عرض للطباعة
السلام عليكم
بعيد عن الخناقات والثوره والحاجات دي كلها
ياتري لو زوجتك مش بتهتم بيك قوي الا لما مثلا تصلي الفجر في المسجد وانت اصلا بتصلي بقية الفروض في المسجد بس الفجر بتقطع وساعات في البيت وساعات تصليه صبح وتلاقي مراتك تبقي 100 100 معاك لما تصلي في المسجد الفجر ولما تبطل تقلب عليك وتقولهالك صراحة انها مش هدلعك الا لما تصلي الفجر
المفروض ردك يبقي عامل ازاي ؟؟ وهل المفروض الزوجه تعمل كده فعلا؟ يعني تربط حاجه بينك وبين ربك بحاجه هي المفروض تعملها بغض النظر عن اي حاجه تانيه ؟؟
لا أعلم الحكم الشرعي لكن...طالما صلاة الفجر
يبقى يا بخت من كانت تلك زوجته
الله يباركلكوا فى بعض ويحميها ويقويها ويقويك على الخير.ويهدى من يحتاج للهداية ويكرمنا جميعا بامر الله.
ربنا يكرمك جميعا بس انا عايز اعرف هل هو ده الصح ولا المفروض يبقي ليه طريق تانيه وهل من حق الزوج يزعل ولا لآ
اعتقد ان الزوجة اللى تعمل كده غلطانه بعض الشئ
و لكن
من الممكن ان ننظر للموضوع من وجهة نظر اخرى
و ساعتها هاتبقى الزوجه مصيبه 100%
الزوجه تريد الخير لزوجها و تحفزة بشئ معين كما تحفز طفلك للحصول على درجات مرتفعه
بصراحه زوجه ممتازة
و اذا زعل الزوج
مع كامل احترامى
سيكون زعل عند او زعل كبر
و ليس زعل على حق
اكيد من حقك تزعل
الكلام ده بيحصل عشان موضوع الصلاه بس ولا في بقيه امور الحياه
اعتقد ان ده تحكم وتعنت غير مقبول
مافيش حد ينكر فضل صلاة الفجر او غيرها من الصلوات في المسجد
يعني ممكن تحببه في الصلاة في المسجد باسلوب الطف
لكن اسلوب التهديد ممكن يجيب نتيجه عكسيه
والله اعلم
عاوز تزعل ازعل
بس يوم ما تقف تتحاسب ابقى افتكرها
هو فى كده دلوقتى
اعرف ناس توزن زوجه زى كده بالدهب وبدون مبالغه وياريتهم لاقيينها
ليا صاحب كده لسه كان بيشتكى من الموضوع دع بالذات
بس جه فى اخر الكلام وقال الحمد لله ان ربنا رزقنى بيها بخرج من بيتى وانا مطمن
وانا عن خبرة بقى ههههههههههه هاقوللك
مفيش واحده كامله
يا محترمه ومتدينه وييجى عليك ساعات تحس انك اقل من ناس متجوزين ورايقين
يا تاخدها رقاصه ليل ونهار مقضياها عشان خاطر عيونك وموراهاش غير الهلس والمنوكير والبادى كير
بزمتك لو كنت متجوز التانيه كنت هاتخرج وتسيبها فى البيت وانت مطمن ولا كان زمان تربية عيالك بالشكل ده دلوقتى ولا كان ربنا هايرزقك برزقها وكل ما تضيق عليك تفرج ولا هاتحس ببركه فى قرشك ووقتك وتعبك
هى الزوجه كده يا يمين يا شمال وانت باين عليك من اهل اليمين وربنا ما يحرمك من اليمين ولا اهله وتقابل مراتك فى الجنه
ان كنت مؤمن بالله واليوم الاخر هاتعرف قيمتها يوم ما تقف تتحاسب
وفى الدنيا وحياتك
جرب كده تاخد بعضك وتروح تعيش بعيد عنها شهرين تلاته ولا تصلى ولا تشيل همها وشوف كده
هاتحس ان فى حاجه ناقصه وهاتحنلها
اما الزوجه اللى مالهاش غير فى الدلع فاحب اقوللك
تروح نجوى فؤاد تيجى فىفى عبده ولا هاتفرق واظن فاهمنى
انا كلمتك بالبلدى كده لكن لو دورت فى رد من واقع ديننا الكريم هاتسمع اللى يحببك فيها اكتر
حد يطول ربنا يرضى عليه هو واهل بيته ويبقى زعلان
ياراااااااااااااااااااااا ااااااااااااااااااااجل
بتديك حسنات
و بتاخد ثواب على حسابك :)
ربنا يباركلك فيها
هو الاسلوب ممكن يضايق
و اعتقد ان دى ممكن حاجه تتراضوا عليها انتوا الاتنين
بانك توضحلها ان الاسلوب ده بيضايقك او تاثيره عليك مش فعال بالدرجه اللى هى متخيلاها
النساء شديدي الملاحظة بيدورو علي مصلحتهم برضة -واهو توفير للزمن برضه -كل شيء بقدر
تحياتي الظاهر انك خدت عين والصناديق لقت لها رد عليك بالموضوع ده هههههههههههههه
الموضوع ده الحمد لله بيحصل في امور الصلاة العباده فقط وانا مش زعلان بس اللي مضايقني ان تبقي حاجه قصاد حاجه
يعني مبدا الثواب والعقاب ودي حاجه تتبع مع الاطفال مش مع الكبار - صح ولا انا غلطان ؟
انا الحمد لله كنت عايز واحده متدينه عشان كده عشان تعيني علي امور ديني وارقي معاها مش انزل وطبعا مش عايز مراتي تبقي دلع وشخلعه وخلاص بس ده مش معناه ان مفيش اي حاجه بقي الا لما تعمل كذا وكذا
صح ولا مليش حق ازعل ؟
انا عارف اني المفروض اعمل كده وده ربنا هيحاسبني عليه بس مش عارف ليه مش متقبل الموضوع بالطريقه دي وخصوصا ان وضحت وقلت اني مش هجي بالطريقه دي لاني ساعتها لا هحس اني بصلي عشان انا عايز اصلي ولا هبقي مبسوط من الدلع لاني حاسس انه قصاد حاجه مش نابع من جوا الزوجه
كلام بيني وبينك في ودنك :)
بص انا عارف ان كبريائك كراجل عامل حاجز في الموضوع ده
فانا هفولك علي حل لعل وعسي ينفع
ايه رايك تاخد عهد علي نفسك تنوي فعلا تصلي الفجر في المسجد
وتدي لنفسك فرصه تلات اربع ايام تأقلم فيهم ظروفك علي كده (هنتعبتر الاربع ايام دول ارضاء لكبريائك انك بتنفذ كل حاجه من نفسك مش بضغوط خارجيه)
وتبدا فعلا بعد الوقت ده تداوم علي صلاة الفجر بنيه مخلصه لربنا
وقتها حضرتك بتقول ان في البيت هيرضوا عنك وبتحس باهتمام اكتر
انا مش عارف بصراحه اسلوب التعامل ما بينكم
بس رجاء خاص لو مش هتعرف تنفذ الي هقولهولك ده رجاااااااء متنفذهوش واكنك مسمعتش كلامي
بص اول يوم بهدوء حاول تتمسك بموقفك وخلي الامور ماشيه في نفس النمط انك مصليتش بدون زياده
وارفض اي اهتمام زياده بس بصنعة لطافه بدووووووون ما تحرجهم ولا تصدهم صد مباشر
تاني يوم مفيش مانع تلين شويه في التعامل
وهكذا لحد ما تلاقي نفسك طبيعي التعامل الكويس ما بينكم وفنفس الوقت انتا خلاص اتعودت علي صلاة الفجر في المسجد
وكله نابع من جواك ومكنش في اي ضغوط عليك
وخد بالك كلها اسبوع ولا 10 ايام ورمضان جاي
وكده كده هتبقي بتصلي الفجر في المسجد وده هيساعدك علي التعود
وربنا يكرمك انتا واهل بيتك بالجنه ان شاء الله
A.Yakout
خد نصيحتي الشيطان بيكرهك في اللي هي بتعمله عشان فيه الخير ليك وليها
حافظ عليها و ربنا يثبتكوا على الطاعة
انا والله ماعندي اي مشكله وانا مش مبسوط اني مش بصلي الفجر ولما ببقي مداوم عليه بتبقي حياتي حلوه واليوم باديء من اوله بطاعه علي عكس الملل والاحباط والياس اللي انا عايشه دلوقتي
بس فكرة الثواب والعقاب نفسها مش عجباني خالص لان ده حق من حقوقي
يعني انت ينفع تقول لمراتك مش هكلمك كلام كويس ولاهعبرك الا لما تعملي كذا وكذا حتي لو لمصحلتها
وبيتهيالي ملوش دعوه بالكبرياء لان المصلحه مفيهاش كيرياء
مش في الحديث إن النبي صلى الله عليه و سلم قال: "رحم الله رجلا قام من الليل فصلى و أيقظ امرأته ، فإن أبت نضح في وجهها الماء ، و رحم الله امرأة قامت من الليل فصلت و أيقظت زوجها ، فإن أبى نضحت في وجهه الماء" أعتقد الحالتين تكاد تكون متطابقة
اقتباس:
المشاركة الأصلية كتبت بواسطة أبومعاذ
+11111111111111111
رايكم كله صح
لكن خلينا بعيدا عن الدين خالص نتكلم في حاجه تانيه
لو روحت البيت لقيت مراتك عملالك جو مليون الميه ولوز اللوز ولما الموضوع خلص اكتشفت ان كل ده عشان عايزه لبس او حاجه معينه يعني الموضوع كله مكنش نابع منها ده عملته في مقابل حاجه تانيه هي عايزاها هي ساعتها هيبقي ده نفس احساسك لو علمته عشان هي بتحبك او عملته عشان هي عايزه تعمله
نفس الكلام علي اي حاجه لما حد يهديك بهديه عشان بيعزك مش زي مايهديك بحاجه وتلاقيه بعد كده عايز منك مصلحه
هو ده اللي انا بتكلم فيه
النصيحه وخصوصا في الدين مفيش عليها كلام طبعا
حد فاهمني ؟؟
بلاش فهم غلط
وقلتلك حط كبريائك كراجل علي جمب للحظه بس علشان تفهم وتشوف الامور بمنظورها الصحيح
مراتك مش عايزه من وراك حاجه
مراتك ريدالك الخير وعايزه تهديك
غيرك بيدور علي ضفر واحده زي مراتك تساعده وتهديه للخير واديك شايف الستات اليومين دول عاملين ازاي
انا اسف لو كلمتك بالبلدي وبصراحه شويه
A.Yakout
إن البيت الذى يحيى الليل بالقيام بيت تحفه الملائكة وتتنزل عليه الرحمة وتسوده السعادة الحقة ، ما أجمل أن يتعاون كل من الزوج و الزوجة فى تحقيق هذا الخير ، فعن أبى هريرة رضى الله عنه قال : قال رسول الله صلى الله عليه وسلم رحم الله رجلاً قام من الليل فصلى وأيقظ امرأته فإن أبت نضح فى وجهها الماء ... رحم الله امرأة قامت من الليل فصلت وأيقظت زوجها فإن أبى نضحت فى وجهه الماء ) رواه أبو داود بإسناد صحيح .
انا فاهمك يا مسكين
انا من رأى ان الشيطان بيبرزلك النقطه دى عشان يحارب زوجتك فى انها بتعينك على طاعه الله وأداء الفريضه فى مكانها الصحيح حاجه زى دى بصراحه المفروض تفرحك مش تزعلك لأنها بتحاول تقربك من ربنا ودا مش هيعود عليها باى نفع الا حاجه واحده ان ربنا هيبقى راضى عنها ويجازيها خير على دا انا فاهم كويس انت بتتكلم فى ايه استعيذ ربنا من الشيطان كل ما الفكر دا يدخل فى دماغك وابدأ انزل صلى الفجر فى المسجد وربنا يباركلك فى زوجتك وفى بيتك وأولادك وتذكر
وأظفر بذات الدين
افحمتوني ياجماعه
جزاكم الله عنا خيرا
سلام الله عليكم ورحمته وبركاته
في الحقيقة أنا شعرت بالغيرة من تصرف زوجتك لأنها بتتصرف بايجابية ولمصلحتك
ولكنها تناست شىء مهم جدا ألا وهو أن الرجل لا يتقبل النصيحة المباشرة ولكن إذا كان التوجيه
على غرار ما فعله الحسن والحسين رضى الله عنهما عندما أرادا أن يعلما رجلا كيفية الوضوء فقاما
بالوضوء أمامه دون أن يحرجانه كان لذلك وقعه على نفسك .هكذا كنت أسمع من أمي كانت تقول
كرامة الرجل وكبريائه اجعليهما نصب عينيكِ وإذا أردتِ توجيه نصيحة له فابدأي بنفسك أمامه أو وجهى تلك
النصيحة لأحد أبنائك واجعلى من زوجك دوما القدوة لهما وقتها سيصلح من نفسه ليكون تلك القدوة
وبينى وبينكم أنا بنفذ الوصية دي وبتؤتي ثمارها .....
ودعني أخي الكريم اقول لك أمرا هاما لا كرامة في أي أمر يخص الدين والتقرب من الله ولكن صحح النية
أن تكون لإرضاء الله قبل كل شىء وحاول أن توضح لها أن هذا الأمر بتلك الكيفية يزعجك ويكفيها فقط التنويه له
وإن شاء الله ستستجيب لذلك.
ربنا يحفظكم ويحميكم ويجعلكم خير معين للآخر على الفوز بالجنة
احلي حاجه ان كل الرجاله تقريبا جم في صف زوجتي والموضوع ده برضه اتعمل لمراتي في منتدي سيدات وكل السيدات جم في صفي انا
ربنا يهدينا جميعا ويتقبل منا ومنكم صالح الاعمال
الأمر بالمعروف يجب أن يكون بمعروف والنهي عن المنكر يجب ألا يتخلله منكر
الهدف نبيل بس الطريقة مستفزة شوية
بس ممكن حضرتك تتخيل مثلا انك يوميا ما شاء الله بتصل فى الجامع وبالتالى هى حتتعامل كويس ويبقى هو دا الروتين اليومى.
ويوم ما تجى ومتصليش فى الجامع لظرف ما هى عارفاه - تعب - ارهاق - خلاف ذلك ساعتها حتعديهالك لأنك مش بمذاج حضرتك منزلتش.
ارجو تكون الفكرة وصلت
وبارك الله لكما وبارك عليكما.
بسم الله ما شاء الله ربنا يباركلك فيها و يباركلكوا في اولادكو و بيتكم
اققلك على حاجة حلوة و لو عملتها بعد فترة و الله هتحب الموضوع و هيبقى نوع من انواع الدعابة بينكم اصحى انت قبل الفجر بنص ساعة و صحيها و قلها قومي باقي على الفجر نص ساعة نصلي قيام ليل و الفجر جماعة و تحاول تصح قبلها تصحيها و هتلاقيها هي بتحاول تصحيك قبلها و هيبقى فيه مواقف فعلا جميلة هتتندروا بيها بعد كدة و اولادكوا معاكم هيتزرع فيهم حب صلاة الفجر جماعة و قيام الليل و او استعداد لرمضان كمان
بس اوعى تقلب معاك بانها تصحيك بعد ما تنام ب ساعة علشان تبقى هي اللي صحتك في الاول =)
ربنا يبارك فى زوجتك واحمد ربنا، دا انا بتحايل على زوجتى انها تقوم تصلى الفجر ولا حياة لمن تنادى والحجة طبعا معروفة ..تعبانة طول اليوم ..الولد مانمش الا قبل الفجر بساعة .. الخ، وانا عازرها بس كان نفسى تكون فية همه اكتر من كدة اما ربط الموضوع بحق من حقوقك فأنا متفهم وجهه نظرك لما الزوجة تربط معاملتها معاك بطلب معين لكن فى الحالة دى الوضع مختلف طبعا.
هههههههههههههاقتباس:
المشاركة الأصلية كتبت بواسطة gebreel
البارح بتناقش معاها تاني وبقولها يعني انا لو قلتلك مش هكلمك كويس الا لما تحفظي 5 صفحات قران في اليوم مش هتتضايقي ودي زي مايكون لقت كنز كانت قاعده علي الأرض لقيتها نطت وقامت مره واحده وقالتلي ياريت واعملها بجد وحسيت انها عيل صغير وماصدقت لقت حاجه
محدش يعرف يغلبهم ابدا
ربنا يهديها ليك ويعينها علي الطاعهاقتباس:
المشاركة الأصلية كتبت بواسطة husseinsalah
ممكن تجرب تنام بدري عشان تعرف تصحي الفجر
اشغليله ليله لطلوع النهار
غيريله حاله
احكي ياشهر زاد احكي يا شهر زاااااااااااااااااااااد
اهم حاجة تخلي نفسها محور اهتمامك باي طريقة كانت وتعملك البحر طحينة وانت بتحب الطحينة ههههه وهو فيه راجل مبيحبش الطحينة