اللينيا و البرقان بالتفصيل ... :)
بسم الله
انا هانقل تجربتى مع مركز البرقان بكل حيادية و لكم الحكم فى جدوى هذا المركز !
يوم الثلاثاء 12-7-2011 بدأت التحرك من مدينة 6 اكتوبر الساعة 7 صباحا و وصلت المركز 8 و ربع تقريبا و طبعا اتلطعت فيه لحد ما المركز فتح الساعة 9 و المهندس استلم منى العربية و حصل الاتى
بلغت المهندس انى جاى اعمل صيانة ال 30 و عايزه يكشفلى على العربية عشان مشاكل فى الدبرياج و الفتيس
و على حظى لما المهندس ساق العربية عشان يجربها العربية كانت زى الفل و مكانش فيه اى مشاكل باينة ( كالعادة )
و طبعا قالى العربية مفيهاش حاجة .. قلتله انا بقالى سنتين و من ساعت ما اشتريت العربية بشتكى من الفتيس الفتره اللى فاتت زاد عليها الدبرياج و كل مرة يتقال ليا مفيهاش حاجة ! و لما ارجع المنصورة اسمع خبط و رزع و زعيق اكنى بحارب بالعربية ! ما علينا
المهندس قعد يجرب فى العربية و كان ناقص يخمس بيها جوة المركز و العربية حلفت ماهيا مبينه اى حاجة قلت يلا جايز المهندس مبروك ولا حاجة ..
دخلت العربية بعدها عشان الصيانة و غيرت الاتى
بوجيهات ( مش عارف هيا طالعة لونها بنى قولولى انتو بقى هيا كان ممكن تقعد اكتر من كده ولا لا لحسن مش عارف )
زيت محرك ( حطلى شيل الترا 5w-40 ) و عايز رأيكو فيه عشان مكانش عندهم غيره !
زيت فرامل ( على حسب كلامه المفروض بيتغير كل سنتين )
زيت باور ( معرفش غيره ليه بس يلا خير )
فلتر زيت و هوا و كان هايغير فلتر تكييف بس الحمد لله طلع معندهمش فا نضفه و ركبه تانى :ma:
غسل المحرك بالفوم غسيل اى كلام و كان بيغسل بالهواء و شوية مية ! و لقيته فضل قارص على الموتور 5 دقايق و انا عمال اقوله بطل بتعمل ايه يقولى ببخر المية ! .. ما علينا برده من ده
الراجل خلص الصيانة قلتله انا عندى فانوس الشبورة اليمين سايب و بيتحرك فى مكانه الراجل تفضل مشكورا قام مثبتهولى بمسمار ( او خابور طويل بمعنى اصح ) و طلع مش متثبت صح و فى فرق 5 سم كاملين بين الفنوس و الاكصدام و لما قلتله يظبطهولى قالى اصل مش عارف البلاستكة اللى مش عارف ماسكة اية كده اتكسرت و مش هاينفع يتعدل و هايفضل كده ... ماعلينا من دى كمان
قلتله الاكصدام الخلفى كان ساقط شوية لتحت ( تاكسى خبطنى من ورا ) فا عايز الاكصدام يتفك و يتربط تانى معدول و الامامى برده من الحكات اللى تحت اتفك من تحت و عايز يتربط
الاكصدام الامامى اتعمل معقول ( بغض النظر عن فانوس الشبورة )
الاكصدام الخلفى اتضطر يفك الفوانيس عشان يربط الاكصدام و الحمد لله الاكصدام اتعمل كويس بس ..
بعد فك الفوانيس و اعاده تركيبهم ظهرلى ايرور فى التابلوه الفانوس اليمين فيه لمبة فاصلة
لعب فى الفانوس شوية و ركبه اشتغلت و بعد ما مشيت رجع الايرور تانى قمت راجعلهم
غيرولى اللمبة و مش نفس الامبير بتاع الفانوس فا اللمبة اشتغلت ومفصلتش بس الايرور لسه موجود !
المهم بعد شد و جذب فى الكلام و بعد ما لطعونى ساعة كاملة و اسلوب معاملة مش حلو بالمرة مشيت بيها و هيا كده و و مشيت حوالى الساعة 4 من عندهم !
بس بصراحة الراجل اللى غسلى العربية عمل معايا احلى واجب و غسلها غسله محترمة ربنا يباركله
و توته توته خلصت الحدوته حلوة ولا ملتوته ؟ :)
و السلام عليكم و رحمة الله و بركاته