يوم فصيل فى توكيل ابورواش
السلام عليكم فى البداية
انا جيت اقول تجربتى فى توكيل ابو رواش
انا كيا خليجى وعملت صيانة الألف فى مركز اسمه وليد توفيق فى الزهراء وكانت صيانة موفقة جدا وموفرة جدا
والحمدلله جبت العشر تلاف على خير وقولت اعمل الصيانة ‘‘ انا مصنعى فى المنطقة الصناعية فى ابو رواش واما سمعت ان التوكيل بقى بيدخل خليجى عادى وسمعت ناس كتيرة بتشكر فيه قولت لما اجرب اتصلت بيهم يوم 20/6 ادونى ميعاد يوم 4/7 وسألت على تكلفة الصيانة من غير الزيت قالتلى هاتتكلف بالظبط 150 جنيه قولت عظيم وخدت رقم الحجز وقالتلى ميعاد حضرتك 9.30 قولت مدام دقيقة كده يبقى الناس دى شكلهم محترمين وهاخش فعلا فى ميعادى واكدت على الأنسة قالتلى اه حضرتك 9.30 بالظبط حضرتك هاتسلم العربية وهاتخش علطول الصيانة قولت يعنى الحوار هياخد سكة ساعة بالكتير عشان ماينفعش اسيب شغلى لوحده اكتر من ساعة .....
انا بقى لسه مخلص جيش من شهر ومواعيدى بقت سيف ودى هى الغلطة رحت 9.30 بالظبط قابلنى راجل شكله محترم قالى اتفضل وادانى الرقم تقريبا كان 19 قولتله هو مش المفروض انى 9.30 اخش علطول ومليش دعوة بالدور ابتسم اوى :Copy of m-s5: وقالى حضرتك ده الكلام الرسمى لكن الدخول غالبا باللى بيجى الأول رحت انا كمان مبتسم هاعمل ايه يعنى ورحت داخل فضلت واقف جمب العربية اكتر من ساعة ومفيش حد لسه جه استلمها والنظام ماشى معارف بقى واللى يجى يسلم على المهندس ويبوسه ويروح مدخل عربيته الأول والنظام ده ‘ فضلت مسيطر على اعصابى وجه المهندس سلطان قالى فى حاجة معينة بتشتكى منها قولتله لا هو التكييف بس بيبرد بس انا حاسس انه مش قوى فى التبريد فاشاف الفلتر وقالى نغيره قولتله انا مابشغلش التكييف الا نادرا اصلا ودى لسه صيانة العشرة قالى احنا هانضفه بس ستين فى الميه هايتغير قولتله متغيروش الا لما ترجعلى قالى لازم قولتله ايوه لانى مش عايز اغيره دلوقتى قالى طيب حضرتك اتفضل فى الإستراحة وهاتستلم ان شاء الله الساعة 1.30 قلتله نعم :8954[1]: وكانت الساعة وقتها 11 تقريباً قولتله طيب انا مصنعى قريب ولازم اروح واما تخلص او فى اى حاجة قالى هانتصل بحضرتك طبعاً :satelite: ورحت شغلى وعدت الساعة 2 ومحدش اتصل فاتصلت انا قالى اه ياباشا العربية خلصت قلتله بالنسبة للتكيف قالى لا سليم احنا نضفناه بس قولت تمام
ورايح مبسووط اوى ان العربية زى الفل وخلصت اول مادخلت لقيتها مغسولة ومتظبطة واخر فل قولتلها شكلهم ظبطوكى صح:hlopaet_prv: ودخلت عشان احاسب فوجئت بالراجل ابو عيون خضرا بيقولى 450 جنيه :dzey: قلتله نعم افتكرته غلط ولا حاجة فعاد الرقم تانى قلت بس يبقى هو مصمم وقلتله طب حضرتك ممكن اعرف التفاصيل قالى تغير فلتر ومصناعية وضريبة وخدمة قلتلوا انا مطلبتش ان الفلتر يتغير واما اتصلت المهندس سلطان قالى ماغيرنهوش قالى معرفش شوف حضرتك المهندس سلطان قلتله طب هو فين قالى شوفه كده وبعد اذنك عشان اللى بعدك دورت على سطان افندى قالى لا ياباشا ماتغيرش ودخلنا على الخزينة واكتشف انهم غيروه قولتله انا مش عايز اغيره قالى الحكاية والرواية وممكن تخش على المواسير وتسد الدنيا وعاملى افلام واما سألته ليه ماتصل وقالى وانا عارف انه هايرد يقول ايه وفعلا قالى اصل احنا اتصلنا بيك وتليفون حضرتك كان غير متاح بصتله اوى وقلتله اااه غير متاح شوف ازاى مع ان ياخى فى شبكة تقوية متركبة على بعد امتار مننا وفى الأخر قولت مش مهم بس عدم التقدير هو اللى ضايقنى انهم ماتصلوش ولا قالوا مع انى اكدت عليه اوى وجيت استلم العربية وبدوس على الريموت لقيت الإنذار مش شغال قلتله الإنذار مش شغال قالى ايه ده هى فيها انذار وكنت فصلت بقى من الحر وقتها :brn: قلتله لا والله معرفتكش انا بقى كده:44: اما انت الصبح قلتلى الإنذار ده مركبه فين قولتلك فى ادريان اللى فى الهرم قولتلى جامد اوى وصوته عالى قالى اه اسف نسيت طيب حضرتك متقلقش اكيد فى حاجة بسيطة فاصلة ودخلها الورشة تانى الفنيين قالولوا دا الفوم واحنا بنغسل واول ماتنشف هاتشتغل اتفضل حضرتك استريح فى الإستراحة عشر دقايق واطلع هتلاقينى حاططها بره قولت لا انا حران واقعد لحد نص ساعة عشان مطلعش اقف فى الحر تانى وطلعت بعد نص ساعة قولتلوا ايه ياباشمهندس قالى تمام وبيجرب هو ولا الهوى قلتلوا واضح فعلا انها تمام ولقانى بدأ وشى يقلب قالى حضرتك مفيش اى حاجة بسيطة متقلقش وفضل يفتح ويقفل كل اللى بقينا سامعينه تكة بس ودى بتيجى كمان بعد معاناه قالى باشا خمس دقايق بالظبط ودخل الورشة تانى ودخلت اقف اشرب سيجارة على باب الورشة جه مجموعة شباب متجمعين فى شاب واحد سيكيورتى بيقولى حضرتك ممنوع الوقفة هنا قلتلوا وكل اللى جوه دول ايه قالى دول مهندسين قلتلوا ياه مكنتش اعرف ان يونى فورم المهندسين بقى مختلف كده ‘‘ المهم نزلت الإستراحة تانى وبقت الساعة 3.30 وخلاص بقى افورت :I_angr1[1]: طلعت فين سى زفت مش لاقيه فضلت ادور لحد مالقيته قالى تمام وجينا جربنا عارفين شريط الكاسيت وهو بيسف ده الشرح المبسط للإنذار قالى اول ماهاتنشف هاترجع تانى قولتلوا فى ايه بقى انا بقالى ساعة سايب العربية دايره ومبقاش فى نقطة ميه وولا رجعت تانى زى ماكانت قالى طب خمس دقايق هاخش اجيب الفنى ودخل الريسيبشن ومظهرش دخلت اتكلمت مع موظفة الإستقبال وقولتلها على كل الموضوع قالتلى دقيقية واحد وبقت ربع ساعة لحد ماظهر سلطان افندى وبيبصلى كانه اول مره يشوفنى وبيسألنى ايه لسه ماشتغلتش
قلتله لا تصدق اشتغلت بس انا عاجبنى الجو هنا وقلت اقعد شوية :dontudear: قالى طيب اهدى حضرتك زعقت بقى وقولتله انا ماسك اعصابى من الصبح ودى قلة ذوق ومش طريقة تعامل فقالى طيب المهندس محمد هايشوف مشكلة حضرتك قالى اامر حكيت القصة من تانى قالى طيب حضرتك امشى بيها النهارده ولو مانشفنتش ورجعت تانى تعالى بكره قولتله هو انا طالع رحلة:7_9_6v[2]: اجلكوا بكره وبعده وبعده
انا مسلم العربية سليمة استلمها زى ماهى لقانى بقى هازعق وهافقد اعصابى قالى طيب اتفضل عند المهندس هشام مدير الصيانة دخلت للمهندس هشام وقلتله على كل حاجة من الاول للأخر وقلتله دى اول تجربة وهاتبقى الأخيرة بعد الأداء الزبالة وعدم التقدير اللى انا شفته النهارده نده للفنى وقالوا ركبله سارينه من عندنا وانا هابقى اتصرف وركب السارينه طبعا صوتها اوطى اضعاف اضعاف عن اللى كنت مركبها ومشيت الحمدلله الساعة 5 بعد مالتوكيل كان فضى خالص .
انا عارف من غير ماحد يقول انى طولت اوى بس قولت انقل التجربة تفصيلياً عشان الكل يستفيد.
:bye2: