تقرير بعد الاستلام .. عن انطباعى عن التيدا المكسيكى اعلى فئة بفتحة سقف
انا فعلا آسف يا جماعة لكل اللى طلب منى صور التيدا من جوة وبره بس انا حاوت اكتر من مرة ارفعها على المنتدى وبيقولى خطأ فى التحميل ومش عارف أعمل ايه يا ريت حد يفيدنى !!!!
أما بالنسبة لتجرية القيادة وآداء السيارة ف اللى حاسس بيه كالآتى :: بس انا هقارن الأداء بالبومة 2006 لأن دى اللى معانا هيا والتيدا هاتشباك بلس بفتحة سقف وجميع الكماليات فمش هقدر اقارن بحاجة تانية :::
1-بالنسبة لشكل السيارة ::
فالتيدا شكلها شيك جدا وخصوصا مع فتحة السقف وخلفية السيارة بتصميم الأنوار المتميز ومن الأمام فاللى هيبص للتيدا هيحس انها عربية - كنزة زى ما بيقولوا وشكلها بايخ ومش ظريف وضيقة من جوة - فأنا أقول الآتى السيارة ممتازة واكتر من ممتازة .
2-بالنسبة للراحة الداخلية ::
العربية مريحة جدا جدا جدا واريح من البوما بمراحل ومش ضيقة زى ما الناس بتقول عليها ومنحكمش عليها من الشكل الخارجى .. وبالنسبة لحجم الشنطة فهو عادى من وجهة نظرى ولا كبير ولا صغير وهناك ايضا الميزة فى امكانية تحريك الكنبة الخلفية للأمام والخلف حيث انها تحتوى على جرارات زى المقاعد الأمامية بالضبط وحتى مع رجوعها للخلف او تحريكها للأمام فلا تأثير على حجم الشنطة أو الراحة الداخلية .. أما بالنسبة للمقاعد الأمامية فهى مريحة جدا للظهر وغير متعبة فى المسافات الطويلة ..
3-بالنسبة لنظام التعليق ::
العربية مبتحسش فيها بأى حاجة على الطريق او أى صوت خارجى وده يفرق بمراحل عن البوما اللى كانت معذبانى بقلة جودة العازل الأمامى عن صوت الموتور او نظام التعليق اللى بتحس بأى حاجة عى الطريق حتى لو كانت نملة ... العربية ممتازة ممتازة وعاليه عن الأرض ومبتحكش فى المطبات وثايته جدا على السرعات العالية ... والطارة فعلا باور كهربا بس يتقل جدا على السرعات العالية واول احساس بتقل الطارة لما توصل لسرعة 40 على ما اعتقد فتقوم العربية قافلة الأبواب وبتبدأ تحس بتقل الطارة ..
4-بالنسبة لوسائل الأمان :::
العربية مزودة بأثنين اير باج فى الأمام + فرامل abs + نظام ebd لتوزيع قوة الفرامل على العجلات الأربعة ... العربية بقفل على سرعة معينة اعتقد انها 40 ومتقدش تفتح الأبواب بعدها إلا بطريقيتن :: انك تشيل المقتاح من السيارة أو عن طريق مفتاح زودت به السيارة فى باب السائق الأمامى بجانب مفاتيح الزجاج لازم تدوس عليه علشان الأبواب تفتح وده طبعا ينطبق على الشنطة الخلفية اللى بتفتح مع الأبواب ..
جهاز الانذار ايضا مميز جدا فهو مرتبط بصوت الكلاكس ومزعج جدا لأى حرامى ابن تيييييييييييت ... اول ما بتفتح السيارة غير انك مبتحسش بصوت الدوارة او بعد كده متقدش تعرف اذا كانت شغالة او لأ بسبب العزل طبعا فيوجد لمبة تشيك فى التابلوة بتعمل تشيك على الطارة الكهربا علشان تمشى وانت مطمأن ولو حصل حاجة وانت ماشى بتنور علشان تنذرك ..
5-بالنسبة الفتيس ::
الفتيس انا مش متعود عليه اوى وبحب شكل بتاع البوما اكتر بس هنا فى التيدا الفتيس نزود بحاجات تانية :: عندك زرار زى بتاع ds فى البوما وغير كده فى كمان زرار بيحرر الفتيس يعنى ممكن لو العربية وقفت وطلع العيب من شحن البطارية ممكن تدور كده على شباب حلوة يزقوها معاك يعنى طلعت زى المانيوال وده ميزة .
فتيس البومة cvt وبتاع التيدا مش عارف اوتوماتيك ايه ؟؟؟ بس بتاع البومة انا شايفة اريح للسيارة وللسائق يعنى العداد مش بيطلع وياخد نقلته وبعدين يرجع تانى وهكذا دواليك فى كل نقلة زى اللى فى التيدا ومعظم السيارات .
بس عامة الفتيس مريح ومش وحش ... بس كان ممكن يبقى تصميمه احلى كده زى بتاع الانترا ولا حاجة وبتقنية زى بتاع الفولكس او اللانسر فيبقى ده سوووووووووووبر ..
6-بالنسبة لكماليات السيارة :::
فتحة السقف حلوة ومكان الأنوار القراءة الأمامية كويسة ومكان للنظارة كويس وعندك فى الشماستين الأماميتين ففيهم نور بيفتح مع فتح المراية بالنسبة للنساء اللى بيحبوا الحاجات دى وكمان مفيدة لو الواحد دخل فى سنانه حاجة يعرف يطلعها !!!!!!!!!! ... درج التابلوه بحررررررررررررررررررررررر رر ممكن احط فيه مقرر كامل ومجموعة مراجع كمان وآمن لأنه ممكن تقفله بمفتاح العربية ودى حاجة لصالح أمان السيارة أيضا .. السيارة مزودة بمخدع امامى ومخدع خلفى بس شكل الكونسوله الأمامية مش عاجبنى ومكان وضع المشروبات مش متظبط اوى واتمنى انهم كانوا يعملوها زى الفولكس او الاسكودا ..
7-نظام الصوت ::
الكاسيت سى دى ممتازة وبوجود مدخل aux يديله رونق وحلاوة وسهوله الاختيار والاستخدام ... الراديو قوى جدا .. السماعات صوتها كويس جدا ... هناك تحكم فى الكاسيت من الطارة تتمثل فى الآتى ::
زرار باور للكاسيت + زرار source تغير منه بين الكاسيت والراديو وaux + تعلى وتطوى الصوت + اقلب الأغانى فوق وتحت ..
8- ملاحظات عامة ::
-مخارج التكييف كتيرة ونظام تشغيل التكييف متطور وقوى جدا زى اليابانى كالعادة والنسيان خاصة ..
-زرار الانتظار فى مكان سهل الوصول اليه على عكس البوما بعيد ..
-الزجاج سريع جدا فى الفتح والقفل ..
انا عارف انى معرفتش اعرض الموضوع كويس بس لو حد عنده سؤال انا ممكن اجاوبه عليه ...وفى انتظار حد يشرحلى ازاى ارفع الصور وبكده ممكن بقه اعمل موضوع احسن ..
نصيحة اخوية :: العربية تمنها 131500 من عند السبع وبصراحة عربية يابانى وتقفيل مكسيكى زى دى بالامكانيات والكماليات دى فه ده احسن اخيار ولا تقولى كورى ولا صينى .وبصراحة انا مدفعش 140000 فى عربية محققة اعلى معدلات فى الحوادث وبتقلب هيا بالناس اللى جواها ومش ثابته ودى طبعا هتبقى كورى علشان بس العربية شكل التابلوة بتاعها حلو ولا عربية تانية كنت رايح اسأل واحد صاحب معرض فقالى خد كذا ........ قلتله مش دى اللى بتفصل وهيا ماشية واول ما باخدها بروح اغير البطارية فى التوكيل وده كلام انا قرأته عنها فى المنتدى هنا ومش الراجل يقولى لأ أو بكدبنى فيقوم ضاحك ههههههههه طب يا ابن التيت انت عارف الكلام ده بتكدب على الناس الىل متعرفش ليه وده شكر للمنتدى فى دوره فى التوعية ... فنصيحة العربية ممتازة واكتر من ذلك ...
