الموضوع: أسماء محفوظ تكتب : 6 ابريل والتمويل ام الاجنبي

أسماء محفوظ تكتب : 6 ابريل والتمويل ام الاجنبي

أقسم بالله العظيم أن أقول الحق في كل ما اعرفه عن حركة 6 إبريل وأحمد ماهر والله على ما أقول شهيد

النوت دي كنت فاكرة ان ملهاش اي لازمة لحد ما اتخنقت من كتر الاسئلة اللي بتسالها عن سبب انسحابي من 6 ابريل واسئلة عن " هو بجد احمد ماهر بياخد تمويل؟" ولما الاقي مقالات تكتب في جرايد في اتهامات للحركة وخصوصا احمد ماهر ويتقال الدليل الوحيد اللي معاهم اني سبت الحركة بسبب اكتشافي التمويل وتعبت من كتر الكلام في الموضوع ده ومكنتش فاكرة ان الناس مصدقاه بالشكل ده

عشان الكلام عمال يزيد وبوخ اوي

انا اسمي أسماء محفوظ دخلت السياسة مع اول دعوة لاضراب عام لشعب مصر في مارس 2008
وكنت واحدة من ضمن مؤسسين حركة شباب 6 ابريل في 28 يونيو, وكان أول مرة في حياتي أعرف يعني ايه حركة سياسية
كانت كل اجتماعتنا يا اما في نقابة الصحفيين ,, ياما في الحديقة الدولية ... ياما في حديقة الحرية... ياما كان في مقرات الحركات او الاحزاب او المنظمات الحقوقية

كان معظمنا شباب مكنش ليه اي خبرة سياسية بس كنا كلنا نسمع عن أحمد ماهر خصوصا بعد اعتقاله وتعذيبه في 4 مايو 2008

‫ط´ظ‡ط§ط¯ط© ط£ط.ظ…ط¯ ظ…ط§ظ‡ط± ط.ظˆظ„ طھط¹ط°ظٹط¨ظ‡ ط¬ط²ط، 1 ظ…ظ† 2‬‎ - YouTube

فكنا بنعتبره حاجة كبيرة عندنا كلنا ومع ذلك كانت بتتطلع عليه اشاعات عشان الناس تبعد عنه زي ما كنت بلاقي ناس غريبة يقولولي قبل ما ااتكلم معاه خلي بالك ده راجل بتاع بنات ومش كويس وممكن يعاكسك ولما قابلته ولقيته شخصية محترمة جدا واللي يعرفه يشهد

المهم

وقتها كان في مخبرين على النت اللي هما اللجنة الالكترونية كنا بنسميهم كعبو .. كعبو دول كانت كل وظيفتهم انهم يهددو الشباب الجديدة ويخوفوهم ويشوهو صورة الشباب المعروفة وكانو بيدخلو يبعتو رسائل خاصة للشباب ويقولو كلام زفت وقطران على احمد ماهر ومجموعته على انهم ناس جايين يندسو وسطينا وقابضين من برة وجايين يخربو البلد والكلام ده


طبعا كان في ناس بتصدق وقتها وناس كانت بتخاف .. بس انا شخصيا من النوع اللي بحب اعرف الحقيقة بنفسي وبصدق اللي
حاساه وشايفاه وكمان كنت متحمسة اوووي اني اعمل حاجة بجد ضد الفساد اللي بيحصل


كان في الاول كان كلامنا على الجروب وبنشجع بعض على اننا نطبع المنشورات اللي بتتكتب على الجروب ونوزعها وكان كل واحد
بينزل يطبع شوية على حسابه وبعدين كان في دعوات بتتم على وقفات عند نقابة الصحفيين وبعدها كان بيبقى في اجتماع في النقابة او لما كان بيحصل مؤتمر كنا بنروح نحضره ونتسلل للكافتريا اللي في السطح ونعمل اجتماع ونقفل كل الموبايلات خوفا من التسجيل


وشوية شوية الدايرة ابتدت تكبر ونتفق على نشاطات منها لما روحنا اسكندرية في 23 يوليو 2008 واللي كانو رايحين من القاهرة كل واحد بيدفع حوالي 23 حق تذكرة الميكروباص والاكل كنا بنلم من بعض 5 جنيه ونجيب عيش ووشيبسي واليفط بردو كنا بنلم من بعض ونشتري القماش وعصيان قصب ونشتري اسبراي وعلى حسب التكلفة بنقسمها علي اللي معاه فلوس ونشوف كل واحد يقدر يدفع كام


ومن خلال الغنا باغاني للشيخ امام او يا اغلى اسم في الوجود الناس كانت بتبصلنا وتستغرب ولما كنا بنتضرب قدامهم كانو بيستغربو اكتر وكنا بنصعب عليهم وكان في ناس بتدور على اخبارنا عشان تتطمن علينا

ولما كان حد بيتقبض عليه كنا بنلم من بعض وبنلم من الشخصيات السياسية عشان نعمل لجنة اعاشة وكنا كتيير بناخد من المراكز الحقوقية


شوية شوية ابتدى عددنا يزيد وبقينا في كل اجتماع نلم من كل واحد على قد ما نقدر عشان اليفط والورق وكمان عشان نجيب اكونت نقدر نبعت بيه رسايل للموبايلات لمجموعة ارقام كبيرة بس كل ما كنا بنتعرف اكتر كل ما كان في ناس بتتصل بينا متشركش في الشارع بس تتدفع فلوس من جنيه لالف بس الف دي كانت نادرة جداا وكانت في الاغلب بتيجي وقت الانشطة الكبيرة زي 6 ابريل 2009 و2010 وكمان كانت اغلبها من نشطاء سياسين كبار


كانت اكبر ازمة للنشطاء اللي كان بيتقبض عليهم انهم بيخرجو مفيش شغل بيتفردو من شغلهم طبعا وفي منهم عنده مسئوليات وكانت بتبقى احباط بشكل كبير ليهم بس كنا بنساعد بعض في البحث عن شغل وكان في ناس بتساعدنا في ده


عدت علينا فترات صعبة ومؤلمة جداا وخصوصا ان كنا بنلاقي يا اما تريقة من ناس كتير وخصوصا من اهالينا بس اهالينا اغلبهم كانو بيقاطعونا عشان كانو خايفين من امن الدولة وكنا دايما بنسال نفسنا هو احنا مجانين بجد؟؟ بس كنا بنصبر نفسنا ببعض ولما كنا بنتجمع كنا بنغني اغاني للشيخ امام واغاني في حب مصر عشان تحمسنا وتشجعنا


في 2008 اتعرفنا بشباب مصريين محاضرين في اكاديمية اسمها اكاديمية التغيير دول كانو بيدرسو علم اسمه التغيير اللاعنيف او التغيير السلمي

وكانو بيعرفونا بثورات العالم ازاي قامت بشكل سلمي تماما

المحاضرين دول مكنوش بياخدو فلوس بس كنا بناجر مكان في اي مركز تعليمي وكنا بردو بنقسم فلوسه علينا وتاجير بروجتكور
من ضمن الثورات دي كانت صيربيا وحركة اتبور اللي مؤسسينها شباب وكلنا حاسينا انهم شبهنا اووي وده اللي خلانا ناخد اللوجو بتاعهم تاثرا بيهم واعجبانا بنجاحهم لما اتفرجنا على فيلم وثائقي ليهم


وشباب مننا حاول يدور على الشباب دول ونعمل لينكات معاهم وكنا بنحلم اننا نقبلهم في يوم من الايام
‪Nonviolent Resistance Works‬‏ - YouTube


وفعلا كانت اتوجهتلنا دعوة منهم عشان شباب مننا يروحولهم هناك ويتكلمو معاهم ويبقى تواصل بشكل مباشر والتعرف على رحلتهم في التغيير السلمي زي بالظبط ما دلوقتي في شباب من بلاد كتيير بيحاولو يتواصلو معانا عشان نقولهم ازاي عملنا الثورة عشان هما نفسهم يعملوها في بلادهم


واللي دفع التكاليف منظمة مجتمع مدني والسفرية دي كانت نشاط من ضمن اللي الانشطة اللي بتعملها
ودي كانت السفرية الوحيدة اللي شباب مننا سافروها قبل الثورة والشباب كانو من ضمن وفد فيه مدونين خارج الحركة وشباب

احزاب تانية . مع ان اتعرض علينا سفريات كتير لكن كنا بنرفض لاسباب كتير
صيربيا الوحيدة اللي كانت بالنسبة لنا حلم بجد واللي عايز الفيلم الوثائقي بتاعهم ممكن يتواصل معايا وانا انسخهوله ولما تشوفوه هتعرفو ليه احنا كنا مبهورين بيهم


لما كان بيتعمل مؤتمرات في قطر او لبنان او دبي كان احمد ماهر بيسافر بصفته المنسق العام للحركة وطبعا كان في ناس كانو بيطلعو عليه اشاعات انه بيسافر يجيب تمويل من الشيخة موزة J


المهم خلاصة كلامي ده كله وانا اسفة على الاطالة .. ان من 2008 لحد دلوقتي كل الفلوس اللي اتصرفت في الحركة من جيوبنا الخاصة او تبرعات الاعضاء داخل او خارج الحركة اوشخصيات سياسية


وان مفيش اي تدريبات اتلقيناها خارج مصر والكلام العبيط بتاع تدريبات على قلب نظام الحكم والكلام الجبار ده
التدريب الوحيد اللي اخدناه داخل مصر على ايد اكاديمية التغيير وده موقعها أكاديمية التغيير AOC


ودول مجموعة شباب محترمين جداا ووطنيين جداا


في خلال الفترة دي كلها حصلت عدة انقسامات واتهامات كتيير زي لن تمروا الشهيرة وكلها كانت بتتم عشان مصلحة اقالة احمد ماهر من منصبه فكان مجموعة من حزب ما او مجموعة مستقلة يحبو يشيلو ماهر ويحطو واحد منهم يشوهو صورته في كل حتة وطبعا الاعلام لما بيصدق والامن لما بيصدق


وكان من ضمن المشاكل اللي على احمد ماهر انه ديكتاتور بس من وجهة نظره هو كان ليه رؤية وحلم كبير فكان دايما بينفذ اللي هو شايفه صح ومكنتش المشكلة في قرارته بس المشكلة انه مكنش بيستشير كل الناس مع ان ده مكنش غلط عشان في علم الحركات او الحملات السياسية مش المفروض ان يكون في ديمقراطية واخذ راي كل الاعضاء

من قبل الثورة وفي اشاعات كتييييييييييييييير في موضوع التمويل ده اشهرها الشيخة موزة وطبعا محدش عنده اي دليل لاي حاجة وكان مصدر الاشاعة في الاول واحد كلنا نعرفه عميل لامن الدولة ودلوقتي ناشط سياسي معروف ومع ذلك كان النشطاء اللي بيكرهو ماهر بيرددو نفس الاشاعة واحيانا كان نشطاء اخرين يصدقوها ويبتدو يتناقلوها


مشاكلي انا مع الحركة كلها كانت مشاكل هايفة حواليا وكان في اعضاء حوالي 4 او 5 دايما يهاجمو ماهر بسبب وجودي منسقة المجموعة الاعلامية وعشان اسمي بيظهر في الاعلام كتيير وكمان كان اي راي شخصي بكتبه على الفيس بوك كان بينسب للحركة

وحصلت مشادات وخلافات وفي 2010 اتشلت من منسقة الاعلامية عشان نريح الكل بس فضل في خلافات بيني وبينهم لحد ما اتخنقت وبعد الثورة ولما ظهر عليا هجوم شديد من كل الناس وطلعت عليا اشاعات كتييير وساعتها كانت بتضر بالحركة جامد ووصلت لبيانات تصدر من الحركة ان كلامي ما يمثلش الحركة في شيء .. قررت اني انفصل تماما واريح الكل

بس محبتش اعلن ده في الاول وقررت اني انسحب في هدوء عشان الاشاعات متزيدش ووقتها كمان في كلام داخلي من قبل الثورة في وسط مجموعة ميزيدوش عن ال10 اشخاص انهم يلمو توقيعات في الحركة ويوقعو احمد ماهر ويعملو انتخابات لانتخاب منسق عام جديد عشان كمان مش راضيين عن اداء المجموعة التنظيمية اللي حوالين احمد ماهر وهو مش عايز يغيرهم
بعد الثورة وخصوصا بعد اقتحام مقر امن الدولة .. تناقل كلام ان في ورق لقوه في امن الدولة بيثثبت انه اخد تمويل من برة


وكان كل مرة بسمع فيها الكلام ده اسمع فيه مبلغ شكل وقلت لازم نقدم بلاغ فورا للنائب العام ووعدوني فعلا انهم يقدمو بلاغ بس مرة يتقالي اصل الفلوس مش في حسابه ومرة اصل الفلوس في حساب مراته لا لا اصل الفلوس في حساب اخته لا لا الفلوس في حساب نشطاء في الحركة


وفي الاخر ولا حد طلع اثبات بالتمويل ولا حد قدم بلاغ وطلع كلام كتيير بيحاولو يقنعو اكبر عدد ممكن ان ماهر بياخد تمويل ولازم نقيله

اعضاء كتيير مصدقوش الكلام ده فجه وقت ان ماهر كان بيفكر بعد الثورة يقلب الحركة لكيان مشروع وتبقى منظمة مجتمع مدني لا تهدف للربح عشان اسباب كتيير بس كانت مجرد فكرة بيفكر فيها وبيحطلها رؤية

شباب من المجموعة دي عملو هاك على الاكونت بتاعه وهو بيكلم واحد بيشرحله على موضوع المنظمة

قالك بسسسسسسس احمد ماهر بيعمل منظمة عشان ياخد تموووووويل يا جدعااااااااااااااااان

ومن هنا اتعملت حركة جديدة شوية يسموها حركة 6 ابريل الدمقراطية ومرة حركة 6 ابريل الحركة لا المنظمة
وطلع كلام كتيير من نشطاء تشويه لسمعة ماهر السياسية والاخلاقية بشكل سيء جداا ولما كنت بحاول اعمل مواجهة كانو بينكرو قدامه انهم قالو اي حاجة ضده


المهم الموضوع انتهى بتاسيس حركة جديدة 6 ابريل بردو وبقى في محاولات لحد انهاردة لتشويه صورة الحركة اللي منسقها احمد ماهر عشان الاستقطاب يبقى سهل


والاعلام طبعاااااااا بيصدق ويزيط ... وماهر يرد ببيان يشتم فيه المجموعة دي وهما يردو عليه بشتيمة وبقينا فرجة وتاريخ 6 ابريل بيضيع عشان شوية كلام ملوش لازمة وملوش دليل واحد يرضي ربنا

كل كلامي ده مش معناه اني متفقة مع احمد ماهر في كل حاجة .. انا مختلفة في كتيير من افكاره السياسية
لكن يبقى احترامي ليه وتقديري ليه وتاريخه النضالي

تاني : انا سيبت الحركة عشان اسباب تنظيمية بحتة ومفيش ولا مليم دخل الحركة من اي بلد اجنبية
ورجاء للجميع تقديم بلاغ للنائب العام للتحقيق في تمويل 6 ابريل ولو في اي فرد في الحركة تثبت ادانته اعدموني في ميدان عام

اخيرا رجاء لطرفين 6 ابريل .. كفاية اتهامات وكفاية تصريحات مضادة الانقسام ده مش بس بيضركو لكن بيضر بتاريخنا كله وبيضر كمان بمستقبل الحركة
ارجوكم يا نرجع تاني كتلة واحد يا نبطل خناق في الجرايد والتلفزيونات

كل اللي قلته مليان تفاصيل بس لو كتبتها هيبقى سلسلة كتب .. حاولت اختصر على قد ما اقدر
حركة 6 ابريل تجربة فريدة من نوعها وتجربة تاريخية شاهدها العالم كله في مشاركتها في صنع حراك سياسي انتهى بثورة عظيمة
وحتى بعد خروجي منها فانا معتزة بكوني ابريلية وبحترم جميع الاعضاء والنشطاء اللي عرفتهم وشاركتهم العمل السياسي من 2008 لحد انهاردة

شكرا لحسن استماعكم

أسماء محفوظ
14 يوليو 2011

رابط النوت :Log In | Facebook

المشاركة الأصلية كتبت بواسطة Tyler_Durden

بس الحق يقال الجيل الجديد مش كده
الجيل الأقدم شوية تلاقيه عاوز يهادن و يعيش و خلاص ثم يموت مستقرا صامتا
إنما الجيل الجديد .. ده جيل عاوز يعيش

البركة بالشباب , و ان كان فيه كبار و الله كويسين

المشاركة الأصلية كتبت بواسطة hobiko

لأ بصراحة ...... أنا حاولت أفكر بس مش جاى بالى حد ..... انت تعرف مين ؟

لا انا مش مطلع اوي كده
مش ملاحظ ان الموضوع ده هااااااااااااااادي جدااااااااااااااا