الموضوع: جـــدول أسعــــار و مقترحات وشكاوي مــــازدا 3 في السوق

السلام عليكم

انا مالقتش وقت اكتب الموضوع بشكل احسن فأخدت قص ولزق من مشاركة عملتها في موضوع الطلبات المقدمة لغبور ولزقتها هنا ، اعذوروني معلش

ده الرابـــط للجدول يا رجالة :

https://spreadsheets.google.com/spre...wtMlE&hl=en_US




بالنسبة لموضوع السعر من غير ضريبة كنت هاضرب الأسعار في الآخر كلها في 1.15 عشان تمثل 15 % ضريبة و خلافه ، بس ممكن يكون معاك حق إن كل واحد بيحط نسبة ضريبة و مصاريف تانية لما يتجمعوا مع بعض تدي نسبة مختلفة في الآخر ، فخلينا كلنا نكتب الأسعار شاملة الضريبة وكل حاجة

المهم دلوقتي ، ياريت كل واحد دخل وكتب أسعار يدخل يعدلها تاني بحيث:

1- السعر المكتوب يمثل سعر القطعة الواحدة فقط (لو بتتباع اتنين اقسم السعر على 2 )

2- الأسعار اللي تتكتب تكون شاملة ضريبة المبيعات وخلافه(السعر النهائي اللي بيطلع من جيبك)

3- فين بقيت الأسعار للمازدا يا رجالة ؟ انا والله من الإسبوع اللي فات بكون في الشغل من 7 الصبح وبمشي كل يوم مش قبل 11 وساعات 1 بالليل للأسف مش لاقي وقت اتصل او انزل الف على أماكن البيع ، ومقدر طبعا ان مش كل الناس هاتكون فاضية برضه ، أنا عملت sheet تانية في الجدول اسمها Contacts/Addresses ، ياريت الناس تكتب فيها تيلفونات وعناوين الموزعين ( غبور ، سونستا ، سمارت ، العالمية ، الخليل ...) عشان اللي فاضي فينا يدخل ويشوف العنوان ويروح بنفسه أو يتصل يسأل على الأسعار بالتيلفون ( ولو اني معرفش موضوع الأسعار بالتيلفون ده بينفع معاهم ولا لأ )

4- عايزين نملى أسعار قطع الغيار للماركات التانية المنافسة زي هوندا وكورولا وسوبارو و ميتسوبيشي ( متشكر جدا جدا للي دخل وكتب أسعار سوبارو ونيسان) عشان انا ملاحظ في السوباروا مثلا ان في فروق معتبرة في بعض قطع الغيار تساند وجهة النظر في ان في مغالاة في قطع غيار مازدا


وبجد أنا متفائل خير ان شاء الله ، نصبر ونركز شوية في تجميع ال data ، عشان بجد تأثير الكلام في وجود بيانات فعلية غير لما تتكلم معاهم كلام في الهوا

والبيانات دي هاتفيدنا عشان ممكن نبعتها لمازدا اليابان برضه لو حصل ان مافيش حاجة اتغيرت ، (ماهو اليابان مش هايقف كلامنا معاهم على قد الميل اللي فات وبس على الأقل هانبعت نقولهم ان الدنيا اتظبطت ولا لأ ونوريهم كلامنا باللغة اللي بيفهموها وهي لغة الأرقام والبيانات( وهي نفس اللغة اللي بيتكلم بيها مديرين التسويق والمبيعات في غبور أكيد يعني) )


ومش بعيد يكون موضوع السعر اللي نزل 4000 جنيه ده نتيجة الميل اللي اتبعت لليابان ( بس مش هانقبل "بالعضمة" اللي اترمت دي عشان نهدي اللعب (يعني خد دي يا حبيبي واسكت وروح العب بعيد ) )

( شايفين الهمة والسعي بيعملوا ايه ؟؟ فمنجيش بعد الخطوة دي وننخ، نكمل للآخر بروح أحسن ونسعى ونجتهد أكتر، ولا عايزين نشتكي ونفضل نشكي لبعض على القهوة وفي المنتدى وعايزين الدنيا تتغير من حوالينا ؟؟ )


أرجوا من كل الأعضاء اللي شاركوا واللي ماشاركوش من البداية ، مش هاتخسروا حاجة لما تكتبوا سعر قطع الغيار او تكتب شكوى ضايقتك لما رحت في مراكز الصيانة أو حتى تكتب مقترحات انت نفسك تلاقيها لما تروح هناك ( مش لازم شكاوي وبس ) ( وحطيت جدول الشكاوي والمقترحات برضه في نفس الرابط في sheet تانية اسمها Proposals/Complaints )

عايزين نحسن من سوق مازدا و لو غبور مش عايز يفكر ازاي يحسن سوق العربية نفكرله إحنا ونقوله يحسنه ازاي ولو محسنش يبقى ساعتها في حلول تانية ان شاء الله

الهمة يا رجااااالة