استخدام اخر لكاسيت الفيرنا

**ezzeldin1234** · 13-07-2011 12:53 PM

الاخوه الاعضاء ..
اكتشفت حجاه جديده لانج فى الفيرنا بتاعتى ... اكتشفت ان غبور حاطط فيها كاسيت مش عشان نسمعه ونشغل عليه سيديهات ونسمع الراديو من خلاله زيه زى باقى العربيات لكن كاسييت الفيرنا ليه استخدام منفرد من بين العربيات وهقولكم استخدامه ايه
كاسيت الفيرنا بيستخدم عشان يعملك صوت وانت ماشى عشان يدارى على الاصوات اللى بتطلع من العربيه عشان متضايقكش وانت ماشى ... شفتوا غبور بيحبنا اد ايه حاططلنا كاسيت فى العربيه عشان اصوات التزييء والتخطبيط وصوت الموتور العالى دايما ناهيك عن صوت الونه بتاع الكومبريسور بتاع التكييف لما تشغله وكان غبور بيعاقبك عشان شغلت التكييف بالثوت ده كل الاصوات دى غبور خاف على وادنا الجميله من الاذى من الاصوات دى فركبلنا فيها كاسيت مش عشان نسمع عليه اغانى لا سامح الله ولا قرأن ولا راديو وده فسرلى كمان ليه صوت السماعات مش جيد فى الفيرنا ... صوت سماعات الفيرنا مش جيد لانها مش عشان نسمع منها صوت نقى يا حضرات احنا اللى فاهيمن غلط .. السماعات دى عشان تدارى على الاصوات اللى نتيجه التقفيل المصرى الزفت .. يا سلااااااااااااااااااام حبيبى يا غبور ربنا يخليك لينا ... والله بحبك ... بحبكوا كلكوا يا كل موظفى غبووووور

وبالمناسبه دى احب اعرفكم على اخر الاصوات اللى شرفت فى عربيتى الفيرنا الفول اوبشن موديل 2011 اللى لسه شاريها من خمس شهور .
وهو صوت رجه خفيفه جاى من المكان اللى ورا الساعه تحت التابلوه وكأن فى حاجه سايبه فيه .. عارف لما تحط قلم على التالبلوه والعربيه بترعش مش هتسمع صوت القلم بيتغربل على التابلوه وبيعمل خبططات سريعه خفيفه كده هو ده نفس الصوت عندى اللى بسمعه فى طلعة العرببيه .. شيلت كل محتويات الدرج اللى على يمينى والتابلوه وكل حاجه وبرده الصوت موجود .. زعلت جدا لانى بس كنت عايز اتعرف على الصوت الجديد ده عشان اتشرف بمعرفته مش اكتر ..وكمان عشان اضمه لاخواته التانين اللى موجودين فى العربيه ..يا ترى بئى فى حد اتشرف بمعرفة الصوت ده عنده قبل كده وعرفه يا ريت حد يقولى

وفى النهايه احب اعبر عن خالص امتنانى لاختيارى لسيارة العصر وكل عصر لان تكون رفيقة كفاحى وربنا يخللنا غبور يا رب ..ومش هقدر اقول اكتر من كده عشان خايف اتلفظ بلفظ خارج وازعل ادارة المنتدى منى
والسلام عليكم ورحمة الله وبركاته

**HOSSAM99** · 13-07-2011 04:51 PM

و عليكم السلام و رحمة الله
أستاذ عز الدين
لي سؤال : هو حضرتك ما جربتش العربيه دي أو سألت عنها قبل ما تشتريها
و أنا حاسس إن العربيه دي مش مفرحه حضرتك أو مش راضيه طموحك

**ezzeldin1234** · 13-07-2011 04:58 PM

ازيك يا استاذ حسام ربنا يباركلكيا رب
بالفعل انا كنت رايح اشترى ال rb مش الفيرنا بس كنت عامل حسابى على انها ب 95900 اول ما نزلت ( وبالمناسبه انا اول واحد فى مصر بجد مش مبالغه جربت ال rb وكنت متابع اخبارها من قبل ما تنزل مصر لحد ما نزلت ) وحجزت واحده بمقدم 1000 ج لحد ما اجهز الفلوس جيت اجهز الفلوس قامت الثوره وعطلتنى اكتر ورحت ادفعه قالولى غليت 3600 ج وبقت ب 99500 اتضايقت ساعتها وقلت مش عايزها ورحت مختار الفيرنا وقررت اشتريها فى دقيقه . بس لحد دلوقتى مقتنع بال rb اكتر منها بكتير

**virus2007** · 13-07-2011 05:54 PM

روق بس كدة ...

انا الفيرنا اعدت معايا سنتين وبصراحة محسيتش بكل الكلام دا ... انا كنت مغير الكاسيت ببيونير وجايب سماعات والدنيا كانت حلوة والعربية كانت مريحيانى جدا والى خلانى اغيرها انى محتاج اتوماتك

نصيحة منى ليك : حاول متركزش فى عيوب العربية وركز على مميزاتها اكتر وحاول لو فى حاجة مش عجباك غيرها مدام تنفع تتغير ... معلش حتصرف شوية بس عشان انتا تبقى مبسوط خاصة انك جايب العربية زيرو ولو بعتها حتخسر فيها 10 الاف جنية وقتى وانتا واقف

العربية على سعرها وبمقارنتها بالعربيات التانية تعتبر عربية كويسة فى فئتها ويمكن الافضل

الى اعرفوا ان فى ناس بيبقى حظهم وحش بيقعوا فى عربيات معيوبة بالزات فى الفيرنا فبيسبوا ويلعنوا فيها .

فمدام مفيش عيب جوهرى فى العربية حاول تعالجوا انتا ... بالنسبة للهزة والرجة الى قلت عليها ... بما انك فى الضمان اذن طلع عنيهم فى التوكيل وخليهم يشتغلوا ويشوفوا المشكلة فين لان دا حقك :)

تحياتى ليك واتمنى ترضى عن العربية وتبقى مبسوط معاها :):)

**HOSSAM99** · 13-07-2011 06:09 PM

أزيك يا أستاذ عز الدين
أكبر غلط إن الواحد يتصرف في وقت الغضب أو الزعل
الواحد وقتها بياخد قرارات غريبه
كان المفروض تتريث
طيب ليه حضرتك مخدتش النيو أكسنت بدل الrb

علي العموم ربنا يبارك لحضرتك فيها
و متركزش معاها علشان هي عربيه الغرض منها أنها تقضي المشاوير بموتور كويس و تكييف كويس

**Screenplays** · 13-07-2011 06:32 PM

فعلا شكوي حضرتك مكرره من كذا مالك للفيرنا بس ال 2009 و 2010 مفيهومش كم الاصوات دي عموما روح التوكيل و قولهم علي الكلام يمكن يحسوا علي دمهم و يظبطولك الدنيا

**MOUSTAFA_SAAD** · 13-07-2011 06:53 PM

المشاركة الأصلية كتبت بواسطة ezzeldin1234

ازيك يا استاذ حسام ربنا يباركلكيا رب
بالفعل انا كنت رايح اشترى ال rb مش الفيرنا بس كنت عامل حسابى على انها ب 95900 اول ما نزلت ( وبالمناسبه انا اول واحد فى مصر بجد مش مبالغه جربت ال rb وكنت متابع اخبارها من قبل ما تنزل مصر لحد ما نزلت ) وحجزت واحده بمقدم 1000 ج لحد ما اجهز الفلوس جيت اجهز الفلوس قامت الثوره وعطلتنى اكتر ورحت ادفعه قالولى غليت 3600 ج وبقت ب 99500 اتضايقت ساعتها وقلت مش عايزها ورحت مختار الفيرنا وقررت اشتريها فى دقيقه . بس لحد دلوقتى مقتنع بال rb اكتر منها بكتير

ليك حق تزعل بالشكل ده من الفيرنا
لان انت كنت مخطط لحاجه عاليه وجبت الفيرنا فطبعا اتصدمت

**mshmshm3** · 13-07-2011 09:35 PM

الاصوات دي طبيعية جدا في الفيرنا وعادي خالص في الاول بتبقي هاتتجنن عايز تعرف ده صوت ايه بس بعد كدة تقلق لو ما سمعتوش وماتركزش العربية بردو فيها ميزة ان قطع غيارها موجودة في السوبر ماركت

**newnewegypt** · 14-07-2011 10:44 AM

والله نفس المشكله معايا انا المزعلنى اكتر انى كنت هجيب ساجا وكانت ارخص بحوالى 8 الاف جنيه وكانت افضل بس انا الاستاهل انى سمعت كلام الناس التقلك قطع غيار مش عارف ارخص وسهوله البيع والكلام الفاضى دة ايه ايمه انك تبقى راكب عربيه بتزيق من كل حته وقرفان منها وتقول علشان اعرف ابيعها طب ماتشترى عربيه مريحاك ومتحتجش تبيعها علشان قرفها على العموم ربنا يسهل والواحد يخلص منها ويجيب المرجه الجايه حاجه احسن وبعيد عن غبور ابن التيت دة

**ezzeldin1234** · 14-07-2011 10:51 AM

المشاركة الأصلية كتبت بواسطة screenplays

فعلا شكوي حضرتك مكرره من كذا مالك للفيرنا بس ال 2009 و 2010 مفيهومش كم الاصوات دي عموما روح التوكيل و قولهم علي الكلام يمكن يحسوا علي دمهم و يظبطولك الدنيا

شكرا يا باشا على ردك بس احب اوضح عشان تبئى الامور كلها واضحه ومحدش يتظلم بصراحه غبور فى التوكيل غيرولى فتيس اول ما جبتها لان كان صوته عالى وواضح . فعلشان مظلمش التوكيل هما عملوا اللى عليهم الغلط منى انا انى مرمتلهمش العربيه فى وشهم ساعة موضوع الفتيس ده مكنتش لسه مكمله 700 كيلو كنت المفلوض ارفض تصليحها واطلب تغييرها بس الحمد لله