الموضوع: مات ابي الحبيب يوم 4-7-2011 ونصيحة تسوى مال الدنيا لكل الاعضاء

انا لله وانا اليه راجعون :مات ابي الحبيب يوم 4-7- 2011
بعد مرض شديد قضى آخر ايامه بالعنايه المركزه لمدة 7 ايام ثم فاضت روحه الى الله سبحانه وتعالى....

انا عارف ان الموت علينا حق وان احنا كلنا في الدنيا زي اللي راكبين مترو كل واحد له محطه لازم ينزل فيها ... ولكن مش قادر اوصف لكم قد ايه الوحد يتمنى لو يدفع عمره كله وكل ما اوتي من مال في سبيل اني اقعد تاني مع ابي الحبيب الذي كنت احبه واحترمه اشد احترام ...

وعلى الرغم من ان سني مش صغير ومتزوج وعندي اولاد ولكن حاسس اني بقيت يتيم لفقدان ابي الحبيب ...وعرفت ليه النبي صلى الله عليه وسلم اوصانا بالعطف على الاطفال الايتام لان الطفل دا بيبقى فقد ركن هام جدا في حياته الا وهو الاب.

على الرغم من اني لم اقصر مع ابي في طلباته واحترامه ولا انسى يوم مناقشة الماجستير لما قبلت يديه امام زملائي والمشرفين على وكل الاطباء اللي حضرو المناقشه ...وكان لي الفخر ان اقبل يدي والدي امامهم جميعا ولكن ....مهما عملت معاه مش كفايه عليه فهو يستحق الكثيروالكثير.....ومش قادر اوصفلكم هو واحشني اد ايه......واحشني قوي قوي قوي ....يارب اشوفك تاني يا ابي الحبيب ...في الجنه ان شاء الله

اسألكم الدعاء لابي بالرحمه والفردوس الاعلى من الجنة....ولي وأمي واخوتي بالصبر على الفراق..

.الحمد لله ان ابي قبل ان يموت ب 3 ايام افاق من الغيبوبه وقعدت اتكلمت معاه واعطاني الكثير من النصائح في ديني ودنيايا وقالي انه راضي عني ....ورفض اني اعتذر عن حضور مؤتمر طبي في نهاية الشهر وقالي لازم تسافر تحضره حتى لو مت...
وبعدها دخل في غيبوبه تاني حتى فاضت روحه ...

ونصيحه لكل الاعضاء:: لو والدك او والدتك على قيد الحياة اوعى تزعلهم منك ....لإنك ماتعرفش هما هيموتو امتى وهل هاتقدر تستسمحهم ولا لأ .....وساعتها لو معاك كنوز الدنيا مش هتنفعك ولا تعوضك عن لحظة رضا من ابوك او امك عليك.. واوعى في يوم من الايام تحسسهم انك كبرت وخلاص لم تعد بحاجه اليهم ..

......اسأل الله ان يتغمدابي الحبيب برحمته وان يبلغنا رمضان وان يجعلنا جميعا من اهل الجنه..