هوه احنا مش طايقين بعض كده ليه ؟ !!!!
من بعد الثورة و كل الناس بقى عندها الحرية انها تتكلم , تتظاهر , تعتصم ... و تقفل المجمع كمان .... كل واحد و دماغه و كل شلة تنقيلها رئيس جمهورية لحد ما قربوا المرشحين ( حتى قبل ما يعرفوا قوانين الترشيح ) يبقى عددهم بعدد الناخبين و بقى شعار المرحلة رئيس لكل مصري ............
كل ده زي الفل و معنديش مشاكل معاه ... كله و مزاجه ... كمان عشان احنا في مرحلة الفوران اللي بعد الثورة و الناس كانت مكبوتة 60 سنة و مصدقوا يتكلموا و يتحركوا براحتهم ....
و لكن ::::::::::::::::
المشكلة فين بقى !!!!!!
بقى أسلوبنا في التعامل مع بعض " من ليس معي فهو ضدي " زي المعلم بوش بالظبط ( لو فاكرينه و فاكرين المناسبة بتاعة الجملة دي )
اديني عقلك كده ثواني :::: لو انا و انت رأينا واحد يبقى الانتخابات لازمتها ايه ؟ طيب الاحزاب دي كلها مين هيشترك فيها لو انا و انت نفس الرأي و الاتجاه السياسي ؟ طيب مين هيصلي في الجامع و مين هيروح الكنيسة لو أنا و انت لينا نفس الدين ؟ طيب مين اللي مش هيصلي ؟
لو أنا و انت إخوان مين هيبقى مسيحي ؟ سلفي ؟ علماني ؟ ليبرالي ؟ اشتراكي ؟ ناصري ؟
لو أنا و انت وافقنا على الاستفتاء مين هيقول لأ ؟
سؤال و ياريت كل واحد فيكم يرد بصراحة ( بينه و بين نفسه مش عايزين فضايح ) خسرت كام واحد صاحبك بسبب حالة الفوران السياسي في مصر بعد الثورة ؟
يا ناس الثورة هدفها انها تخلي مصر تتحول من مجتمع الرأي الواحد الديكتاتوري الى مجتمع مفتوح لكل الآراء .
ايه المشكلة لما انت تكون شيوعي و صاحبك سلفي و لا اخوان ( و على فكرة ده موجود و حاصل فعلا و دور على كتاب حوار مع الشيوعيين ) ....
ليه مش قادرين نستحمل بعض !!!!!!!!!!!!
عارفين بالطريقة دي هتخلوا الكلام اللي قاله أبوالغيط و نظيف عن مصر شعبها غير ناضج و لا يتحمل الحياة الديموقراطية .........ماتخلوش الحرامية تشمت فينا يا ناااااااااااااااااااس
