تجربة شراء ميجان 2005 فشلت وكوميدية !!!
من فترة بدور على عربية ميجان ومن يومين كدة شفت اعلان على احد المواقع عن ميجان 2005 وصاحبها حاطط صور بصراحة رائعة عنها من الداخل والخارج وكاتب عليها كلام خرافة انها ماشية تقريبا 54 الف كيلو وصالون بحالة الفابريكة والشكل الخارجى ممتاز ومش محتاجة ولا مليم
قمت اتصلت بصاحبها وسألتة عن العربية قالى ممتازة ومش محتاجة اى شئ فبصراحة كلامة وصور العربية شجعنى وطلبت منة انى اشوف العربية ولو عجبتى اكشف عليها وبعد كدة اشتريها
المهم رحت انا وواحد صاحبى بيفهم عنى فى العربيات اكتر منى خاصة انى لسة جديد فى عالم القيادة
اتقابلنا مع صاحب العربية فى المعادى وهوا عايش هناك العربية بصراحة اول ما شفتها انبهرت بيها الشكل الخارجى بصراحة الى حد كبير ممتاز مع وجود بعض السلبيات بس كانت مش مؤثرة.بدأت اتفحص السيارة بشكل اكبر لاحظت بعض الامور
لما بقفل باب السائق تلاقية يقفل مثل باب الميكروباص دى اول حاجة فصاحب العربية قالى اصل فى خابور او مسمار عايز يتركب
الابواب الخلفية لما بقفلها بتقفل تمام وتحس انها فعلا عربية اوروبى
فى بعض الثقوب فى قماش باب السائق ومسند الذراع متاكل ومتقشر بصورة توحى بعدم النظافة
التابلوة كان كويس مش وحش
لما تيجى تنور نور الصالون تحس ان الزراير هاتقع فى ايدك والنور متقسم على 3 لمبات صغير وبصراحة الاضاءة ضعيفة
ستارة الباب الخلفى مكسورة
دى بعض السلبيات بس يعنى الحاجات دى سهلة ومقدور عليها
قلنا نخش فى الجد ونجرب العربية على الطريق
صاحبى ركب ودخل الكارت وداس start عشان العربية تدور لاقينا العربية بتنتش ومش قادرة تقوم خالص حاولنا تانى وتالت بردة نفس النظام العربية بتحاول تدور بس مش قادرة المهم طلع ان لمبة البنزين منورة والعربية عايزة بنزين
استغربت انا وصاحبى قولنا معقولة نروح نشوف عربية وما يطلع فيها بنزين حاجة غريبة
المهم صاحبى قال لصاحب العربية هانروح نجيب لك بنزين فى جركن عشان العربية تدور
ركبت انا وصاحبى فى عربيتة وهيا نيو اكسنت ورحنا جيبنا 5 لتر بنزين من بنزينة شل وكنا واخدين جركن فاضى من صاحب العربية
رجعنا حطينا البنزين فى العربية وركبنا عشان نجربها وربطت الحزام وقلت بقى هانطير حطينا الكارت تانى ودوسنا استارت والشاشة فى التابلوة بتقول OIL LEVEL OK
صاحبى يدورها بردة نلاقى العربية بتنتش ومش قادرة تقوم حاولنا اكتر من مرة بردة حلفت يمين انها مش قايمة وصاحب العربية طبعا كا محرج مننا جدا بس واحنا بنشوفها كان قال لنا انة غير لها طرمبة البنزين بس ما غيرش فلتر البنزين
فيبدو ان المشكلة بسبب الطرمبة او الفلتر الله اعلم
طبعا صاحب العربية قال هايكلم الميكانيكى وعرضنا انا وصاحبى اننا نساعدة لو محتاج شئ لكن الراجل قال لنا انا بشكركم جدا واسف ع اللى حصل
وطبعا البيعة باظت بعد اللى عملتة العربية ههههه يعنى رحنا من مدينة نصر للمعادى عشان نحط بنزين لعربية ميجان ونمشى تانى ههههه
الخلاصة ياريت كل واحد عندة عربية مستعملة وعايز يبيعها يكون امين مع اللى هايشتريها مش يقول انها ممتازة ويطلع فيها مشاكل خاصة ان صاحب العربية قالى هناك انها عايزة تغيير سيور رغم انة اكد عليا فى التليفون انها مش محتاجة حاجة وانا حاسس كمان ان عدادها ملعوب فية والله اعلم
اسف على الاطالة
