بينفع ياترى فى التوكيل بيعملوا شغل سمكرة ودهان ولا اعملها برة؟؟ علما بانى رايح صيانة ال 5000كم يوم السبت الجاى ان شاء الله فياترى اقولهم عليها ولا ايه؟

ارجو الافادة وتحياتى لكم

**Hacker5** · 13-07-2011 12:48 AM

اعملها فى الحرفيين عشان تتعمل باحترافية و ماتبانش دة لو عايز شغل نضيف يعنى

**katoba** · 13-07-2011 10:47 AM

خضيتنا ياعم خالد .. انا عارف انها تزعل بس بسيطة الحمدلله انها جت على قد كدة

**islam_6110** · 13-07-2011 11:20 AM

قدر الله و ما شاء فعل معلش خليها تفدى العين

**sanhory** · 13-07-2011 11:26 AM

حاجة زي كدا السمكرية بيعملو حاجة اسمها سحب

و الطريقة دي بيلجئولها عشان مفيش مجال انه يفك الصاج و يدق عليه من ورا

فا بيلحم حتت حديده في المكان المتطبق و بيشدها لبره

و انشاء الله خير

**aftr** · 14-07-2011 05:49 AM

اعملها نظام شفط موجوده فى الحرفين وبعد كده شويه بولش على كان بوند وان شاء الله ترجع زى الاول كان عندى نفس القصه بس كانت فى منتصف العربيه تحت المرايا متقلقش والحمد لله اللى جت على قد كده

**esam722** · 14-07-2011 11:02 AM

ابعد عن التوكيل علشان اسعارهم مبالغ فيها بالاضافة ان شغلهم عادى واقل من العادى اما الحرفيين ان كان ملكش حد معرفه هناك انصحك متروحش علشان هتبقى صيده

اى تصليح فى العربيات متروحش لاى حد وخلاص لازم يكون محل ثقة ومتاكد من انه صنايعى كويس

ان شاء الله تبقى بسيطة

**khaled_Saga** · 14-07-2011 09:43 PM

شكرا يا جماعة ليكم على المشاركة والاهتمام..

بالنسبة للحرفين اعتقد الموضوع هيبقى صعب انا مروحتش هناك قبل كده ومعرفش حد هناك اساسا..

انا رايح صيانة ال 5000كم يوم السبت هقولهم على الخبطة واشوف ردهم ايه ولكن فيه واحد صاحبى اثار ليا نقطة النهاردة انى ممكن اعملها على التأمين لأنى شارى تقسيط وعامل تأمين شامل فممكن التوكيل يكتب تقرير بالخبطة وتتعمل على حساب التأمين فهل الكلام ده صحيح وان كان صحيح الاجراءات ساعتها بتمشى ازاى؟؟

تحياتى

**SAMER_ENGINES** · 14-07-2011 10:20 PM

بسيطة انشاء الله بس ابعد عن شغل التوكيلات فى السمكرة و الدوكو لانى اللى اعرفه انه مش بيكون اد كدة و طالما انه حاجة متخجش العربية من الضمان و فى السمكرة و الدوكو يبقى برة التوكيل لشغل انضف و نفقات اقل.

**aftr** · 18-07-2011 06:48 AM

الافضل على التامين انته بتروح شركه التامين التابع ليك وبيصور الخبطه وبعد كده يبعتوك مركز متخصص وانته بتحاسب وبعد كده التامين بيصرف ليك شيك بالمبلغ بس الافضل حاول تدور انته على مركز يكون تمام فى الدوكو والدهان