الموضوع: وهم دياموند موتورز و نهايه البومه قربت فى مصر

السلام عليكم ورحمه الله و بركاته

طبعا انا عارف ان العنوان مش هيعجب ناس كتيره و كمان هلاقى مليون رد يقولى انت غلط ووحش و و و و و

لكن ما علينا و انا بكتب الموضوع ده لوجه الله و ليس اكثر

اولا انا واحد من عشاق ميتسوبيشى جدا و بالاخص البومه منها لانها ببساطه عربيه حلوه وواسعه و بتجرى و قطع غيار مرميه فى كل حته و طبعا سعر اعاده البيع اللى مخليها معشوقه الشعب المصري

معايا و الحمد لله بومه 2006 سبورت و عربيه ماشاء الله عليها تحفه بجد و من فتره قررت انى اغير و اركب عربيه جديده على الاقل تكون موديل جديد و سنه اجدد كنوع من التجديد و طبعا بما انك راكب يابانى اول ما تفكر تغير هيكون قدامك يا يابانى يا اوروبى

الاوروبى جميل و ممتع و كل حاجه بس للاسف معقد فى صيانته و مش اى حد بيشتغل فيه و كمان فيه عربيات اعاده بيعها مش كويسه و طبعا ناهيك عن السعر العالى اصلا فى الاول

يبقى نخلينا فى اليابانى اللى بيمشي فى بلدنا و طرقها و كل الناس حافظاه
1- هوندا
2- تويوتا
3- نيسان
4- لانسر

النيسان انا مش بحبها خالص و ليا فيها تجربتين قياده و مش برتحلها تماما فكانت بعيده عن النظر

التويوتا طبعا وحش و لا غبار عليها لكن فى ناس قلقتنى منها فى 2009 و 2010 و نزلت ال2011 يابانى كامله و لسه تحت المقارنه رغم انها غاليه عليا شويه لكن دلوقتى تعتبر احسن بكتير و تعرفوا ليه

الهوندا طبعا لا كلام و لا حد يقول فيها كلمه غير انها واطيه و بتحك فى المطبات و طبعا ده عيب الشوارع عندنا مش عيب العربيه و دورت فيها لكن للاسف برده سعرها غالى عليا شويه كمان فقر قطع غيارها عندي فى طنطا ( لانى من طنطا مش من القاهره و يارتنى ابقى من القاهره و اشترى هوندا و انا مطمن )

اتبقى خيار واحد و هو اللانسر و طبعا موديلين يا قرش يا بومه
القرش جميله ووحش و زي العسل بس 1500 سي سي و كمان قطع غيارها مش منتششره اوي زي البومه و العربيه الوكيل القديم وقعها فى السوق المصري و كل اللى تقوله انا هجيب قرش يقولك اوعى القرش بتخير و غاليه قطع غيار

خلاص يبقى بومه و نتوكل على الله و على الاقل عارفينها و حافظينها و فاهمينها و كمان غيروا الجنط و العدادات و الفتيس يعني تغيير ممكن يواكب 2011 فى ظل الكمالايات و الرفاهيه اللى بقت موجوده فى باقى العربيات

يبقى نتوكل و نشترى بومه بقى و 2011 ياعم عشان شكل عدادات 2010 مش عاجبنى اوي ( تناكه بقى ماهى عربيه محفوظه و مفيش قلق منها )

المهم بدأت رحله البحث عن البومه و طبعا قصه الوكيل القديم و الجديد و الخ و اللى كنت بتابعها من هنا على المنتدى و بصراحه استفدت و كنت كل يوم او يوم و يوم اكلم معرض ما او سمارت كار و اسأل عن البومه السبورت مانا راكل سبورت يبقى اكيد هاركب برده اسبورت و لا ايه ؟

من يومين كان فى موضوع بيتكلم عن البومه الجديده و الوكيل و كان فيه تليفون لدايموند موتورز
اخدت الرقم و كلمتهم و بصراحه ناس محترمين و رد بكل زوق
و اخدت رقم استاذ حازم مدير المبيعات فى المعرض الرئيسي و كلمته يوم الاتنين اللى فات و دار بينا الحوار ده فى التليفون

- السلام عليكم
- و عليكم السلام ورحمه الله
- حضرتك استاذ حازم ؟
- قالى ايوه يا فندم اتفضل
- انا اخدت نمره حضرتك من المكتب الرئيسي و قالولى ان حضرتك مسؤل البيع
- فعلا يا فندم و انا مدير المعرض فى دياموند موتورز اتفضل اامر
- الامر لله يا باشا انا بس عايز اعرف هى البومه ال2011 نزلت و لا لسه
- نزلت يا فندم و موجوده
- طيب ياباشا لو انا عايز اشترى حالا اجى الاقيها
- هى موجوده يا فندم بس للاسف المخزون اللى عندى حاليا فى المعرض محجوز و لكن حضرتك تدفع مقدم حجز و انا هابعت اجيب العربيه لحضرتك من الجمرك و فى خلال 5-7 ايام تكون مستلم
- طيب يا فندم كلام جميل انا بدور على سبورت هل الفئه ده موجوده و لا ايه
- ياباشا كل الفئات موجوده بس زي ما قلت لحضرتك تحجز عشان مثلا لو حضرتك عايز لون معين و ليكن فرانى و فى حد حاجز لون فيرانى اكيد هيكون هو اولى منك انه ياخدها
- يا فندم معنديش اى مشكله فى الحجز و لا الروتين خالص انا بس بتأكد ان العربيه موجوده و هاستلمها فى الميعاد اللى حضرتك بتقول عليه يعني بعد 5-7 ايام مش بعد شهر و لا اتنين و لا الكلام ده
- لالالا يا فندم الاستلام بعد الحجز ب 5-7 ايام مفيهاش نقاش و كمان حضرتك لو العربيه باسمك يبقى تجيلبلى صوره بطاقتك معاك عشان الافراج وورق المرور يكون باسمك على طول عشان التراخيص
- طيب يا باشا مفيش اى مشكله بكره او بعده هاكون عند حضرتك احجز بس هو مبلغ الحجز كام ؟
- المبلغ ياباشا 5000 جنيه و مش اقل من كده لو سمحت يعني لا 3000 و لا 4000
- يا فندم مفيش اى مشكله خلاص بس هى العربيه اصلا بقى سعرها دلوقتى كام ؟
- انى نوع بومه و لا قرش ؟
- لا ياباشا البومه كامله سبورت ؟ و هو القرش ده موديل 2011 و لا اقل
- البومه اسبورت ب 130000 و القرش اه 2011
- بكام ياباشا القرش ؟
- انهى فئه فيها ؟
- الهاي لاين منها
- 160000
- خلاص يا فندم تمام طيب فى عربيات موجوده فى المعرض اتفرج عليها
- طبعا ياباشا العربيات موجوده و تقدر تتفرج عليها مفيش اى مشكله
- خلاص يا فندم هاجي لحضرتك ان شاء الله
- ان شاء الله انت عارف العنوان اللى جنب داندى مول
- هو مش عارفه بالظبط بس عارف داندى مول طبعا
- تمام هو جنبه على طول
- خلاص تمام ياباشا كده تمام انا عارف المكان
- شكرا و السلام عليكم
- و عليكم السلام

طبعا شديت الترحال امبارح ورحت على التوكيل و معايا واحد صديقي و الخمس بكاوي طبعا و يالا بينا
وصلت و الحمد لله الساعه كده 2 الظهر و ماشاء شكل العربيات و كمها فى اول المعرض و بره يخض اى حد
قلت يا مسهل و دخلت سلامو عليكم الاستاذ حازم لو سمحت

جه استاذ حازم و قلتله انا فلان و كلمتك اول امبارح و كنت عايز احجز السبورت
قالى اه اهلا بس السبورت خلصان و الله و مش موجود
يعني ايه ياباشا مش موجود انت مش قلتلى فى التليفون ان كل الفئات موجوده و انا سألتك عن سعر الاسبورت
اه ياباشا انا قلتلك سعر بس هى مش موجوده خلصت و الله
مش فاهم يعني ايه تدينى سعر على حاجه مش عندك و كمان انت قايلى ان كله موجود و الاسبورت موجوده
يا فندم طب اعمل ايه كله محجوز و السبورت الجديد فى الدفعه الجديده فى شهر 9
قلتله يعني انا هستنى لشهر 9 عشان اخد عربيه المفروض انكم منزلنها و انتوا لسه مش علمتوا افتتاح رسمي و كمان مكلمك و قايلى انها موجوده
ياباشا ماحنا ماتكلمناش فى الوان افرض انت مثلا عايز لون و مش موجود عشان كده قلت استنى لما تيجي
قلتله ايه اللى انت بتقوله ده مش كلام منطقى تماما و اللى اعرفه انك لما تقول على حاجه موجوده تبقى بجد موجوده مش مجرد كلام
قالى خلاص انت عايز لون ايه ؟
قلتله فضي
قالى انا مش عندى فضي انا عندي ابيض و نبيتي
قلتله خلاص نبيتى و لا يهمك
قالى طب انا مش عندي الا ابيض
قلتله هو حضرتك عايز تجيب العيب منى و لا ايه مش فاهمك ؟
قالى لا مش الموضوع انا بس بوضح ليك انها مش موجوده و كل الاستوك اللى عندى محجوز
قلتله طب و الحل ايه دلوقتى يعني انت جبتنى من طنطا على الفاضي
قالى خلاص خد هاف اسبورت و هى هى الاسبورت و ب 122 ارخص ب 8000 من الاسبورت
قلتله طب و بالنسبه للاسبويلر ايه بقى "؟
قالى نركبه لحضرتك هنا فى التوكيل ب 1200 بالرش بكله
قلتله طيب و فتحه السقف ايه بقى ؟
قالى ده هى المشكله لكن الباقى واحد و برده اتنين اير باج
قلتله طيب و بالنسبه للسي دي
قالى حضرتك تركب سي دي جديد احسنلك و يكون ام بي ثري كمان او ممكن اللى بيشتغل على الولاعه
قلتله حضرتك معلش انا اسف انا راكب اسبورت 2006 واقفه بره اهى ينفع اركب بعدها هاف ؟
و كمان هدفع 1200 فى اسبويلر و 2000 فى كاسيت نضيف يعني 3200 يعني العربيه بقت ب 125
و الاسبورت ب 130 زياده فتحه سقف و طبعا عتب و كساحات الاكصدامين يبقى كأى حد عاقل بيدور على الكماليات ده يركب اسبورت مش هاف صح و لا ايه ؟

قالى و الله انا قلت لحضرتك و انا حر
قلتله شكرا ياباشا و اسف على ازعاجك
و طبعا مدى القفله اللى اتقفلتها جدا من الاسلوب و الرد و من الوكيل الجديد

و سبته و رحت اتفرج على العربيات اللى كانت فى المعرض
كان فى اتنين قرش وواحده بومه كلاسيك بجنط وواحده اوت لاندر

سبت البومه و القرش و اتفرجت على الاوت لاندر ووانا واقف لقيت واحد اعرفه شغال فى معرض عربيات مشهور هنا فى طنطا و جاى يستلم عربيات للمعرض
وقفتا و اتكلمت معاه و قلتله على اللى حصل
قالى انا اعرف حد عنده بومه سبورت و متهيألى لسه مش اتباعت فى معرض فى طنطا
قلتله خلاص اشتريها
المهم كلم المعرض بتاع الراجل و قالى ده اتباعت خلاص للاسف قلتله طب انا عايز اتفرج عليها ادينى عنوان المعرض
رجعت على طنطا و رحت على المعرض لقيت فعلا واحده نبيتي واقفه و سبورت

نزلت و دخلت المعرض و قلت اتفرج و يارتنى ما اتفرجت

العربيه خليجي تماما و اللى معاه بومه قبل كده هيعرف المعنى
طبعا مش بعيب فى الخليجي لكن الفروق بقى كالاتى
اولا الخامات بقت وحشه جدا لدرجه انى حسيت ان تابلوه عربيتي بيلمع اكتر
الفيبر اللى جوا العربيه بقى ضعيف جدا و انا ببص على التابلوه حسيت انه لو وقفت فى الشمس شويه هيشرخ و لا هيتكسر
السقف بقى خفيف جدا و تحس انه مش ملزوق كويس من جوه
الطااره الجديده الجزء الفضي اللى فيها ده بايخ جدا و شكله مش حلو
كمان المصيبه ان كل العربيات نازله فرش بيج و ابانوس طيب العربيات الفاتحه مش لايق عليها الكلام ده زي الفضي و الابيض
المقابض من جوه نيكل و القفل مش نيكل
فتحت الكابوت و اتفرجت حسيت ان خامه الخراطيم و الريداتير بقت اضعف
البلاستيك بقى نفسه شكله وحش و بقى فقير جدا

المهم لقيت واحد من المعرض بيقولى عجباك العربيه ده قلتله اه قالى بس ده متباعه
قلتله طيب مفيش واحده تانيه اسبورت برده ؟
قالى فى واحده بس لون شامبين مش نبيتي
قلتله شغال بكام ياباشا
قالى ب 135 قلتله ليه انا لسه جاي من التوكيل و قالى ب 130
و قالى مش اشتريت منه ليه
قلتله عشان خلصت
قالى بالظبط مفيش عربيات موجودده و سعرها هيغلى
قلتله اه يعني لو انا عايزها دلوقتى استلم حالا
قالى و ترخص الصبح كمان
قلتله يعني عشان اشترى عربيه يبقى ادفع 5000 زياده عن تمنها
قالى دور و انت تسمع الكلام

طلعت من المعرض و انا عمال اقول ده نصاب و حرامي
و دخلت اكتر من 6 معارض بعضها و كلهم على اسعار 135 و 134 و 133 و 137 و 138 اقل واحد كان 133 و تسليم كمان 15 يوم ( مش عارف هيجيبها منين )

و ده حكايه اليوم من التوكيل للمعارض و فى النهايه العربيه بقت زفت بمعنى الكلمه و الوكيل بقى الرواس التاني
لان نفس سعر العربيات و على فكره القرش الهاي لاين ب 160 نفس سعر الرواس اول ما نزل ال2009 منها

يعني اللى استنى استنى على الفاضي
و بكده اعتقد انه هيفشل لان الناس مش هتلاقى الجديد اللى فضلت سنه مستنياه عشانها
و كده حرام اوي على البومه بصراحه

المشاركة الأصلية كتبت بواسطة hamada_amg

صح ياباشا................


و الله ياباشا انا بغيرها بعد 3 سنين مش 5 لانى كنت شاريها استعمال و انا تاني يد فيها...............

و بعدين ياباشا اسأل براحتك خالص و لا ذكاء و لا غباء و لا الكلام ده.................

السلام عليكم و رحمة الله و بركاته

ألف شكر لكرمك و ذوقك و أخلاقك العالية أوى.

أصل أنا كنت فاكر أنك شاريها زيرو فى 2006 , لكن دلوقتى وضحت الصورة, ربنا يوفقك و ان شاء الله قريب نباركلك على عربية bmw 540 بمواصفات خاصة .